Luk 23
23
Jeju ða nõ Pilat't
(Oo Mat 27:2,11 teen 14; Mrk 15:2 teen 5; Jã 18:28 teen 37)
1Koosïg lod tube þai, ørrïn Jeju an sia nõ Pilat. 2Mban girr kun døa, anan: Kï ndød de'n ðan ða sïla deg loj kï taanðøø ngekõþeg, eld kad ban lambo Sejarr al, ða el an: Nî kï døn n'î Krist kï ngar tø. 3Pilat ndïje Jeju an: Î ngar lo juipg a? Jeju tura an: Î el titbe.
4Pilat el ngéjamosïkadkari kïbog kï deg koosïg an: M'ngah ta mad dø det'n ðan al.
5Na deg koosïg høn kï døt kï tøg anan: Ndï sila deg kï nyandoo loa kam døning Judet kïtaagbe, mbagirra ko Galilet mbã ðen nëbe.
6Na lon Pilat oo dø ta 'nten ye, ndïje ke i de kï døning Galilet a? 7Lon ger kad Jeju i ko þekõt lo Herod ye, laa kï ro Herodt gog kïta Herod kïdøn tø ndï þebo Jerusalemt ndøgt'n non.
Jeju ða nõ Herodt
8Lon Herod oo Jeju ye, ða ronel ngãi. Kïtø kaglo ngãibe ndig kï n'ooa kïta nyag ngãibe în oo døat; nda kamïnt kad kï n'oo Jeju ða nya mad kï ya. 9Herod ndïje tag ngãibe na Jeju tur al. 10Na ngéjamosïkadkari kïbog kï ngéndoo Maktubg ða unïn dø Jeju kï rotïngad. 11Herod kï ngéðøøg lon telïna nya kï pãbet, gon døat na lana kub kïmaj ngãi. Na tel laa kï ro Pilat't gog. 12Kam ndøt'n non Herod kï Pilat telïn ne namna, kïta maði, ndoor i kïnadt.
Gangïn ta koi dø Jejut
(Oo Mat 27:15 teen 30; Mrk 15:6 teen 15; Jã 18:39—19:16)
13Pilat kun ngéjamosï kadkarig kï mbaiþeg kï deg kïnat. 14Eld an: I ðen kï de'n ðan romt tit de kï ngesïla deg kad taanðøø, na oon maj, m'nder girra nõsït, na m'ngah ta mad døat al tø. 15Herod kaa ngah ta mad døat al, tel lasïa kï gog rojt. Oon maj de'n ðan ða nya mad kï asï koi al. 16Kïtø 'nten m'a m'ad ndana kï ndeh n'a m'ørra. 17Kïtø ndø ða nah Pakï kïðen, kari na a ørrïn de dangãi kïða. 18Na deg tube unïn ndid kon ne anan: I tølïn de'n ðan, na ørr Barabas adj. 19Barabas i de'n lana dangãit, kïta lon deg ndun ðøø kam þet ndoorïn ne romag ye, tøl de. 20Pilat ndig kï n'ørr Jeju, kïta 'nten tel eld ta gog þaitø. 21Deg kon kï tøgd kïtai anan: I gaa kagdosït. I gaa kagdosït. 22Pilat eld ta kïkõmïta, an: Kïtøði? Ði kïmajal de'n ðan ða a? M'ngah ta mad kï asï koi døat al; m'a m'ad ndana kï ndeh, na m'a m'ørra. 23Na øsïna tõtõ kï ndid kïbo, ndïjena kï gana kagdosït, dumïn dø Pilat kï ndid kïbo'n kon ne. 24Pilat gangta kï ðan nya'n køna. 25De'n lana dangãit kïta ðøø kï ndu kï tøl de, ad i de'n ndïjena ye ørra na la Jeju jidt kad ðan sia kïgo ndigt lod.
Gan Jeju kagdosït
(Oo Mat 27:31 teen 56; Mrk 15:20-41; Jã 19:16 teen 37)
26Lon ndï awïn kï Jeju ye, ndødïn de mad kï døning Sirent, tøa i Simõ, þai ndøøt ndï ðe kam þet, høna lan kagdoosï døat kad to ndulon go Jeju.
27Bakad deg koosïg a ndulon goa kï dekïdëg tø, îgïn a tïgan kad'd a udïn wi kï tøa. 28Jeju mbel kï rodt an: Ngan kïdëg kï Jerusalem, ot nõmïn, na i non rosï kï ngansïg. 29Kïtø oon maj, ndøg a ðen nõ în a elïnt anan: Ngeronel la i kujdekïdë ye, ngéronel la în dekïdëg'n oojïn nja kïða al, kï îgïn lan mba ta ngont ad il al tø.
30Kamla a mbã girr kel mbalbog kï son kï dødt. Kï doorlog utïn død. 31Kïtø îla ðan nyag 'nten lon kag i mbool þaitø a ne, ði a ða nya lon kag în kï tut a?
32Ørrïn ngéðamajal madg joo tø, kad kï'n tølïnd nat kï Jeju. 33Lon ðen lot'n a kunïna ka dø ye, nu la gana kagdosït nat kï ngéðamajal kï joo'n non, kïkïða ko kõat kï mad ða ko gelat. 34Jeju el an: Bøw i nyàgo majal lod kø; kïta gerïn nya'n ða ðan al. Deg kegïn kubg loa yan yuk døt.
35Deg lan'na nat ða oon, na mbaiþeg lo juipg telïn Jeju nya got anan: Aj deg madg, îla i Krist kï mbed lo Luwah a ne, kï aj ron. 36Ngeðøøg tø ða gon døat, awïn roat nderrbe ða lan kasïnduu kïmasï kï døat, 37anan: Îla î Ngar lo juipg a ne, aj roi. 38Maktub mad kï ndang i døat dõ titbe. În ðan i Ngar lo juipg.
39Kïkïða ku ngeðamajalgt'n non îgïn gand dõ ye, elta kïmal an: I Krist ale? Aj roi kï jî tu.
40Na kïmad un tan ndánga'n an: Mbã Luwah kaa i þoola ale?
41El tø an: Na rota kï døjt i goðobat kïta kï ða kï taa bajij în asï ta nyaðaj; na de'n ðan ða nya mad kïgo ðobatal al.
42El Jeju an: Bïraþe, i ga kami dømt lon i ðe kï kõþe loi. 43Jeju ela an: Rota la m'ndï m'elï ye: Þola a i ndï sem kam Paradisït.
Jeju oi kagdosït
(Oo Mat 27:45 teen 56; Mrk 15:33 teen 41; Jã 19:28 teen 30)
44Nãi nderrbe kad kàd ðadenþet, til ut døning kïtaagbe mbã kàd norjin. 45Til ut kum kàd, ad lo duw døningt kïtaagbe; kubganglo kam kuj ndub Luwaht til dene joo. 46Jeju ko kï ndin kïbobe an: Bøwm m'ndï m'la ndilïm kam jiit. Lon elta 'nten ye, ad ndilïn tee. 47Lon bïradø ngéðøøg oo nya'n ða nya ye, øsïgon Luwah an: Rota de'n ðan i de kïdenesew. 48Koosïdeg tube'n kawïn na kï nat kad kï n'oon nyag'n non ye, lon oon nyag'n ðan nya ye, tel gan gud. 49Nam Jejug tube kï dekïdëg'n ndulon goa ko døning Galilet tø ye, ðan sãi ða oon nyag'n non.
Duwïn Jeju bulombalt
(Oo Mat 27:57 teen 61; Mrk 15:42 teen 47; Jã 19:38 teen 42)
50De mad ndï nõ tøa i Jojep i kïkïða ku ngékoogotat lo Juipg, i de kïmaj, i de kïdenesew tø, 51þe loa i Arimate kam døningt lo juipg. De'n non la køn ta køjt lo ngekoogota kï nyaðad al, ndï ngoo kõþe lo Luwah keðengë. 52Jojep aw ro Pilat't køa dãro Jeju. 53Ðïsï sia kagdosït kï ber. Duloa kï kub nîn; laa kam þet'n urr kam mbalt, i þe kï lan det nja kïða al. 54I ndø ðago nyag, kïta ndø taakò i nderrbe.
55Dekïdëg'n ðen ko Galilet nat kï Jeju ye, ndulon go Jojep, oon þe nîn ke titbãi lan Jeju tit a? 56Kamla telïn kïþe ðan go nyakïkootg kï yib kï kootmbî. Taan koo ndø taakòt kïgo Mberkïndat.
Currently Selected:
Luk 23: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.