Santiago 5
5
Qoỹ'axátem ga' nata't ne'queténaxac jen' saliaxanqapi
1¡'Ami saliaxanqapi, 'anaquiáxañiỹo' qomle da' senaac! 'Anoiñíitaco', qataxa 'an'alqáitañi qomle, ỹasouaxat da' 'ami nat'alo 'an'queténaxaquii. 2Da' 'adesaliaqai sóxote dec'óỹi, qataxa naua' 'ónaxaiqa 'adeuódii' sóxote ma'le ỹichic jen' lapaxat. 3Jan' 'anaicauai oro qataxa plata ma'le ỹátaqta decochiỹi. Qaláxasa nójo' lecochaxa naqáina qomle na' ỹ'axat da' 'adasouaxaquii, qataxa naqáina na' noláxachiñi da' 'adapáchiỹaxaquii, 'ená'am ga' dóle'. 'Ami 'alapóñiitac da' 'adesaliaqai naua' p'átreegue noloqo'te 'me souqataavlo. 4Jañi' laso'vi 'me 'ami sa 'ausiichíñi jen' 'ad'onataxanaxanquii 'me naqatétac jan' jala jen' 'adañiisíquii, naqaiñi jañi' 'ami ỹitóuoqot'ape. Qana'chi ñi'me Dios 'me lasoxola' ỹima jen' piỹem lé'ecpi, jiñi'me demachítapega da' l'alaxac jénjo' n'onataxanaxanecpi. 5Naỹi da' maliaxa 'auapiitalégue jen' 'aléua, qalqaiga ỹátaqta 'anañiiỹet jen' ni'ỹoxodic qataxa jen' noqopitaxadicpi. 'Ami 'anpiỹódiñiitac, 'aviñí'ỹam ga' nalaatac huaca. Qaláxasa naỹi ma'le nadíit'a da' 'analaataguiquii. 6'Ami 'auasaqailégue ga' jaloic ga' siỹaxaua 'me qaỹa 'te ga' huasoilégue qataxa 'aualaachii. Qaláxasa jen'me siỹaxadipi sa 'ami 'te neuóneeta.
Da' huálaxainaxac qataxa da' tamnaxac
7Chan'eesa 'ami ỹaqáỹa', ỹátaqta 'auauóỹi da' 'anpogoxóinaxaquii, cha ỹivíde'ta 'aviñii ga' livídaxac so' qadesaliaxanec Jesús. Ỹa 'auc'achiñii ga' ỹ'étetac jen' 'aléua ỹátaqta ỹa'uo da' neuálaxainaxac da' ỹiuatét'aguet ga' 'uáiñi huétep. Ỹim, qana'chi ỹitaxa jec da' ỹiuatáaque ga' p'áteegue huétep. Huá'a, qana'chi ỹaconguet da' lodiáquiaxac da' naquitét'a l'onataxanaxac. 8Nataq'en 'ami 'auauóỹaaque da' 'aneuálaxainaxaquii. Sa liiỹapiilo naua' 'adai'lídii', qá'a ga' l'iỹílaxasoxoc so' qadesaliaxanec ma'le sóxote sa qaỹáaque. 9'Ami ỹaqáỹa', qaỹo' qomle ga' 'éetapega ga' laqáỹa, qaidi sa qoỹa'uo ga' 'adasouaxaquii. Qá'a ñi'me Dios 'me nimit jen' nasouaxacpi, ma'le sóxote sa qaỹáaque da' livídaxac. 10'Ami ỹaqai'ỹolqa, 'aualoqtenaxañiỹajo' qomle da' n'aqtaguec da' ne'queténaxac qataxa da' neuálaxainaxac so' Dios l'aqtáxanaxanecpi 'me ỹamaxalégue josii'cho' da' ỹ'axat joca'li da' l'aqtac. 11Qá'a qo'mi saỹátenaqta da' ỹátaqta máchiiñi ga' ỹinoxonaqtenéegue jen' ne'queténaxacpi. 'Ami ma'le 'amachíitapega da' neuálaxainaxac so' Job, qataxa ma'le 'auaỹáchiñiita da' 'éet'ec jiñi'me qadasoxola' Dios jeso'me joca'li ỹinoxonaqtenéegue da' ne'queténaxac. Qá'a jiñi'me ỹátaqta sóxodaic qataxa choxodénataxanaxaic.
