Matay 27
27
tuluzanay kani Pilato i Yēsu
(Maruko 15.1; Luka 23.1-2; Yohanē 18.28-32)
1a semavalr, na ma'izang na rahan mapiya zi na ciyoro i Yodaya mazayazayar, piyanatray kani Yēsu. 2tu dadikusaw i Yēsu nazu, zakalraw murung, tuluzanay kana sotok na Roma kani Pilato.
kiyanatrayan ni Yoda
(Sito 1.18-19)
3na meniwan kani Yēsu i Yoda mena'u kani Yēsu kipupamelri, zi palikuz za anger lra, melak kana makatelun ginpiya mukuwa pareveliyasa kana ma'izang na rahan zi na ciyoro, 4marengay: <<pamelri ku lra, meniwan kana uwavaawan na 'azi mipinamelriyan!>> temuvang nazu: <<maw nannu lremak izu, kireeman kaniyam za eman?>>
5tu 'atelranay na himpiya kana vangesar ruma' i savak ni Yoda, zi mupatraran, mutilu' miyangula lra.
6na ma'izang na rahan tu azukaw na himpiya, marengay: <<ini himpiya za dara', tra'anay kana sasunanan na talrev mu pamelri za kuret.>> 7na pinazayar mu, mapaturus nazu za melak kanini na himpiya tremima' kanantu dare' na demadaway kana ngelrulr, putu tratrevelran kana sizumayan na trau. 8mawna kemani, palru harem na trau kema kanini na dare' za <<'uma za dara'>>.
9tu pinakalrangan i ini na lremak mu pula'esi lra kanantu nirengay na patralritralri i Yēlimiya: <<melak za makatelun ginpiya nazu, mawna Iseraēl na trau mapaturus muramawan kantaw na puwatrima'an, tremima' tu dare' na demadaway kana ngelrulr; 10ini mu initurus kanantu iyaseratr ni Luzu kaninku.>>
kisayvang i ngawayan kani Pilato
(Maruko 15.2-5; Luka 23.3-5; Yohanē 18.33-38)
11i Yēsu matikezir kana sotok i ngawayan, kiyumalr kantaw na sotok: <<maw u yawan kana Yodaya na trau ziyamaw?>>
temuvang i Yēsu: <<ninnu nirengay i ini.>> 12tu kokso kantaw na ma'izang na rahan zi na ciyoro, 'azi temuvang i intaw.
13kemazu zi marengay kantaw i Pilato: <<'azi u kinger sakuwazu tu kokso na lremak kannu ziyamaw?>>
14i Yēsu kemazu 'azi temuvang za sasaya za ngay; salaw pakumelri i Pilato.
kisayvang za kiyanatrayan
(Maruko 5.6-15; Luka 23.13-25; Yohanē 18.39--19.16)
15nu meredek ziya kana palalavat na wariyan mu, na sotok paturus kana kakuwayanan muramawan kana zinekalranan nantu niranger nazu meretra' za sasa na inimeng. 16a azu mu, penauwa ulra a sasa salaw mingadan a inimeng mu i [Yēsu] Baraba. 17semeneng, a muwaazuk na zinekalranan mu, kiyumalr i Pilato kanazu: <<maranger mu kaninku za meretra' puveruk kani eman? i [Yēsu] Baraba nay? nu 'azi mu izu na Kiristo Yēsu na kinakuwa?>> 18patulre'ay malrazam i Pilato kanazu za maw masepelr zi tu verayanay i Yēsu kantaw.
