Jã 20
20
Jeju þai lo koit
(Oo Mat 28:1 teen 8; Mrk 16:1 teen 8; Luk 24:1 teen 12)
1Go ndøt kïdasabang lo ndøg kïtanãimïta kïsî ritit, Mari Madelen aw døþadt lon lo ar al þaitø. Oo unïn mbal kø ta bulombalt. 2Kïtø 'nten la ørr kï ngød, ðe ro Simõ Pierrt, kï ngendoon Jeju tara; eld an: Unïn Bïraþe kø kam bulo mbalt na kï ger lon lanat al. 3Pierr kï ngendoo'n non tee awïn døþadt. 4Øsïn ngød ørrïn nat na ngendoo kïmad ãi ngød tøi Pierr tee døþadt kete. 5Ned kïber oo lo kïkamt, na oo kub nin to kïber, na and kamt al. 6Kamla Simõ Pierr'n ðe ko goat and bulombalt, oo kub nin to kïber. 7Kï mindil tø în to dø Jejut, to nat kï kub nin al, na i kï tet kam nat to kïdang. 8Kamla ngendoo kïmad'n non în tee døþadt kete ye, and oo, na ad kamïn. 9Kïtø gerïn ta kïkam Maktubt al þaitø'n an: Kari na Jeju a þai ku ngékoit. 10Kïtø 'nten ngéndoog tel awïn ne þe lod gog.
Jeju tee høi kï ro Mari Madelent
(Oo Mat 28:9 teen 10; Mrk 16:9 teen 11)
11Mari ða tïga ta bulombalt ða nõ. Lon ða nõ ye ned kï noo lo kïkam bulombalt. 12Oo malaikag joo kï kubg kïndà ngung rodt ndïn lot'n dãro Jeju tot, kïkïða i ko døt, kïða i ko njat. 13Ndïjena anan: Dekïdë, kïtøði i ða i nõ a?
Turd an: Kïta kunïn unïn Bïraþe lom awïn sia, na m'ger lon lanat al.
14Lon elta 'nten woi ye, mbel gidïn oo Jeju ða dõ, na ger ta kîa Jeju al. 15Jeju ndïjea an: Dekïdë, i ða i nõ kïtøði a? I ða i sah nõ a?
Mari oo an i ngendøø ad ndïjea ta an: Dekïdïngã îla una i laa lot mad a ne, i øjïm lon i laat nõ, kad m'aw m'una.
16Jeju ela an: Mari,
Mari mbel ela ta kïta Hebre an: Raboni. (Girra i titbe Ngendoo deg). 17Jeju ela an: Ot høm, kïta m'aw dõ ro Bøwmt al þaitø na aw ro ngankomt. Eld an: m'ndï m'aw dõ ro Bøwmt kï Bøwsï, m'aw dõ ro Luwaht lom kï Luwah losï. 18Taa ne Mari Madelen aw ørr hoia ngéndoog an: M'oo Bïraþe elïm tag 'nten tø.
Jeju tee høi kïro ngéndoogt lon
19Go ndøt kï dasabang lo ndø tanãimïta, ngéndoog utïn tabit lot'n kawïna kïtit kïta þool kï þoolïn Juipg. Jeju de lokïsøle ða dandt, eld an: Lapia kï døsït.
20Lon elta 'nten woi ye, øjd jin kï kadïn, ngéndoog ðan ronel dø koot'n oon Bïraþe. 21Jeju tel eld gog tø an: Lapia kïdøsït. Tit'n Bøw lamïn ye, titbe tø m'ndï m'lasïn. 22Lon eld ta 'nten woi ye, to ko kamdt, na eld an: I taan Ndil kïkunjðang. 23Îgïn i nyan go majalg lod kø a ne, în kï nyàgo kø, na îgïn adïn majalg lod hød sem a ne, a hønd sem tø ho.
Jeju tee høi kï ro Tomast
24Na lon Jeju ðe ye, kïkïða ku ngéndoogt kï kïla gidaijoo ad i Tomas'n a kunïna ndïngag i nat sed al. 25Kïtø 'nten ndeg ngéndoo madg elïna anan.
J'oo Bïraþe. Tomas eld an: Îla m'oo got doo ngawg kï kam jiat, m'la ngon jim got doo ngawgt al a ne, m'am m'ad kamm al bat. 26Go ndøgt kïjijoo ngéndoog lo Jeju kawïna kam kujt kïkïða nõ gog tø, na tabitg în kï kut. Tomas i nat sed, kamla Jeju ðe ða dandt el an: Lapia kïdøsït.
27Kamla el Tomas an: I la ngon jii ne, oo jim. I la jii ne ta bulo døt kïkadmt. Ot þad, na ad kami. 28Tomas tura an: Bïraþe lom kï Luwah lom. 29Jeju ela an: Kïta koo kï oom la adïn kami ye. Ngéronelg la i îgïn oon al na adïn kamd ye.
Jã ndang maktub 'nten kad deg adïn ne kamd Jeju i Ngon Luwah
30Jeju ða nyakøj madg kï yaya ngãibe nõ ngéndoogt lon, na în kï ndang kam maktubt 'nten al. 31Nyakøjg kï yaya 'nten în kïndang kïtakad adïn ne kamsï Jeju i Krist kï Ngon Luwah, na kam kad kamt'n ndï adïn ye kï i ngahn ne kumkajir kam tøat.
Currently Selected:
Jã 20: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.