Jirimaya TÂ BÎLA NANI
TÂ BÎLA NANI
Prapit Jirimaya ba, Juda kingka lâka tnata alkan piua ra, witin iwi kan, (700 mani nani danh takan bara 600 mani nani tâ krikan piua ra, Kraist balaia kainara), Jirimaya piua sut ra, upla nani ra takaskras kupia krauki maisa paki kan, tawan purara trabil saura aula ba dukiara, witin nani ai saurka bara aidul lâka ra iwi ba tâka mita.
Witin ai nakra ni kaikan, Jerusalem ra priski alkan ba, bara pliska nani kum kum sin; aima wala ra kaikan bara witnis takan, tawan tara ba sauhki tikan, baku sin tempel watla ba; baku natka ra sin, king ba kangbi sakan kata upla nani ailal kira. Baku sin Jirimaya ba, kaina manis pat aisan kata, baha nani alba lâka ra brih wan nani ba kli tawi balbia, bara tawan tara ba kli paskan kabia.
Jirimaya wauhkataya ba, baiki sakanka walhwal ra asla dauki ulban sa. Pas ba (sapta 1—25), naha pîska ra ulban sa, Jirimaya ra paiwanka daukan ba dahra, bara sin ai smalkanka nani aisi kan ba, Juda kingka nani lâs kau takaskan bâra kan ba piua ra.
Baiki sakanka wâl ba (sapta 26—45), naha ulbanka pîska na sip sa wiaia, Jirimaya rayaka dahra nani ulban sa, witin ai âiulbrika Baruc mita ulbi swin ba, baku sin dahra aisanka nani manis baha pîska ba ra ulban sa.
Aslika yumhpa ba (sapta 46—51), nahara ulban sa, nisan nani mapara dahra aisanka nani. Baiki sakanka walhwal ba (sapta 52) bahara ulban sa, nahki Jerusalem kauhan ba, bara Babilon ra alki brih wan ba, alba lâka ra Jirimaya ba diara sut sip kan, kuna prapit baku pain apia kata.
Jirimaya mapara upla nani karna buan bara ban sin diara sauhki tikaia lâka kat wan kan. Jirimaya wark kum bri kan, upla nani ra smalkaia bara kupia kraukaia, witin nani bîla walras lâka bri ba tâka mita, sauhki tikanka tara ai purara aula ba. Kuna ai smalkanka ba upla nani bui yamni walras kata, witinka pali kat sin, waitna kum bawikira, ai uplika nani ra latwan kaiki ba, naha sturka aisi ba pain walras kata, baha mita ai lukanka kat trabil manis brin, baha tânka dukiara naha wauhkataya ra ulban manis bâra sa. Sakuna Dawan bîla ba, witin ai kupia kat pauta klauhan baku kan, diara âpu kan daskaia; “Ban kra wimna: Yang Dawan ra kau luki kamna apia, witin ai nina bri yang kli aisamna apia, sakuna witin ai bîla nani yang kupi ra ba, pauta baku ami dusi nani kat ban ami dimisa” (20.9).
Smalkanka pîska nani kum kum ra, prapit ba, karna tawan uplika nani ra lawi munisa, Dawan lâka wina laihura taki auya bamna, baku sin sunu lâka ra iwras, upla maya lâka sauhkaia baman ra iwi kan ba (sapta 3), sakuna maisa pakisa kli Gâd lika witin wal lâ daukaia ridi takan ba. Baku bamna, naha piua wina smasmalkra kum nitka âpu sa smalkaia dukiara, pana pana tawi Gâd tânka dukiara aisi kaikaia nitka âpu sa, kan Gâd lâka Holikira ba, witin nani ai sinska ra ulbi prakan ba ra kabia bamna (31.31-34).
Currently Selected:
Jirimaya TÂ BÎLA NANI: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua