Maruko 3
3
paka'inava kana kuwaaleng kana marum na lima
(Matay 12.9-14; Luka 6.6-11)
1i Yēsu masalr musavak i waazukan ruma'; i kazu ulra sasa a trau, marum tu lima na saya. 2ulra papida a trau tremakatrakaw mena'u, maranger mena'u kani Yēsu za paka'iyanava za kuwalengan kana katalaulepan na wari nay, zi karuwa kokso kantaw. 3i Yēsu marengay kanizu na kuwaleng za marum tu lima na trau: <<alamu katikezir i ngawayan!>> 4zi kiyumalr kana mapapiya: <<na kireeman kana katalaulepan na wari, nanta kuret mu kemuda kemuret? kemakuda za 'inava na lremak zi za kuwatreng na lremak? venavaaw zi za kemuwatreng za uwavaawan?>>
marapengan mapiya. 5i Yēsu 'ilremes tremeketrek mena'u paliyus, nana tu anger kananni na trau, 'alrana matru'a tu anger nazu. zi marengay kanizu na kuwalreng na trau i intaw: <<lrayatru papatezelr na lima!>> a melrayatr za lima izu na trau mu, mareveliyas 'inava lra na lima. 6nazu na Palisay na trau mupatraran kemay waazukan ruma' mu, payas mazayazayar kana sevang ni Hērodē na trau za kuwadakudayan kima'etrev kani Yēsu, pinatray kantaw.
na zinekalranan i ngaydiran kana danaw
7i Yēsu zi na temakesi muveruk i kazu mukuwa i Galili kana danaw, mulepun na trau kurelrang kantaw. nazu maw na kemay i Galili, Yodaya, 8Yērusalem, Idomay, Yorudan na zinanuman i makakuwaziyu na dare' zi i Taēr zi i dalrep kana Siton na kazekalran zuwa. ini na mulepun na trau zuwa miya'a kani Yēsu maw 'alrana mikiningeran lra tu kinakudayan ni Yēsu. 9kakazuwanan lra na trau, i Yēsu patalru kanantu temakesi penadang za saya tamina veray kantaw, munu ki'etre'etr za trau. 10'alrana i intaw paka'inava lra za kazuwan na kuwaaleng na trau, na kuwaaleng na trau ziya zuwa 'emetre'etra i ngawayan, maranger demikes kantaw. 11nazu na kipalrar na trau a mena'u kantaw, zi mihelrupu kantaw i ngawayan, 'emuy'uy marengay: <<maw u Alrak kana Viruwa i itras!>>
12i Yēsu kemaaluzun patalru kanazu za iauwa marengay pupana za i eman i intaw.
i Yēsu palimi' za papulu' zi zazuwa na sito
(Matay 10.1-4; Luka 6.12-16)
13i Yēsu paseki mukuwa i zenan, tu puwazukaw nantaw niranger na trau i ngawayan. zuwa lra nazu, 14i Yēsu palimi' za papulu' zi zazuwa na trau, a sito kema kanazu, zi marengay ziya kanazu: <<palimi' ku kanmu mu, mukasaya mu kaninku marayas, zi pakarun kanmu mupatraran mukuwa palenaka za vati; 15uri pikezang mu venawi kana palrar.>>
16tu pinalimi' ni Yēsu na papulu' zi zazuwa na trau mu maw: i Simon (tu pungadanay ziya kani Pētēro i Yēsu), 17tu alrak ni Zēbēdē i Yakob zi i waditaw ni Yakob i Yohanē (i Yēsu tu pungadanay ziya kani Banikē, tu pauwayan mu maw <<malemu tu kakuwayanan na trau>>), 18i Antēlē, Filip, Batolomay, Matay, Tomas, tu alrak ni Alefē i Yakob, Tatay, na 'uringetr na sevang i Simon, 19zi i likuzan lra na meniwan kani Yēsu na Iskaliotē na trau i Yoda.
i Yēsu zi i Bēlēzēbu
(Matay 12.22-32; Luka 11.14-23; 12.10)
20a muruma' i Yēsu, mulepun na trau masasalr ziya muwazuk, kemazu lra i intaw zi na temakesi arusay za iniyan za tuki mekan. 21malrazam lra tu niruma'enan ni Yēsu kanini na nirekudayan, mupana maranger penelret kantaw, 'alrana ulra a trau marengay: <<penu'ang lra i intaw!>>
22ulra papida na kemay i Yērusalem zuwa na sinsi kana Sēsiyo mu marengay: <<kipalrar kani Bēlēzēbu i intaw! kuretalrima kana yawan na palrar venawi kana palrar i intaw!>>
23tu vinayaw pazuwa i ngawayan nazu na trau ni Yēsu, paruwalru marengay kanazu: <<na satang kemuda venawi kana satang ziyamaw? 24saya na kanatal nu maziyakuzikul i intaw mu, izu na kanatal mu 'azi katiyakezir; 25na saruma'enan i savak nu maziyakuzikul mu, izu na saruma'enan 'azika'azi mutepi'. 26nu kemani mu, nu maziyakuzikul tu kanatal na satang mu, 'azi katiyakezir i intaw, 'azika'azi matrepu i likuzan.
27<<iniyan za trau maruwa musavak kanantu ruma' na samuray, 'emaraw kanantu piniemanan; 'azika'azi iyanguwayan demadikus kanizu na samuray zi kararuwa lra meraperap melak kanantu ruma' i intaw.
28<<penatezelra ku marengay kanmu, tu pinamelriyan ziya na trau zi na semiri na ngay ziya mu karuwa kilapus peniya; 29mawmu na semiri kana Vangesar Lu'em na trau mu 'azi karuwa kilapus munayun, 'alrana tu pinamelri maw munayun na pinamelriyan.>> (30marengay i Yēsu kanini na ngay mu 'alrana ulra a trau marengay: <<i intaw maw na kipalrar.>>)
i tainataw zi i waditaw ni Yēsu
(Matay 12.46-50; Luka 8.19-21)
31a azu, i tainataw zi na waditaw ni Yēsu zuwa lra; matikezir i patraran nazu, pakarun za trau marengay kani Yēsu, marengay za maranger kirepana'u kantaw nazu. 32ulra a salepun na trau kemayan i paliyuliyus kani Yēsu; marengay kantaw nazu: <<uy, i taina zi na wadiyu ulra i patraran, maaya' kannu a!>>
33marengay i Yēsu: <<i eman i inani? i eman nanku wadiyan?>> 34menau' i intaw kana kazu kemayan paliyus kantaw na trau, marengay: <<na'uwi i inmu, nanni na trau mu maw i inani, ninku wadiyan! 35na miturus ziya kanantu nirangeran na Viruwa i itras na trau mu maw nanku wadadiyan, zi i inani.>>
Currently Selected:
Maruko 3: TPN
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023