2 Sam 24
24
Yokoosï tøl Israelag ngãi, Dabid dakørdeg
(Oo 1 Hoi 21:1 teen 6)
1Bïraþe þawong kïtïngabil kï Israel gog þaitø, ad søkï Dabid kïdødt, el an: Aw i da kør Israelag kï Judag. 2Ngar el Joab, bïradø koosï ngéðøøg'n i roat, an: I lago log ku girr Israelagt tube, i mba girra þebo Dant kam lot kïþodo mbã kï Birr Seba kam lot kïdøø, i tïda deg kïtakad m'gerïn kørd. 3Joab el ngar an: Kï Bïraþe Luwah loi ad deg bïlan kïdøtdøt nja þu tøi kørd kï în ne tajigla. Kï kum ngar kï ngeem oo to. Kïtøði ngar kï ngeem ðan ronel dø nyat 'nten a?
4Na ta lo ngar dum dø Joab kï bïradøg dø koosï ngéðøøgt. Joab kï bïradøg dø koosï ngéðøøgt teen ro ngart kïta da kør Israelag. 5Gangïn bah Jurrdë, høn londï Aroer kad þebot'n i ko kõt ngawden hoollot kï Gad, kamla awïn Jajer. 6Teen døning Galaad kï døning lo Hetiag mbã kï þet kï Kades, kamla teen þet kï Dan, got gog þai lan go log kï gugïn dø þebo kï Sidõ. 7Ðen Tir, i þebo kïngang, kï þebog lo Hebiag kï lo Kanaag tube, na tïgan døboi þet kï Birr Seba kam døning Negebt kï Juda. 8Lon lan go log kïkam døningt'n non tube ye, telïn kï Jerusalem go nahgt kïjikïða kï ndø døjoo. 9Kamla Joab ad ngar kør deg'n tïdad nõ. Kam Israelt deg kïngang kï ngégoosïðøø kï kiyaðøø în dub þujijoo. Kam Judat în deg dub þumi.
Luwah nda øj Dabid kïta majal'n ða
(Oo 1 Hoi 21:7 teen 17)
10Lon Dabid da kør deg tube oi ye, kama øsa pipi ad el Bïraþe an: M'ða majal kïbobe kam nyat'n m'ða nõ, na tajigla Bïraþe, m'køi kï i nyàgo ðagootal lo þer loi kïta m'ða nya kïgo lo þoodt ngãi. 11Lon Dabid þai kïsî ye, ta lo Bïraþe ðe ro Gadt, ngekelta kï ta Luwaht kï ngekoonya kamndilt'n ndï ro Dabidt an: 12Aw el Dabid an: Titbe kel Bïraþe: M'øja nyag mïta, kï køt kïkïða kudt, na m'a m'ad nya'n non tee døat. 13Taa ne, Gad aw ro Dabidt, ørra hoita'n non, an: Þo a õ kam døningt loi þal tanãimïta, ke a ãi nõ madngétaigt ngétuþa goi nah mïta, ke a i køt yokoosï kï ngetøl deg ndø mïta a? Tajigla ga na elïm nya'n sumba kad m'el ngelam. 14Dabid el Gad an: Mî kï kamkøl ngãi. I soot kad i so ji Bïraþet kïta kõkam loa i kïbobe, na kï m'so ji degt al.
15Taa ne, Bïraþe la yokoosï kï ngetøl deg dø Israelagt kïsî mbã kï kaglot'n gang, na deg oin dub døtanãimïta ko þebot kï Dan kam lot kïþodo mbã kï Birr Seba kam lot kïdøø. 16Lon malaika lo Bïraþe la jin dø Jerusalemt kad kï n'nuja'n ye, Bïraþe nya ta ða nya kï to'n non, na el malaika kï ngenuj deg an: Asï ta. Ørr jii tajigtne. Malaika lo Bïraþe ða nderrbe kad gar ndah nyakot lo Arabna kï i Jebusia. 17Lon Dabid oo malaika kï ngetøl deg ye, el Bïraþe an: Oo mî la m'n'ða majal, nin la m'ðagootal ye, na deg'n non ðan ði a? Kamla Dabid kø Bïraþe kad ji Bïraþe ndah tølïn kø nat kï ngékïþe lo bøwïn tã.
Dabid ða dïngïr la kadkari ad Luwah
(Oo 1 Hoi 21:1 teen 6)
18Ndøt'n non Gad ðe ro Dabidt, ela an: Ai aw dø mbalbot, i ða dïngïr kadkari kïjakø ad Bïraþe dø gar ndah nyakot lo Arabna kï i Jebusia. 19Dabid al aw dø mbalbot kïgo tat lo Gad tit'n Bïraþe ndan mbera. 20Arabna nøl lo, na oo ngar kï ngékïlaþerg loa ndï ðen kïdøat. Arabna, øsï døn ber nõ ngart kï takumïn døningt. 21Arabna el an: Kïtøði ngar kï ngeem ðen ro ngékïlaþert lon a? Dabid tur an: I kïta ndugo gar ndah nyako kad ðan dïngïr kadkari kïjakøt kad Bïraþe, kïtakad yokoosï kï ngetøl deg tørr jin ro degt. 22Arabna el Dabid an: Kï ngar kï ngeem taa na la kadkari døt'n oo i kïmaj. Oo bøw mangg kïta kadkari kïlahorrt. Pusï mang kï nyadø mangg tu în kirr tø. 23Ngar, mî Arabna m'ad ngar nyag'n non tube. Arabna el ngar tø an: Kï Bïraþe Luwah loi ndig døt. 24Ngar el Arabna an: I titbe al. M'a m'ndugo sei kï nar. M'a m'la kadkarig kïlahorrt m'ad Bïraþe Luwah lom nyag'n m'ta kari al. Kamla Dabid ndugo gar ndah nyako kï mangg kï sïkel l'arjã dømi.
25Nu la Dabid ða dïngïr kadkari kïjakøt ad Bïraþe, na la kadkarig kïlahorrt kï kadkarig kïkad kamsøllom ye. Titbe la Luwah oon dø køg kïta døning, na yokoosï kï ngetøl deg tørr jin dø Israelagt.
Currently Selected:
2 Sam 24: MB80
Highlight
Share
Copy
Want to have your highlights saved across all your devices? Sign up or sign in
BIBLE MBAÏ © 1980 Alliance Biblique du Tchad.