Luk 6
6
Yisọs Ede Ọbọọŋ Sabad
1Ke usen Sabad keen, Yisọs ma mbed nse asaŋa ebei ke inwaŋ akpukpa, mme mbed nse awaak nsek akpukpa ke inwaŋ ikoro ebeek ataa. 2Amaadu usuk mman Farisi ekekudde se mmọ ekenamde ikoro. Ndien mmọ ebib mbed nse ete, «Nso ede mfo iwaakde akpukpa ke usen Sabad? Mfo ibiad ibed ke edinam eken.
3Yisọs ọbọọrọ mmọ ete, «Mfo ikoodke ke ŋwed Abasi se ọbọọŋ Defed ma mman nsaŋa nse ekenamde k'ini biọŋ ekedọŋde mmọ?» 4Nte enye ekedukde ataya Abasi, eben nchicha mmọ ekewaade ọnọ Abasi ataa ma mman nsaŋa nse, emi mbed ikiyakke owom ataa kesiode oku Abasi. 5Ndien Yisọs ada ikọ ise ekesuuk ke enye ndibe, eyen owom enyine unen abaaŋa edinam mman owom ke usen Sabad.
Yisọs Ọkọk Owom Udọŋọ Ke Usen Sabad
6Ke usen Sabad ewen, Yisọs akaa efe mbono mman Yuu, eketooŋo ikpeb mman owom mkpọ, owom keen ekedudo emi ubọk nnamecha nse ekekpade. 7Usuk mman Farisi ma mme ekpeb ibed ekedudo sọ. Mmọ ekesuŋ enehede eche Yisọs ma enye emikọkọk owom udọŋọ ke usen Sabad, sia mmọ ekeyeyem mkpọ se mmọ akamade odori eme uyo. 8Ede Yisọs ama ọdiọŋọ ekikere ekid mmọ, ke ntoro enye ete owom odo ubọk ise ekekpade, «Bene, dida mi ke iso efri owom.» Ndien enye ebeene edidaa.
9Yisọs akanade anyin eche mman Farisi ma mme ekpeb ibed, ete mmọ, «Nnyin idiọŋọ ke ede nnen-nen owom ndinam etiti mkpọ ke usen Sabad, inyaŋ idehe inam owom ibak. Nnyin inyaŋ idiọŋọ ke enen inyaŋa uwem owom idehe iwowod. Mfo inyime nte?
10Iduhe owom ekebọrọde eme. Ndien enye akanade eche mfifien mmọ, ete owom odo, «Nyan ubọk fo.» Enye anyan, ndien enye ọbọ ukọk. 11Ede ke idaha mme ekpeb ibed ma mman Farisi okudde mkpọ nken, ekid ama ayad mmọ tutu, mmọ otooŋo atiŋi k'idem mmọ ete, «Nso ke nnyin iminam ma Yisọs?»
Yisọs Emek Mbed Nse Duobeba
12Ke usen ifaŋ ebeide, Yisọs ọwọrọ ke obio akaa mben obod nkedu ọkpọọŋ nyaŋ mbọŋ akam. Etiedo ke efri itroyo ikoro ọbọŋ akam ọnọ Abasi. 13Ke oyo echierede enye okood mfifien mbed nse anyaŋ emek owom duobeba ke otu mmọ; enye emek mmọ ndide Nsaŋa-utom ise. 14Enyiŋ mman Nsaŋa-utom ido ekede, Saimọn emi Yisọs ekoodde Bite ma akpraŋ enyinika ese Andru, ma Yems ma Yọọn, ma Fidip, ma Batodomiu; 15Ma Matio ma Tọmọs ma Yems eyen Afius ma Saimọn, emi enye ekekoodde Sidọd; 16Ma Yudas eyen Yems; ma Yudas emi eketodde obio keriọd emi eke atabde Yisọs ọnọ mkpa.
Yisọs Ekpeb Mkpọ Anyaŋ Ọkọk Udọŋọ
Mt. 4:2-25; Mk. 3:7-12
17Yisọs ma Mbed nse ọsuhọde ke okpukpo edidaa ke itie isọŋ edeeŋide. Do mmọ okud akua ibad mbed nse ewen ma mman owom otode efri itie ke ikpehe ukara Yudia, ma obio Yedusedem, ma mben inyaŋ obio Taire ma obio Sidọn. 18Uwak mman owom amaadi ikop nte Yisọs ekpebde mkpọ. Nyaŋ mmana mbọọ ukọk ke udọŋọ mmọ. Enye ọkọk sọ mman se ndedehe sibidib eketuhọdede. 19Efri mman owom eyem nte mmọ ọtuukde eme man otodo mmọ ọbọ ukọk, sia Yisọs ekesuŋ ọkọk udọŋọ mfifien owom ke akua odudu.