12'Ami ỹaqai'ỹolqa, da' di'ỹoqóta napacalégue jen' ỹima 'eet'oi: 'Ena'to' qomle da' 'aviỹáxatapega da' chiỹoqo'ot di' piỹem ga' 'ane'uaxánaguec, 'uootaxa chiỹaqalégue jen' 'aléua, 'uootaxa gamachaqaiga laqáỹa, qomle 'uootaxa sa 'apaguelégue ga' 'ad'aqtac. Na'chidáta da' 'oonolec ga' 'ad'aqtac da' 'au'at. 'Onétojo': Já'a. Qaláxasa da' sa 'auañoxot, qana'chi 'onétojo': 'Ai'. Da' 'onét'ec dójo', qana'chi ñi'me Dios sa ỹa'uo ga' 'adasouaxac.
13Da' 'uo ga' 'oonolec da' 'oñíita 'uo ga' nomtapeeguet, 'ónaxaic da' netaméetac. Da' 'uo ga' máchiiñi qa'en, 'ónaxaic da' d'ónaxaatac, ỹi'ỹoxodéetac ñi' Dios. 14Qataxa da' 'uootaxa 'uo ga' ỹilhuaac, jega'me 'ónaxaic da' ỹiỹáxana na' lasoxola'pi jen' 'amaqténataxanaxaicpi da' qonetameelégue, qataxa qoỹiỹóxonec jen' aceite da' qonetamena da' lenaxat so' qadesaliaxanec Jesús. 15Qataxa da' ỹátaqta huelégue da' lip'iỹáxac jen'me tamnaxaicpi, qana'chi qonec'alaxatéegue ga' leuaxaic. Qana'chi ñi' qadasoxola' Dios nichaalataxaañi. Qaláxasa da' 'uootaxa 'uo ga' loic jega'me, qana'chi qoỹapalaxat. 16Chan'eesa ñi' 'oonolec da' 'oñíita ỹichoxotem ga' laqáỹa ga' loic, qataxa ñi' 'oonolec netameelégue ga' laqáỹa, tetoqo' 'ami qonatade'n. Da' netamnaxac ga' 'ónaxaic siỹaxaua, ỹátaqta 'uo da' 'enec. 17So' Dios l'aqtáxanaxanec lenaxat Elías, jeso'me da' lasoxoc 'ena'ama qo'mi. Joca'li netamenot ñi' Dios da' sa namaq ga' huétep, qana'chi ỹipaquíchiỹi da' sa ñitelégue jen' 'aléua ga' huétep, ỹivídaxatetreegue saua' tres 'uóidi qataxa saua' seis 'auóxoiqa. 18Qaláxasa joca'li v'iỹílaxalégue da' netamen, qana'chi ỹitaxa 'uo so' huétep. Qana'chi jen'me noliliséguem jen' 'aléua, qana'chi 'uo da' jaláỹaxac.
19'Ami ỹaqai'ỹolqa, da' 'uo ga' 'oonolec da' 'oñíita ỹisamaxatáiỹi, cá'ai da' 'eesa lasoxoc, qaláxasa da' 'uo ga' n'iỹílaxateuo da' 'eesa lasoxoc, 20qana'chi 'ónaxaic da' 'auaỹáchiñii da' ga' n'iỹílaxateuo ga' loicoló'o da' cá'ai qa'en ga' sa ỹiỹamaxañi ladíquiaxac, jega'me nec'alaxatee'guesop da' leleuaxa jega'me loicoló'o, qataxa ỹ'éte'uo da' jalcote jen' qoỹapalaxat janoicpi.
Currently Selected:
Santiago 5: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.