Luka 8
8
1 #
Luk 4:43. Kosodi kanen ketubor apak naedit, kimaniman ireria kere lukapolok ka luedisiak, elimonokini ka alimor akiro nukajokak nuka ajakanut naka Edeke, kojaas nenipe ka lutomon kaarei, 2#Mat 27:55-56; Mk 15:40-41; 16:9; Luk 23:49. ka aŋor ace nukitaŋaleunitai imoyon lueroko ka adekesia, Mariam naenyaritai Magadalene, nakelomunete ajokin akanykaarei, 3ka Yoana aberu naka Kusa ekeŋadan loka Kerode, ka Susana, ka ace nuipu nukijaanakinete kiborokec lukejaatar.
4 #
Mat 13:1-23; Mk 4:1-20. Naketukokinor ekodet loepol, kopotu da lukepote kaŋolire mamakeŋ, kiner kawaragan atiar, 5“Abu ekayean koloma aiye ikekinyom; napeyei, kodooto ice ariri kerot; kicakacakai, konyama ikweny luka apak. 6Kodooto ice aŋaŋam; nakegeuniata abwaŋun, kooko, kanuemameatar akip. 7Kodooto ice okukwa; kopolooto ikukwa kakes, koridakis, 8Kodooto ice alup nuejok, kopolooros, koraata araito kiton akwatat.” Nakinerar akiro ŋun, kiworo ebe, “Yenejaas aki nuka akiirar, kiira.”
9Kiŋita ŋes ikekesisiak ebe inyo bo apolou kawaragan kaŋin, 10#Isa 6:9-10. Kotema atiar, “Kiinakinitai yes ajenun nukaiyeiyea nuka ajakanut naka Edeke; konye ice kawaragasia; tetere eanyunete komam eanyunete, ido iirarete komam ejenunete, 11#1 Pet 1:23. Aso apolou naka awaragan ŋes nata: Ekinyomit ŋes akirot naka Edeke. 12#1 Kor 1:21. Kwi da lukariri kerot kes lukiirarete; kosodi ebuni Satan, alemar akirot kotauonokec, tetere mam iyuunete ka aitajario da. 13Kwi da lukaŋaŋam kes lukiirarete kocamut akirot kailel; konye komameete alias, iyuunete nediokasilon, kosodete kapak naka acodunio etiakaros, 14Kwi da lukedoete okukwa, kes lukiirarete, ido kelototo koridakinos aiyaloŋoŋ, ka abar, ka aiyalama naka aijar, komam ititionete adioraito, 15#Asw 16:14; Bur 10:36; Apu 3:10. Kwi da luka alup nuejok, kes luka itauon luitenara luejok lukiirarete akirot, koricito, koraata araito katitiŋikin,
16 #
Mk 4:21-25. “Emamei ituŋanan yeninokokini atala, kobuburik ibore, arai aibwaikin kwap keitada; konye ibwaikini kuju ocoget, tetere epedorete luelomunete aanyun akeija. #Mat 5:15; Luk 11:33. 17#Mat 10:26; Luk 12:2. Naarai emamei akirot naibwaitai, namam ikujunio, karaida naimunonitai namam ejenunio ka aikujunio. 18#Mat 25:29; Luk 19:26. Aso kocoito kwape ipupioto; naarai yenejai ibore, einakinio ice; ka yenemamei ibore, edemunio ŋin da yeneomit ŋesi ebe ejaatar.”
19 #
Mat 12:46-50; Mk 3:31-35. Kopotu do totoke ka ikeinacan, mam apedorete aikunyakin ŋes kanuka ekodet. 20Kolimokinai ebe, “Ebwoete totokon ka ikoniinacan kokiŋa; ekotosi aanyun jo.” 21Konye Koboŋok kotema kes atiar, “Totoka ka ikainacan kes ŋul luiirarete akirot naka Edeke, kiswamata da.”
22 #
Mat 8:18,23-27; Mk 4:35-41. Kosodi kanen adiopet kapaarasia kaŋun, kodoka ataker, ŋes ka ikekesisiak; kotema kes atiar, “Aso kekwaŋaros aŋolol juwai”; kogeut alosit. 23Konye napikwaŋasi kojotoor ŋesi, kokut ekwam loepol kaŋolol; kogeut akipi ailelebun ataker, kojaut toma ationis. 24Koloto mama ejai kitwekenyut, kobalas ebe, “Ekapolon, ekapolon ba, kitwaka.” Kokweny ŋesi, kiretak ekwam ka agat naka akipi: kopalasi kojaun aiyamakin. 25Kotema kes atiar, “Ani bo aiyuunikus?” Kokuriakata, koumokis, kotemanaros atiar, “Aso iŋai bo lo, naarai icorakini kiton ikwamin ka akipi da, korimarete?”