Edidiọŋ
20Ke edo ebeide, Yisọs eche mme mbed nse, anyaŋ ete mmọ,
Abasi emididiọŋ mfo mmanimi ibuenede
sia obio ubọọŋ Abasi enyine mfo.
21Abasi emididiọŋ mfo mman ikoro biọŋ ọdọŋde idaha iken,
sia mfo imi ididia iyuhọ.
Abasi emididiọŋ mfo mman iken ituade eyed idaha iken,
sia mfo imimumua imuam idara.
22Abasi emididiọŋ mfo k'ini mman owom asuade mfo,
eminyaŋ idiaŋade nsaŋa ma mfo, inyaŋ ichọŋọ mfo anyin,
inyaŋ itiŋ ndiọi ikọ idian mfo,
ke ntak mfo imekde ikene min, eyen owom.
23K'ini mkpọ nken etibede ma mfo, itọọrọ ke idadekid inyaŋ idara, sia Abasi eminenehede ikpono mfo ke onyuŋ. Sia mme eta-eta mmọ ekenam sọ ntoro ma mme brọfed ke oyo ediko.
Yisọs Atiŋ Abaaŋade Mfuhọ Ini Isọ
24Ede emididiọk ekese ma mman inyine,
sia mmọ ọbọbọ ọyọhọ ndọŋekid mmọ.
25Emididiọk ekese ma mfo mman ikoro idiade iyuhọ idaha iken,
sia biọŋ emidọdọŋ mfo.
Emididiọk ekese ma mfo mman ikoro imuade idaha iken,
sia mfo imikukud akua mfuhọ.
26Emididiọk ekese ma mfo k'ini mfifien owom atiŋde nti ikọ abaaŋa mfo,
sia nte mme eta-eta mmọ eketiŋde nti mkpọ abaaŋa mme brọfed nsu oworo.
Yisọs Ekpeb Mman Owom Ima Mme Asua Mmọ
Mt. 5:38-48
27Yisọs akaiso ekpeb mkpọ ete, «Se ndọhọde owom ma mfifien mfo se ikpaŋde utọŋ inọ min: Anaa nte mfo ima mme asua mfo, inyaŋ inam nti mkpọ inọ mman se asuade mfo. 28Idọhọ yak Abasi ọdiọŋ mman ikoro osioŋide mfo, inyaŋ ibọŋ akam inọ mman ikoro atiŋde ikọ abiad mfo. 29Owom iyubi fin ke ibaŋ edem keen isuene fin, kanade mbaŋ nko nnọ eme yak enye ọyubi. Owom ibọ fin ọfọŋ ifufuhọ fo, yak mfọdidem fo nnọ eme kọrọ. 30Owom ibeŋe fin mkpọ, nnọ eme; owom ibọ fin mkpọ ke nkan-ubọk, kuyem imaana mbọọ eme. 31Nnam nnọ mman ewen mfifien mkpọ se eyemde mmọ anam ọnọ fin.
32Edieke mfo imade mman ikoro amade mfo ọkpọọŋ, mfo inamke mkpọ se ododde itoro ito owom ntekeen, sia idem mman ikoro ikponoke Abasi ama mman se amade mmọ. 33Edieke mfo inamde nti mkpọ inọ mman ikoro anamde nti mkpọ ọnọ mfo ọkpọọŋ, mfo inamke mkpọ ododde itoro ito owom ntekeen, sia idem mman ikponoke Abasi anam nti mkpọ ọnọ mman ikoro anamde nti mkpọ ọnọ mmọ. 34Edieke mfo ibuọdde mman se mfo ikerede ke mmọ emikukwei mfo ọkuk ọkpọọŋ, mfo inamke mkpọ ododde itoro ito owom ntekeen, sia idem mman ikponoke Abasi ọbuọd sọ mman se anaade nte mmọ, man otodo mmọ amaana ọbọ ọkuk okoro mmọ ekebuọdde mmọ. 35Ede anaa nte mfo ima mme asua mfo inyaŋ inam nti mkpọ inọ mmọ. Mfo ibuọd ọkuk ikiyem mmọ ekwei mfo. Ke mfo inamde nte Abasi eminọnọ mfo akua utib, ndien mfo imiwuwuri ke mmọ ifọn nte akua enyine odudu Abasi. Sia Abasi ọfọn mfọn ma idem mman se anannade ekid ekọm ma mman ibak. 36Anaa mfo inyine mbọm, nte eta mfo ke onyuŋ enyinede mbọm ma mfifien owom.