19i Pilato kazu i hoing a sayvang mu, tu 'azin pakarun za trau zuwa marengaya kantaw: <<izu na 'azi mipamelriyan tu lremak, amanan na kemakuda i inu, 'alrana a karauv ku tiya' salaw ku maulepan kantaw.>>
20na ma'izang na rahan zi na ciyoro pusuwasuwan kana zinekalranan, zi kiyami nazu kani Pilato za meretra' puveruk kani Baraba, pinatrayaw i Yēsu. 21kiyumalr na sotok kanazu: <<kananni na zazuwa mu, maranger mu kaninku za meretra' puveruk kani eman awa?>>
temuvang nazu: <<i Baraba!>>
22kiyumalr i Pilato kanazu: <<nu kemazu mu, kuwadakuda ku kani Kiristo Yēsu na kinuwa ziyamaw?>> 'emuy'uy nazu mapapiya: <<trehetrehan i ziyuzika i intaw!>>
23kiyumalr i Pilato: <<a eman nantu kinakuda na kuwatreng ziyamaw?>> puwapuwa kematamuni 'emuy'uy nazu: <<trehetrehan i ziyuzika i intaw!>>
24mena'u i Pilato kanizu na nirekudayan, malrazam za nu masasalr marengay lra mu iniyan za pauwayan, muveliyas kaulra kakezeng za vavutrungan. zi melak za zanum kazu i ngawayan kana zinekalranan muras za lima, marengay: <<pudadara' kanini na trau mu, na pinamelriyan iniyan kaninku, pikazayu i inmu!>>
25mukasa marengay na zinekalranan: <<tu dara' na kiyam kemay kaniyam zi naniyam temuwan na mikaza!>>
26kemazu zi i Pilato meretra' puveruk kani Baraba veray kanazu, zi semeratr ziya melrepit lra kani Yēsu, zi tuluzanay kana trau mukuwa tremehetreha i ziyuzika.
na hitay temariyaeman kani Yēsu
(Maruko 15.16-20; Yohanē 9.2-3)
27na hitay ni Pilato tu urungaw i Yēsu mukuwa kana sotokfu; muwazuk mapiya na hitay kantaw i paliyus. 28melapus kanantu kavang ni Yēsu nazu, tu pukavangay kana zemiyar na lrungpaw, 29zi 'emupiz ziya za saya kana su'asu'ar za kavung pukavungay i intaw, melak za saya kana 'uway meretra' kanantu lima na tarawalran, kemazu zi malrituzu i ngawayan temariyaeman kantaw, marengay: <<na yawan i Yodaya na trau banzay!>> 30temama ziya nazu kantaw, melak kana 'uway semelrepit kanantu tranguru'. 31piya lra temariyaeman nazu mu, tu lapusay kanantu lrungpaw i zazek, zi tu pukavangay ziya kanantu kavang i intaw, kemazu zi murung kantaw pupatraran mukuwa tremehetreha i ziyuzika.
i Yēsu kitrehetreh i ziyuzika
(Maruko 15.21-32; Luka 23.26-43; Yohanē 19.17-27)
32a mupatraran nazu mu, maretrevung za sasa a Kulinay na trau, mingadan kani Simon, zi pa'isel kantaw semangalr kanantu ziyuzika ni Yēsu. 33mukuwa za saya kinazuwan nazu, mingadan za Golgota, tu pauwayan mu mawna <<ukaukakan na 'uma>>. 34nazu melak kana zinaulan kana 'apelrin na 'apedu na kutra patrekel kani Yēsu; atalram i Yēsu mu, mawmu 'azi muwai tremekel.
35kemazu zi, tu trehetrehanay i Yēsu kana ziyuzika i itras nazu, zi karaivuivus zi tu paniniyaw nantu kavang lra, 36zi kemayan i kazu milran kantaw. 37nazu kazu kanantu tranguru' makatras puwa za saya kampang za pupamelriyan, vinavalrayan za: <<ini maw i Yēsu, yawan i Yodaya na trau.>> 38nazu tu pakurelranganay ziya tremehetreh i itras kana ziyuzika a zazuwa na malemu kuwaatrengan na trau, na sasa kazu i tarawalran kantaw, na sasa kazu i tarawiri kantaw.
39na makalrang i kazu na trau mu semiri kani Yēsu, malingaling, 40marengay: <<inu na maranger mivas kana vangesar ruma', zi teluwa wariyan aasalr parahan mu! anu maw u Alrak na Viruwa i itras, venaawa u kannu i inu, ulusu kemay kana ziyuzika i itras a!>>
41na ma'izang na rahan, na sinsi kana Sēsiyo, zi na ciyoro mararesan karalikeliked kantaw, marengay: 42<<venaaw lra kana trau i intaw, mawmu 'azi pakavaaw kantaw i intaw! i intaw amelri tu yawan na Iseraēl ziyamaw? harem nu mulusu kemay i ziyuzika i itras mu, pakutatena' mi kantaw! 43kuretalrima i intaw kana Viruwa i itras, nintaw ku Alrak na Viruwa i itras kema; ai mu, harem mena'uwa ta kana Viruwa i itras zazuwa venaawa kantaw nay!>>
44arusay na mararesan itrehetreh i ziyuzika na malemu kuwaatrengan na trau mu mararesan semiri maselru kantaw.