26 #
Mat 8:28-34; Mk 5:1-20. Kodolot akwap naka Igerasenin, naetereikina Galilaya, 27Nakedokunia koitolima, kiriamunos ketuŋanan loka ore kaŋol lokejaas ajokin; apak naepol mam anapit inapen, mam abu kosal togo, konye toma atesin, 28Nakeanyunia ŋol Yesu, kilala, kibirokin kakonyeneke, kiner keporoto loepol ebe, “Anyoika eoŋ kajo, Yesu, Osoku loka Edeke loejai kuju kakuj? Keŋaiŋait, sirikiitican eoŋ.” 29Naarai abu kicorak emoyo loerono alomun kotuŋanan. (Naarai kikamununei ŋes irwan ipu; kidareneno, koenen kirikoi ka iloin; koŋedeŋedei lukeenitere; kokerianara ŋes ajokit amodiŋ.) 30Kiŋit Yesu ŋes ebe, “Ekonikiror iŋai?” Kobala ebe, “Ajore,” naarai kelomakinitos ŋes ajokin nuipu. 31Kiŋaiŋaata ŋes sirikicorak kes alomar aipany. 32Kejai nen esipan loka ipegei luipu edakasi oroŋat; kiŋaiŋaata ŋes acamakin kes alomar opegei. Kocamak kes, 33Kolomut ajokin kotuŋanan, kolomasi toma opegei: komotar esipan kaneijululuei, kibirokin aŋolol, kotwakikis akipi.
34Nakeanyuniata ikecokok nuadoikis, kokerata, kisiarakis akiro toma ore kamanat da. 35Koloto aanyun nuadoikis; kopotu mama ejai Yesu, kodumut etuŋanan lokelomunete ajokin, iboie kakejen nuka Yesu, enapit igoen, kejokiar adam; kokuriakaros. 36Ŋul da luapotu koanyut kitejenut kes kwape kitaŋaleunere ŋol lolem ajaas ajokin, 37Kosodete ituŋa kere luka akwap naka Igerasenin airiamar kilipa ŋes anyoun kamakec; naarai kikam kes akurian naepol; kodoka ataker, koboŋo. 38Konye kilip etuŋanan lokelomunete ajokin aup kaŋes; konye kotwar, kobala ebe, 39“Koboŋo orekon, kolimonok nukapolok nukiswamak jo Edeke.” Kolot, kolimonok anatar ere kere nukapolok nukiswamakini ŋes Yesu.
40 #
Mat 9:18-26; Mk 5:21-43. Kosodi nakeboŋunio Yesu, kisukunyik ekodet ŋes kaiyalama; naarai kidaritos ŋes kere. 41Ido koany, kobu etuŋanan ekekiror Yairo, lokerai ekayaiton loka atukos; kibirokin akejen nuka Yesu, kiŋaiŋa ŋes alomar togoke; 42#Luk 7:12. Naarai kejai ŋes apese nateluna, naka ikar itomon ka luarei, keapikinit atwanare.
Konye napelosi koridakis ikodeta, 43Kosodi aberu nakedeka alele nakaokot ikar itomon ka luarei, naketacakinit imurwok lukejaatar kere, komam epedori ituŋanan aitaŋaleun, 44komanu kokauke, kotiro atwele naka anapitoke; atipet kosaŋ alele nakaokotoke. 45Kotema Yesu atiar, “Iŋai bo katiro?” Kosodete nakeŋerioto ituŋa kere, kobala Petero ebe, “Ekapolon, kilukut jo ikodeta kiridakis da!” 46Konye kotema Yesu atiar, “Katiro ma ituŋanan: naarai amisiik ebe alom apedor kamakaŋ.” 47Nakeanyunia aberu ebe mam epedori aibwaio, kobu emarani, kibirokin akonyeneke, kitejenu kakonyen nuka ituŋa kere akiro nukeinakinete ŋes atiror, ido kwape kitaŋaleunere atipet. 48#Luk 7:50. Kotema ŋes atiar, “Akokuka, kitaŋaleu jo akoniiyuun; kolot inapakina.”
49Napinera ŋun, kobu etuŋanan kore loka ekayaiton loka atukos, kobala ebe, “Adaun akoonipese; sirikitaar bobo Ekesisianakinan.” 50Konye nakiiraria Yesu ŋun koboŋok ebe, “Sirikikurianar; konye kiyuu aiyuun, itaiario.” 51Nakedolio togo, mam abu kisunup ituŋanan alomar nepepe kaŋes, dimarai Petero, ka Yokana, ka Yakob, ka papa loka ikoku ka totoke.
52 #
Luk 7:13. Emonyete kere kibworos; konye kotema atiar, “Sirikimonya; naarai mam etwanit, konye ejotoi.” 53Kokienatar ŋes noi, naarai kejenete ebe adau ikoku atwanare. 54Konye kitiŋ akekan, kiworo ebe, “Ipese, kokweny.” 55Koboŋu ekemoyo, atipet konyou; kicorak ainakin ŋes inyamat, 56#Luk 5:14; Mk 7:36. Koumokis ikekauriak; konye kicor kes kinyeis alimokin ituŋanan nukiswamao.
Currently Selected:
Luka 8: AOV1961
Highlight
Share
Copy
Want to have your highlights saved across all your devices? Sign up or sign in
Ateso Old Version Bible © United Bible Societies, 1961.