YouVersion Logo
Search Icon

Yohanē 12

12
kida'us i Bētaniya
(Matay 26.6-13; Maruko 14.3-9)
1pakangawayan za nanema wari kana palalavat na wariyan mu, mukuwa lra i Bētaniya i Yēsu, mawna kinazuwan ni Lazaru (i Yēsu kazu lra i kani parevaaw kani Lazaru). 2ulra a trau kazu i kazu penadang za keraviyan ni Yēsu; i Maruta puwalrang temara, i Lazaru zi na zuma na lavang mukasa kani Yēsu mekan. 3a azu, i Maliya murung za sadalilran a salaw pazangal na narudo a ulringulr na lrawlraw, 'ilrayanay kanantu kuy ni Yēsu, zi tu itrulay kanantu 'arevu; salaw ulringulr i savak kana ruma'. 4a sasa na temakesi ni Yēsu, mawna uri naniwan kantaw i Iskaliotē na trau i Yoda, marengay: 5<<kemuda zi 'azi melak kanini na ulringulr na lrawlraw mukuwa meniwana za teluwa leman ginpiya panini kana kalramalraman na trau ziyamaw?>> 6marengay i intaw kanini na ngay, amelri tatena' za mulraman kana kalramalraman na trau, 'alrana maw na male'es i intaw; demadikes kana paisu i intaw, marayas tremakaw kana inukasayan na paisu.
7mawmu marengay i Yēsu: <<kalrawalrawai lra i intaw! ini mu tu iyavilin za muramawan kananku uwatrevelran na wari. 8marayas ulra na kalramalraman na trau mukasa kanmu, mawmu 'azi mu marayas mukasa kaninku.>>
na piyanatray kani Lazaru za inulrek na kiniyaanger
9a mulepun na Yodaya na trau kinger za kazu i Bētaniya i Yēsu, zi mukuwa i kazu. 'azi mawmau muramawan kani Yēsu zi mukuwa, kemazu maranger mena'u kanantu pinarevaaw ni Yēsu kemay kana minatray i Lazaru. 10mawna kemani, na ma'izang na rahan maranganger pukasayaw pinatray i Lazaru. 11'alrana kazuwan na Yodaya na trau muramawan kanantu nirekudayan zi kiruwaday kanazu, pakutatena' lra kani Yēsu.
milihu musavak i Yērusalem
(Matay 21.1-11; Maruko 11.1-11; Luka 19.28-40)
12kazuwa wari, mulepun na mukuwa i Yērusalem kurelranga kana semasaharan na wariyan na trau kinger kani Yēsu za auwa i kazekalran. 13kemazu zi nazu melak kana sa'az na 'atamur mupatraran mukuwa kiyatrevunga kantaw, kasemangalan kematamuni marengay: <<pulihu kana Viruwa i itras! kiyalriman kana Viruwa i itras veray za ka'inavayan kanizu na pakalrang kanantu ngadan ni Luzu zi zuwa! kiyalriman kana Viruwa i itras veray za ka'inavayan kana yawan i Iseraēl!>> 14atrevung i Yēsu za saya makiteng na rova, muitras, penauwa kamawan kana vinavalrayan i Sēsiyo:
15na lralrak kana kazekalran i Sion a,
ikakaud.
na'uwi a, nanmu yawan
muitras za makiteng na rova zuwa lra!
16a maw ziya, tu temakesi 'azi malrazam kanantu pauwayan kanini na lremak, palru za kipulihu i Yēsu i likuzan lra zi paranger kanantu vati i Sēsiyo za mararengay kantaw, pawnung kemazu miturus na trau kemakuda lra.
17a venavina i Yēsu kani Lazaru, parevaaw kantaw kemay kana minatray kemakawang mupana i trevelran mu, na kazu kurekasa kani Yēsu izu na lepun na trau kanantu nina'uwan tu palenakanay lra. 18kazuwan na trau 'alrana kinger kantaw za pupana kanini na karepalripalri mu, mukuwa kiyatrevunga kantaw mapapiya. 19na Palisay na trau mazayazayar: <<tatena' ta lra iniyan za sayasaya za kinikarun; na'uwi, i punapunan mukuwa kurelranga kantaw lra mapiya!>>
kiyami za kirepana'u kani Yēsu na Gilisiya na trau
20kana semasaharan na wariyan, na mukuwa i Yērusalem semungala na trau i savakan mu ulra na Gilisiya na trau. 21nazu zuwa kirepana'uwa kana Galili i Bētsayta na trau i Filip, kiyami kantaw: <<sinsi, maranger mi kirepana'u kani Yēsu.>>
22i Filip mukuwa marengaya kani Antēlē, marelrang zazuwa mukuwa marengaya kani Yēsu. 23marengay i Yēsu: <<na Alrak na trau kipulihu na wari meredek lra. 24penazangala ku marenagay kanmu, saya na emi nu 'azi mutani i dare' zi minatray, maw kemazu sasaya; nu minatray lra, zi temelriyu sazu za emi. 25izu na lraman kanantu uwavaawan mu, uwalremes tu uwavaawan; na muwai gisē kanantu uwavaawan i punapunan mu, muveliyas za waepetr kanini na uwavaawan palru munayun. 26i eman na kiyakarun kaninku, zi kuwarelrang kaninku; nu kazu ku i iyan, ku pakarunan mu kaazu i kazu. izu na kiyakarun kaninku na trau mu, i Amalri 'azika'azi kemapazangal mena'u kantaw.>>