kininatrayan ni Yēsu
(Maruko 15.33-41; Luka 23.44-49; Yohanē 19.28-30)
45a kare'alriyan mu, 'emaremeng i dare' peniya, kararuwa za teluwa tuki tu kasawariyan. 46palru lra za kararuwa teluwa tuki, i Yēsu kematamuni 'emuy'uy: <<Ēli! Ēli! lramasapaketani?>> tu pauwayan maw: <<nanku Viruwa i itras, nanku Viruwa i itras, kemuda zi 'ematelr u kaninku?>>
47na matikezir i trapingiran na trau, ulra papida a kinger lra, marengay: <<i intaw venavina kani Ēliya nay!>> 48ulra a sasa payas pavekas mukuwa, melaka za saya kana takumulr, zeremanay kana 'aresem na kutra, zi tu vetevetanay kana 'uway i itras, patrekel kantaw.
49na zuma na trau marengay: <<ngangara, mena'uwa ta kani Ēliya za zazuwa nay venaawa kantaw!>>
50i Yēsu masasalr kematamuni 'emuy'uy paresan, zi mureput lra na iyaengaz.
51a azu mu, na ipalingez na inuwan kana vangesar ruma' mu, kemay i itras palru i lusu musilra' parekazuwa. mungunin na dare', mupapisa' murengatr na varasa', 52na trevelran mahuwahu mutruwalr lra, kazuwan na minanatray lra na vangesar sito marevaaw lra. 53muwaday lra kana trevelran nazu, kazu za marevaaw lra i Yēsu i likuzan mu musavak kana vangesar kazekalran; i kazu ulra kazuwan na trau na mena'u kanazu lra.
54na milran kani Yēsu na ma'izang kana hitay zi na hitay mena'u lra mengunin zi na mupana ziya na lremak, salaw makaud mapapiya, marengay: <<i intaw tatena' maw Alrak na Viruwa i itras!>>
55i kazu ulra ziyan kazuwan na vavayan kemay i dawilr mena'una'u, nazu maw kemay Galili kurelrang kani Yēsu kikarun kantaw. 56kanazu i savak ulra na Motara i Maliya, Maliya i tainataw ni Yakob zi Yosēf, zi i tainataw ni Zēbēdē tu alrak na zazuwa.
na iyatrevelr kani Yēsu
(Maruko 15.42-47; Luka 23.50-56; Yohanē 19.38-42)
57a karaurauv mu, ulra a sasa na miyaeman i Alimatay zuwa lra; mingadan kani Yosēf, a maw temakesi ni Yēsu. 58mukuwa kirepana'uwa kani Pilato i intaw, kiyami za mepetr kanantu zazek ni Yēsu; zi i Pilato patalru veray kantaw kanantu zazek ni Yēsu. 59kituluz lra kana zazek i Yosēf, liputraw kana mukirungetr na muwa na inuwan, 60tra'anay kanantu trevelran i intaw; ini na trevelran maw nintaw kinerutr i danapan a hareman lra. zi tu kulukulungaw ziya a ma'izang na varasa', metrav kanantu sulray na trevelran, zi muveruk. 61na Motara i Maliya zi na zuma a sasa i Maliya kemayan kana trevelran i ngawayan, milran i kazu.
na ki'alra'alra kana trevelran
62a kazuwa wari, maw a kapadangan na wari za pakalikuzan na saya wari, na ma'izang na rahan zi na Palisay na trau mukasa mukuwa kirepana'uwa kani Pilato, marengay: 63<<tayhin, patuanger mi kanizu na mavetra' na trau a vaaw ziya mu marengay lra za: <teluwa wariyan mu uri marevaaw ku kema.> 64semeneng, 'alrazi seratri i inu za pakirungetr milran kana trevelran, palru za katelu wariyan, zi 'aziya maruwa tremakaw kantaw nantu temakesi, zi mukuwa marengaya za trau <i intaw marevaaw lra kemay kana minatray>, na kemani na mavetra' na ngay parakuwatreng kana pakangawayan!>>
65i Pilato kema marengay kanazu: <<pilralrangu na ki'alra'alra mukuwa i inmu, rukezangu i inmu, patulre'ay milan kana trevelran!>>
66kemazu zi mukuwa lra nazu, kazu kana varasa' i makatras pazeketr za valray, metrav kana sulray na trevelran, vilinaw na ki'alra'alra milran.