Kubiad Owom Ewen
Mt. 7:1-5
37Yisọs akaiso ekpeb mkpọ, anyaŋ ete, «Ikitiŋ ikọ idian mman ewen ibe ke mmọ anam edue, mbaak mman ewen iditiŋ sọ ikọ idian mfo ibe ke mfo inam idue. Ikibiom mman ewen ikpe mbaak mman ewen idibiom mfo ikpe. Dahado nọ mman ewen ke idiọk mkpọ mmọ anamde fin, ndien mmọ emi dadahado inọ fin. 38Nọ mman ewen se edede eke mmọ eyemde, ndien omu bọbọ se ofo eyemde. Mmọ emififiak inọ fin ke ọyọhọ ekọm udua, eti-udomo emi mmọ aŋyikde eyehe ọdọŋ keen, ọyọhọ ọduọŋọ! Sia ukem udomo ofo akamade odomo ọnọ mman efen edede akukua ma ekpipraŋ ke mmọ emikama ifiak idomo inọ fin.»
39Ede Yisọs ọnọ mmọ mbuk nken ete, «Owom nnan ikemeke ida owom nnan efen usuŋ. Ke akpanikọ, Mmọ mbummba emiduduọ iduk odu. 40Eyen-ufọk ŋwed ikponke ikan ekpeb mkpọ nse. Ede eyen-ufọk ŋwed iken emi ekpebde efri mkpọ emina nte Ekpeb mkpọ nse.
41Uyem idọhọ mme ufan fo mbaaŋa mme mkpraŋ ndudue nse emi anaade nte nkeŋe mbio. Ede bemiso che akua ndudue emi ofo anamde, emi anaade nte akua ọkpukpọk eto ke anyin fo. 42Ede ndudue ofo ndibe ufan fo, ufan, yak nwam fin nneŋe akpraŋ ndudue fo, k'ini ofo ukua unamke mkpọ ubaaŋa akua ndudue fo kaŋa. Unam ntoro, ede anam mkpọ anyin owom! Bemiso nneŋe ndudue fo, ndien omukakan uwam ufan fo unam mkpọ ubaaŋa akpraŋ ndudue mmọ.
Owom Ada Mfri Eto Ọdiọŋ Eto
Mt. 7:17-20; 12:34-35
43Yisọs akaiso ke ukpeb mkpọ nse, anyaŋ ete, «Eti eto iwumke idiọk mfri. Ke ukem usuŋ ikoro, idiọk eto inyaŋ iwumke eti mfri. 44Owom akama mfri eto ọdiọŋọ eto. Ke mben nwuri, Owom ikemeke iben fik ma osokoro ntata ke ikọd mbara-ekpe. 45Ke ukem usuŋ ikoro, eti owom atiŋ nti ikọ sia ekikere ekid ese ede eti. Idiọk owom anam ndiọi mkpọ sia ekikere ekid ese ede idiọk. Ke ntoro, se owom atiŋde ọwuri utọ ekikere enye enyinede ke ekid ese.
Bọb Ufọk Ke Onyuŋ Itiad Idak Isọŋ
Mt. 7:24-27
46Yisọs akaiso ete, «Nsode mfo ikoodde min ‹Ọbọọŋ, Ọbọọŋ› ede mfo inamke se ndọhọde mfo inam? 47Mme nnanam enye iŋwaŋa mfo se ikene min ebiedde, kpaŋ utọŋ ke ukpeb mkpọ mi, nyaŋ nam mmọ. 48Anaa nte owom eken ọbọbde ufọk. Etibi isọŋ yak otuŋe tutu enye esim itiad idak isọŋ anyaŋ ọbọb ufọk ke onyuŋ itiad ikoro. Ikem ko, K'ini mmuŋ ọtọọde, ikanke inyehe ufọk ikoro iduọk, sia mmọ ama enyine eti mfaŋ-isọŋ. 49Ke ntoro, owom ekedede okopde ukpeb mkpọ mi inyaŋ inamke se ndọhọde, anaa nte owom ikitibike isọŋ yak ọduk ekid nkọ enye esin mfaŋ isọŋ ufọk ise ede ọbọb ke onyuŋ isọŋ. Ekpenede, k'idaha mmuŋ ukuọ ọtọọde eben ufọk ikoro, enye ọduọk ufọk ikoro osio anyaŋ abiad eme mfifien.
Currently Selected:
Luk 6: ITM
Highlight
Share
Copy
Want to have your highlights saved across all your devices? Sign up or sign in
Itu Mbon Uzo Bible by Beyond Translation is licensed under Creative Commons Attribution-ShareAlike 4.0 License.