marengay i Yēsu kanantu kiyanatrayan
27<<mavangavang ku anger harem, marengaya ku za eman zi ka'inava? kiyami ku kani Amalri za kivaaw kiruwaday kanini na tuki ziyamaw? mawmu muramawan ku kanini zi zuwa i kani, kaalrang kanini na kaulepan na tuki. 28Ama a, kiyalriman kannu pulihu kanannu ngadan!>>
a azu, ulra a lrengaw kemay i itras mulusu, marengay: <<pulihu ku lra kananku ngadan! aasalr ziya pulihu!>>
29na matikezir i kazu na zinekalranan kinger kanini na lrengaw, zi marengay: <<zemazerung lra!>>
ulra zuma a trau marengay: <<ulra a tēnsi kimazazayar kantaw!>>
30mawmu marengay i Yēsu kanazu: <<ini na lrengaw amelri muramawan kaninku, a maw na muramawan kanmu zi mupana. 31kisayvangen ini na punapunan harem; harem na demadikes i punapunan paputanien. 32a pinuitras ku kemay dare' mu, kakezeng ku kana tratrautrau ziyan zuwa muravaka kaninku.>> (33ini tu ngay maw mararengay kantaw za uri kuwadakuda minatray.)
34temuvang na zinekalranan: <<nanta kuret marengay kanta, i Kiristo maw vaaw kazu munayun; kemuda zi marengay u kana Alrak na trau 'azika'azi pinuitras? i eman ini na Alrak na trau?>>
35marengay i Yēsu: <<na senan 'azi lra kasawariyan i savakan kanmu, nu kazu ziya na senan patrutruwa mu kemakawang, munu elepaw mu na 'aremengan, 'alrana kemakawang i 'aremengan na trau mu 'azi malrazam za piyaiyan i intaw. 36nu kazu ziya na senan mu pakutatena' kurelrang kana senan, maruwaya mu mutu semenan na trau.>>
i Yodaya na trau kanantu 'azi pakutatena'an
a piya marengay kananni na ngay, i Yēsu uwaveruk kirewaday kanazu, kirevavulri. 37ara pupana i intaw za sazu a karepalripalri i ngawayan kanazu, 'azi ziya pakutatena' kantaw nazu. 38ini mu pula'esi kanantu nirengay lra na patralritralri i Isaya:
Luzu a, ulra i eman na pakutatena' kananiyam ipalenak na vati?
tu kezang ni Luzu pakurenana'u kani eman?
39tu 'aziyan pakutatena' nazu tu pauwayan, marengay lra i Isaya:
40na Viruwa i itras tu pakavutri'aw tu matra lra nazu,
paka'ulidaw lra tu lrazaman i anger nazu,
munu mena'u tu matra nazu,
marulrazam i anger.
semeneng marengay na Viruwa i itras: 'azi marepapiles zuwa kaninku nazu,
kipaka'inava nazu kaninku.
41i Isaya marengay kananni na ngay mu 'alrana maw mena'u lra i intaw kanantu lihu ni Yēsu, kema marengay kantaw.
42ara kemaniya mu, na yawan i Yodaya na trau i savakan ulra kazuwan na pakutatena' kani Yēsu, 'alrana makaud kana Palisay na trau, makaud pakanumaw i ngawayan kana trau, munu kiverelrang pupatraran kana uwaazukan ruma'. 43sahar kipuitras kana trau nazu marapasalaw sahar kanantu ipuitras na Viruwa i itras.
na ngay ni Yēsu sasayvang kana trau
44kematamuni marengay i Yēsu: <<na pakutatena' kaninku mu, amelri mawmau pakutena' kaninku, kemazu maw pakutatena' kanizu na pazuwa kaninku. 45na mena'u kaninku mu, kemazu mawna mena'u kanizu na pazuwa kaninku. 46mutu senan ku, zuwa i punapunan, muramawan kana pakutatena' ziya kaninku na trau mu 'aziya kazu i 'aremengan. 47izu na kinger kananku vati zi 'azi miyaturus mu, 'azi ku sayvang kantaw. ku iyazuwa na pauwayan mu amelri sayvang kana trau i punapunan, mawna venaawa kana trau i punapunan. 48izu na 'emazi kaninku, na 'azi muwai kituluz kananku vati na trau mu ulra na sayvang kantaw; nu uwaludusan na wari kani punapunan, ku nirengay na ngay sasayvang kantaw! 49'alrana 'azi ku pakalrang kaninku marengay za eman, a maw izu na pazuwa kaninku i Amalri semeratr kaninku parengay za eman, marengay za eman. 50malrazam ku kanantu seratr aurung za uwavaawan munayun. semeneng, ku nirengay mu penauwa maw iparengay ni Amalri kaninku.>>

Currently Selected:

Yohanē 12: TPN

Highlight

Share

Copy

None

Want to have your highlights saved across all your devices? Sign up or sign in