Currently Selected:
Matay 27: TPN
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023
Matay 27
27
tuluzanay kani Pilato i Yēsu
(Maruko 15.1; Luka 23.1-2; Yohanē 18.28-32)
1a semavalr, na ma'izang na rahan mapiya zi na ciyoro i Yodaya mazayazayar, piyanatray kani Yēsu. 2tu dadikusaw i Yēsu nazu, zakalraw murung, tuluzanay kana sotok na Roma kani Pilato.
kiyanatrayan ni Yoda
(Sito 1.18-19)
3na meniwan kani Yēsu i Yoda mena'u kani Yēsu kipupamelri, zi palikuz za anger lra, melak kana makatelun ginpiya mukuwa pareveliyasa kana ma'izang na rahan zi na ciyoro, 4marengay: <<pamelri ku lra, meniwan kana uwavaawan na 'azi mipinamelriyan!>> temuvang nazu: <<maw nannu lremak izu, kireeman kaniyam za eman?>>
5tu 'atelranay na himpiya kana vangesar ruma' i savak ni Yoda, zi mupatraran, mutilu' miyangula lra.
6na ma'izang na rahan tu azukaw na himpiya, marengay: <<ini himpiya za dara', tra'anay kana sasunanan na talrev mu pamelri za kuret.>> 7na pinazayar mu, mapaturus nazu za melak kanini na himpiya tremima' kanantu dare' na demadaway kana ngelrulr, putu tratrevelran kana sizumayan na trau. 8mawna kemani, palru harem na trau kema kanini na dare' za <<'uma za dara'>>.
9tu pinakalrangan i ini na lremak mu pula'esi lra kanantu nirengay na patralritralri i Yēlimiya: <<melak za makatelun ginpiya nazu, mawna Iseraēl na trau mapaturus muramawan kantaw na puwatrima'an, tremima' tu dare' na demadaway kana ngelrulr; 10ini mu initurus kanantu iyaseratr ni Luzu kaninku.>>
kisayvang i ngawayan kani Pilato
(Maruko 15.2-5; Luka 23.3-5; Yohanē 18.33-38)
11i Yēsu matikezir kana sotok i ngawayan, kiyumalr kantaw na sotok: <<maw u yawan kana Yodaya na trau ziyamaw?>>
temuvang i Yēsu: <<ninnu nirengay i ini.>> 12tu kokso kantaw na ma'izang na rahan zi na ciyoro, 'azi temuvang i intaw.
13kemazu zi marengay kantaw i Pilato: <<'azi u kinger sakuwazu tu kokso na lremak kannu ziyamaw?>>
14i Yēsu kemazu 'azi temuvang za sasaya za ngay; salaw pakumelri i Pilato.
kisayvang za kiyanatrayan
(Maruko 5.6-15; Luka 23.13-25; Yohanē 18.39--19.16)
15nu meredek ziya kana palalavat na wariyan mu, na sotok paturus kana kakuwayanan muramawan kana zinekalranan nantu niranger nazu meretra' za sasa na inimeng. 16a azu mu, penauwa ulra a sasa salaw mingadan a inimeng mu i [Yēsu] Baraba. 17semeneng, a muwaazuk na zinekalranan mu, kiyumalr i Pilato kanazu: <<maranger mu kaninku za meretra' puveruk kani eman? i [Yēsu] Baraba nay? nu 'azi mu izu na Kiristo Yēsu na kinakuwa?>> 18patulre'ay malrazam i Pilato kanazu za maw masepelr zi tu verayanay i Yēsu kantaw.
