Nahum 3
3
1¡Tala lalaikra tawanka,
diara saura pali man ra takbia!
Saura munan lâka ni aibanhram sa,
baku sin kunin munaia lâka bara implikaia lâka brisma ba
tnata âpu ban kabia.
2¡Klala ni wipi ba binka,
war waginka wilwaika nani karwi ba binka!
¡Aras karna plapi ba mina binka!
¡War waginka nani plapi diara ra pruki ba binka!
3¡Aras karna nani diara ailal brih auya ba!
¡Sord lipi ingnika saki ba!
¡Langsa pauta klauhi baku ingnika buki ba!
¡Insauhkan nani tausin ailal pali bâra ba,
pruan nani ailal pali ba!
¡Upla pruan wîna tara nani sip kulki sakras!
¡Upla ba ai mina prukisa witin nani ra!
4Bara naha sut na
rug lâka saura tâka,
ur mairin ai prana wal yamni kaiki sukia ra smasmalkra ba,
ai rugka lâka bara sukia lâka wal,
tawan nani ra kunin muni kan
bara nisan nani ra sin.
5Dawan karnika sut bri ba, naku aisisa:
“Kaiks, yang Dawan, nahara man mampara bui nâra sni,
prâmka ba buki lamla purara kat sunamna,
bara nisan nani sut mai kaikbia man kwala luha takram ba;
mamwan swira ba, king tasbaya nani sut kaikbia.
6Tâski nani lamla purara yakabamna,
bara upla nani sut bui mai kaiki swiram dauki,
lamwaska kiki kabia mai daukamna.
7Upla sut mai kaiki sîam plapbia,
bara witin nani wibia:
‘¡Ninibi kata ba sauhki âpu tikan sa!
¿Nanara ya witin nani ra umpira kaikbia ki?
¿Nanara ani wina witin nani maisa nanihkra ba pliki sâkbia ki?’
8¿Man kau pain sma ki Tebas ba wal,
baha tawanka tara Nilo awala tara ba un ra paskan ba,
awala laya ailal kir bri ba.
Awala ba ai kan kahbanka brisa,
bara laya ba lika kan kutbanka tara baku sa?
9Etiopía bara Idsip wal ba ai karnika pali kan;
Libia uplika nani baku sin Fut uplika sut ba,
ai aslika nani kan.
10Ban sakuna, baha karnika sut bri kan ba wal
Tebas ba ban priski alki,
alba takaia brih wan;
tawan yabalka tara nani un ra
ai luhpia nani ba, lulki sabi iki kan;
tâ uplika tara nani kan ba yaura swiaia sapa kaikaia dukiara,
ai tilara lat lulki kaikan,
bara alki priski brih wan nani ba sut ra silak ra mangki swin.
11Man ra sin mai munka bla takma;
lamla ba sriman tara man takbia ba ra,
waihlam nani aula ba mawan wina yukuwaia wisi,
yukuwaia pliska ra dimi yukuwi kama.
12Man kan kahbaikam pliska nani sut ba
kwah damni dusa ra, mâ pawan nani ailal ba baku sa,
bara ya baha dusa yahbuya uplika ba bîla kat kwah mâ ba kauhbia.
13War aiklaklabra nani man brisma ba
mairin baku man sa;
tawankam kutbanka durka nani ba,
waihlam nani mawanra param sakan sa,
bara pauta klauhan mita,
getka prakaika nani sut ba angki tikan sa.
14Lî panhki laiki,
kainam kahbaika watla ba karna dauks;
drapapa ba ra dims, slaubla ba ra tais,
¡simint pîs tanhta nani ba alki bris!
15Bahara pauta klauhan mita angki âpu mai daukbia,
bara sordkam ba sin, kruhkru baku danh âpu mai daukbia.
¡Kruhkru tara nani baku ailal sahwi banhs!
¡Tristrisia baku ailal sahwi banhs!
16Man âiatkrikam nani
slilma ailalka kasbrika ra bâra ba baku ailal takan sa
(tristrisia nani ba ai taya sins muni
mahka pâli lap tiwuya.)
17Wihta tara nani brisma ba,
tristrisia daknika tara kauhla piua ra
ai yukuwaika ra uli yukuwi ba baku sa,
lapta piua aula bara baha nani sut pâlisa;
witin nani sin baku pâli wabia,
bara anira auya ba sin kli kaikma apia.
18“¡Sepad nani yapi ba baku,
alai Asiria kingka!
War aiklaklabrikam wihtka tara nani ba yapisa,
bara aiklaklabrikam daknika nani ba
il tilara tanis man taukisa,
bara upla âpu sa naha nani asla daukaia.
19¡Sîka âpu, wînam insauhkanka nani ba yukaia!
¡Wînam sukwanka nani sukwi ba rakaia saika âpu sa!
Bamna ya man sturkam walbia ba,
witin ai mihta pruki puram wini kabia.
Kan, man saura daukaia warkka nani daukram ba,
¿ya pali ra baha saurka tâskika ba alkras sa ki?”
Currently Selected:
Nahum 3: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua