Marcos 16
16
Joca'li ma'le nec'aliséguem qoỹin so' Jesús
(Mateo 23.1-10; Lucas 24.1-12; Juan 20.1-10)
1Joca'li ma'le ỹinoxonéegue so' nolo' 'me mataxaqui, qana'chi jaso' María 'me Magdala lase, qataxa jaso' laqáỹa María 'me lat'e so' Jacobo, qataxa 'uo jaso' Salomé, saa'me neuodéeta so' codáxaqui da' taidái'ỹa da'me ỹicodídiỹi da' ló'oquiaxac so' Jesús. 2Qataxa nepotétraseguem jeso'me ne'uáueuo nolo' naua' noloqo'te joca'li táte'da jaso' napa'lai't, qana'chi ma'le nisidiséguem jaso' c'atena ca'li ỹivídedee'ga. 3Qana'chi mai'chi dosétapega'salo saa'me, 'enapega't:
—¿Jái'chogamaxa ỹ'ouáte'uo qomle, qá'a let'ádaic ñi' qa' 'me lapadénaxat jañi' napa'lai't?
4Qaláxasa ca'li ỹilódapee'uo so'me qa' let'ádaic 'me lapadénaxat jaso' napa'lai't, qana'chi sóxote da' qaỹa. 5Qana'chi ỹinoxodóoue jaso' napa'lai't. Huá'a, qana'chi qoỹilá'a so' nesoqolec ñíchiiñi, nét'a na' ỹaỹáten, ỹivídañi jaso' lapoto pagaxai. Qana'chi saa'me ỹátaqta d'oi'. 6Qaláxasa so'me 'enapegalo saa'me, 'enaac:
—'Ená'te 'au'óỹii; 'ami 'aulóitaaque so' Jesús 'me Nazaret lé'ec, so'me qoỹip'enaséguem ca'li. Qaláxasa jeso'me sóxote nec'aliséguem qoỹin, qaỹa so'me. Píiỹa jen'me qoỹachá'ña ca'li. 7'Ausómiita qomle, 'au'aqtaxañiima gaua' lasoxoñii's qataxa ga' Pedro, qoñíỹapega qomle: “Jeso'me sóxote 'uaut'ague da' Galilea. Huá'a qomle di'me, qana'chi 'anauañíi'ỹi', ỹipaquíchiỹi da'me l'aqtac 'me 'ami ỹanema ca'li.”
8Qana'chi jesaa'me ỹauo' quéd'ai jaso' napa'lai't, dasodéegue, qá'a ỹátaqta divíloxoltem da' loqolánaqa'. Qana'chi ỹátaqta qaỹa 'te d'aqtaxaatem, qá'a ỹátaqta d'oi'.
So' Jesús naloxóna jaso' María 'me Magdala lase
(Juan 21.11-18)
9Joca'li sóxote da' ỹitaxa qonec'alaxadiséguem so' Jesús so' nolo' 'me 'uáuapiiñi naua' noloqo'te, qana'chi 'uáichiiñi da' naloxoneguet jaso' María 'me Magdala lase, jaso'me joca'li ỹ'odáiỹi so' Jesús so' lé'ec siete nataqtáqaicpi. 10Qana'chi jaso'me jec da' ỹanómaxanaxa'n saua' nauégaxa'u so' Jesús, saa'me ỹátaqta daquicot'ape, qataxa noỹiit'ape. 11Joca'li saa'me da' p'iỹidelégue so' Jesús da' ỹitaxa nec'aliséguem qataxa da' sóxote nauá'ne' jaso'me, qana'chi doqolguétaxaatrapeec da'me dójo'.
So' Jesús naloxonalo saua' dos lasoxoñii's
(Lucas 24.13-35)
12Joca'li ỹim da'me dójo', qana'chi so' Jesús ỹitaxa ỹaqá'a da'me 'éeta ca'li naloxóneeta saua' dos jesaa'me ca'li taidái'ỹa ga' n'ónaxa. 13Qana'chi saa'me joca'li v'iỹílaxadeuo da' ỹanómaxanaxa'n saa'me laqáỹa', qaláxasa nataq'áita sa qoỹ'amaqte'n saa'me.
Da' l'aqtac so' Jesús 'me ỹanema saua' lamaxa's
(Mateo 28.16-20; Lucas 24.36-49; Juan 20.19-23)
14Joca'li qaỹat'ague dójo', qana'chi so' Jesús naloxonalo saua' once lasoxoñii's, joca'li ñíchidiñi, dasotralégue so' niqui'ỹáxala'. Qana'chi so'me nelaxaavlo saa'me, qá'a qaỹa 'te lip'iỹáxa'j qataxa da' ỹátaqta da' d'añiilo naua' liquidiaqtel, qá'a sa ỹ'amaqte'n saa'me nauáa'te' so'me da' sóxote ỹitaxa qonec'alaxadiséguem. 15Qana'chi so'me 'enapegalo saa'me, 'enaac:
—'Auc'áchiỹalo qomle ỹima naua' 'ale'u lail, qataxa 'au'axáchiim na' siỹaxadipi da'me n'aqtac 'me nec'alaxaqui. 16Ga'me d'amaqtenataxan, qana'chi qonachiláxan, qana'chi naqaiga 'me qonec'alaxatéegue; qaláxasa ga'me sa d'amaqtenataxan, qana'chi 'eeta't qomle da' nétaỹi da' lasouaxac. 17Qana'chi ga'me huet'ague ga' d'amaqtenataxan, qana'chi ỹ'e't qomle naua' n'anaqa 'me 'enaac: Qod'euoxonot da' ỹinaxat da' qoỹichiỹódapegue' na' né'ecpi nataqtáqaicpi, qataxa qoỹosáxanaxa'n naua' ỹoda'alo n'aqtaqa, 18Qataxa qolasáq'a ga' nanaic, qataxa da' 'uootaxa qoniỹómỹi ga' dedónataxan, qaláxasa qaỹa 'te 'enec qomle; qataxa da' qouaselelégue na' leuaxaicpi, qana'chi ỹiméegue.
So' Jesús taiỹi da' piỹem
(Lucas 24.50-53)
19Joca'li ỹimat da' dosetapelóo'te saa'me, qana'chi so' qadesaliaxanec Jesús naỹoséguem qoỹin da' taiỹi da' piỹem, qana'chi na'ague na' ỹaỹáten ñi' qan'étoqo't. 20Qana'chi jesaa'me 'éque' da' ỹ'axátreegue da' n'aqtac 'me nec'alaxaqui qoỹimíchiỹi. So'me qadesaliaxanec lecochiỹalo saa'me da' ỹátaqta ỹipaquíchiilo naua' l'aqtaxanaxaco, qataxa da' ỹaloxo'n jen' n'anecpi 'me sa qoỹauanápiỹi. Já'a, qana'chi naq'áita da'me dójo'.
Currently Selected:
Marcos 16: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.