19i Pilato kazu i hoing a sayvang mu, tu 'azin pakarun za trau zuwa marengaya kantaw: <<izu na 'azi mipamelriyan tu lremak, amanan na kemakuda i inu, 'alrana a karauv ku tiya' salaw ku maulepan kantaw.>>
20na ma'izang na rahan zi na ciyoro pusuwasuwan kana zinekalranan, zi kiyami nazu kani Pilato za meretra' puveruk kani Baraba, pinatrayaw i Yēsu. 21kiyumalr na sotok kanazu: <<kananni na zazuwa mu, maranger mu kaninku za meretra' puveruk kani eman awa?>>
temuvang nazu: <<i Baraba!>>
22kiyumalr i Pilato kanazu: <<nu kemazu mu, kuwadakuda ku kani Kiristo Yēsu na kinuwa ziyamaw?>> 'emuy'uy nazu mapapiya: <<trehetrehan i ziyuzika i intaw!>>
23kiyumalr i Pilato: <<a eman nantu kinakuda na kuwatreng ziyamaw?>> puwapuwa kematamuni 'emuy'uy nazu: <<trehetrehan i ziyuzika i intaw!>>
24mena'u i Pilato kanizu na nirekudayan, malrazam za nu masasalr marengay lra mu iniyan za pauwayan, muveliyas kaulra kakezeng za vavutrungan. zi melak za zanum kazu i ngawayan kana zinekalranan muras za lima, marengay: <<pudadara' kanini na trau mu, na pinamelriyan iniyan kaninku, pikazayu i inmu!>>
25mukasa marengay na zinekalranan: <<tu dara' na kiyam kemay kaniyam zi naniyam temuwan na mikaza!>>
26kemazu zi i Pilato meretra' puveruk kani Baraba veray kanazu, zi semeratr ziya melrepit lra kani Yēsu, zi tuluzanay kana trau mukuwa tremehetreha i ziyuzika.
na hitay temariyaeman kani Yēsu
(Maruko 15.16-20; Yohanē 9.2-3)
27na hitay ni Pilato tu urungaw i Yēsu mukuwa kana sotokfu; muwazuk mapiya na hitay kantaw i paliyus. 28melapus kanantu kavang ni Yēsu nazu, tu pukavangay kana zemiyar na lrungpaw, 29zi 'emupiz ziya za saya kana su'asu'ar za kavung pukavungay i intaw, melak za saya kana 'uway meretra' kanantu lima na tarawalran, kemazu zi malrituzu i ngawayan temariyaeman kantaw, marengay: <<na yawan i Yodaya na trau banzay!>> 30temama ziya nazu kantaw, melak kana 'uway semelrepit kanantu tranguru'. 31piya lra temariyaeman nazu mu, tu lapusay kanantu lrungpaw i zazek, zi tu pukavangay ziya kanantu kavang i intaw, kemazu zi murung kantaw pupatraran mukuwa tremehetreha i ziyuzika.
i Yēsu kitrehetreh i ziyuzika
(Maruko 15.21-32; Luka 23.26-43; Yohanē 19.17-27)
32a mupatraran nazu mu, maretrevung za sasa a Kulinay na trau, mingadan kani Simon, zi pa'isel kantaw semangalr kanantu ziyuzika ni Yēsu. 33mukuwa za saya kinazuwan nazu, mingadan za Golgota, tu pauwayan mu mawna <<ukaukakan na 'uma>>. 34nazu melak kana zinaulan kana 'apelrin na 'apedu na kutra patrekel kani Yēsu; atalram i Yēsu mu, mawmu 'azi muwai tremekel.
35kemazu zi, tu trehetrehanay i Yēsu kana ziyuzika i itras nazu, zi karaivuivus zi tu paniniyaw nantu kavang lra, 36zi kemayan i kazu milran kantaw. 37nazu kazu kanantu tranguru' makatras puwa za saya kampang za pupamelriyan, vinavalrayan za: <<ini maw i Yēsu, yawan i Yodaya na trau.>> 38nazu tu pakurelranganay ziya tremehetreh i itras kana ziyuzika a zazuwa na malemu kuwaatrengan na trau, na sasa kazu i tarawalran kantaw, na sasa kazu i tarawiri kantaw.
39na makalrang i kazu na trau mu semiri kani Yēsu, malingaling, 40marengay: <<inu na maranger mivas kana vangesar ruma', zi teluwa wariyan aasalr parahan mu! anu maw u Alrak na Viruwa i itras, venaawa u kannu i inu, ulusu kemay kana ziyuzika i itras a!>>
41na ma'izang na rahan, na sinsi kana Sēsiyo, zi na ciyoro mararesan karalikeliked kantaw, marengay: 42<<venaaw lra kana trau i intaw, mawmu 'azi pakavaaw kantaw i intaw! i intaw amelri tu yawan na Iseraēl ziyamaw? harem nu mulusu kemay i ziyuzika i itras mu, pakutatena' mi kantaw! 43kuretalrima i intaw kana Viruwa i itras, nintaw ku Alrak na Viruwa i itras kema; ai mu, harem mena'uwa ta kana Viruwa i itras zazuwa venaawa kantaw nay!>>
44arusay na mararesan itrehetreh i ziyuzika na malemu kuwaatrengan na trau mu mararesan semiri maselru kantaw.
kininatrayan ni Yēsu
(Maruko 15.33-41; Luka 23.44-49; Yohanē 19.28-30)
45a kare'alriyan mu, 'emaremeng i dare' peniya, kararuwa za teluwa tuki tu kasawariyan. 46palru lra za kararuwa teluwa tuki, i Yēsu kematamuni 'emuy'uy: <<Ēli! Ēli! lramasapaketani?>> tu pauwayan maw: <<nanku Viruwa i itras, nanku Viruwa i itras, kemuda zi 'ematelr u kaninku?>>
47na matikezir i trapingiran na trau, ulra papida a kinger lra, marengay: <<i intaw venavina kani Ēliya nay!>> 48ulra a sasa payas pavekas mukuwa, melaka za saya kana takumulr, zeremanay kana 'aresem na kutra, zi tu vetevetanay kana 'uway i itras, patrekel kantaw.
49na zuma na trau marengay: <<ngangara, mena'uwa ta kani Ēliya za zazuwa nay venaawa kantaw!>>
50i Yēsu masasalr kematamuni 'emuy'uy paresan, zi mureput lra na iyaengaz.
51a azu mu, na ipalingez na inuwan kana vangesar ruma' mu, kemay i itras palru i lusu musilra' parekazuwa. mungunin na dare', mupapisa' murengatr na varasa', 52na trevelran mahuwahu mutruwalr lra, kazuwan na minanatray lra na vangesar sito marevaaw lra. 53muwaday lra kana trevelran nazu, kazu za marevaaw lra i Yēsu i likuzan mu musavak kana vangesar kazekalran; i kazu ulra kazuwan na trau na mena'u kanazu lra.
54na milran kani Yēsu na ma'izang kana hitay zi na hitay mena'u lra mengunin zi na mupana ziya na lremak, salaw makaud mapapiya, marengay: <<i intaw tatena' maw Alrak na Viruwa i itras!>>
55i kazu ulra ziyan kazuwan na vavayan kemay i dawilr mena'una'u, nazu maw kemay Galili kurelrang kani Yēsu kikarun kantaw. 56kanazu i savak ulra na Motara i Maliya, Maliya i tainataw ni Yakob zi Yosēf, zi i tainataw ni Zēbēdē tu alrak na zazuwa.
na iyatrevelr kani Yēsu
(Maruko 15.42-47; Luka 23.50-56; Yohanē 19.38-42)
57a karaurauv mu, ulra a sasa na miyaeman i Alimatay zuwa lra; mingadan kani Yosēf, a maw temakesi ni Yēsu. 58mukuwa kirepana'uwa kani Pilato i intaw, kiyami za mepetr kanantu zazek ni Yēsu; zi i Pilato patalru veray kantaw kanantu zazek ni Yēsu. 59kituluz lra kana zazek i Yosēf, liputraw kana mukirungetr na muwa na inuwan, 60tra'anay kanantu trevelran i intaw; ini na trevelran maw nintaw kinerutr i danapan a hareman lra. zi tu kulukulungaw ziya a ma'izang na varasa', metrav kanantu sulray na trevelran, zi muveruk. 61na Motara i Maliya zi na zuma a sasa i Maliya kemayan kana trevelran i ngawayan, milran i kazu.
na ki'alra'alra kana trevelran
62a kazuwa wari, maw a kapadangan na wari za pakalikuzan na saya wari, na ma'izang na rahan zi na Palisay na trau mukasa mukuwa kirepana'uwa kani Pilato, marengay: 63<<tayhin, patuanger mi kanizu na mavetra' na trau a vaaw ziya mu marengay lra za: <teluwa wariyan mu uri marevaaw ku kema.> 64semeneng, 'alrazi seratri i inu za pakirungetr milran kana trevelran, palru za katelu wariyan, zi 'aziya maruwa tremakaw kantaw nantu temakesi, zi mukuwa marengaya za trau <i intaw marevaaw lra kemay kana minatray>, na kemani na mavetra' na ngay parakuwatreng kana pakangawayan!>>
65i Pilato kema marengay kanazu: <<pilralrangu na ki'alra'alra mukuwa i inmu, rukezangu i inmu, patulre'ay milan kana trevelran!>>
66kemazu zi mukuwa lra nazu, kazu kana varasa' i makatras pazeketr za valray, metrav kana sulray na trevelran, vilinaw na ki'alra'alra milran.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2023