Siraka 51
51
Risimu ra ku nkhensa
1We HOSI Xikwembu, ndza ku nkhensa.
We Xikwembu muponisi wa mina, ndza ku dzunisa.
Ndzi nkhensa vito ra wena,
2hikuva u ndzi sirhelerile ni ku ndzi pfuna.
U ndzi ponisile eku herisiweni,
ni le ka vahembi ni vakanganyisi.
3Loko vanhu va ndzi hlaserile, u ndzi lwerile.#Kumbe: U ndzi pfunile loko ku ri hava lava ndzi lwelaka
U ndzi ponisile eka mahlomulo ya mina yo tala hi vito ra wena ni tintswalo ta wena letikulu.
U ndzi kutsurile eka rivengo lerikulu ra valala va mina
lava lavaka ku ndzi dlaya.
4U ndzi ponisile eku tlimbiweni hi musi lowukulu
wa ndzilo lowu ndzi nga wu tshivelangiki.
5U ndzi kutsurile eka rifu,#Kumbe: exivandleni xa vafi
ni le ka lava va ndzi lumbetaka emahlweni ka mufumi.
6A ndzi ri kusuhi ni ku fa,
ndzi vona xivandla xa vafi xi ahlamile#Kumbe: ndzi vona sirha ri ahlamile emahlweni ka mina.
7Valala va mina va ndzi rhendzerile ematlhelweni hinkwawo,
kutani a ku vanga ni loyi a ndzi pfunaka.
Ndzi naverile ku kuma mupfuni,
kambe a nga vanga kona.
8Kutani ke, we HOSI Xikwembu, ndzi tsundzukile tintswalo ta wena,
ni leswi u swi endleke khale.
Ndzi tsundzukile leswaku u lamulerile lava va ku tshembaka,
ni ku va ponisa eka valala va vona.
9Kutani ndzi ku khongerile ndzi ri emisaveni leyi,
leswaku u ndzi ponisa eku feni.
10Ndzi khongerile ndzi ku:
“We HOSI Xikwembu, hi wena tata wa mina,#Van'wana va ri: tata wa n'wini yanga
u nga ka u nga ndzi rivali eku xanisekeni ka mina,
loko ndzi pfumala matimba ya ku lwa ni valala va mina lava tikurisaka.
11Ndzi ta ku dzunisa minkarhi hinkwayo
ni ku ku nkhensa hi ku yimbelela tinsimu.”
U yingisile xikhongelo xa mina,
12kutani u ndzi ponisile eka lava lavaka ku ndzi dlaya,
u ndzi kutsurile ekhombyeni lerikulu.
Hikokwalaho ndza ku nkhensa ni ku ku dzunisa.
We HOSI Xikwembu, ndzi dzunisa vito ra wena!
Ta ku lava vutlhari
13Evuhlangini bya mina, ndzi nga si endzela tindhawu tin'wana,
ndzi komberile vutlhari exikhongelweni.
14Ndzi yile eTempeleni ku ya byi khongelela,
kutani ndzi byi lavile evutomini bya mina hinkwabyo.
15Ku sukela evuhlangini bya mina ku ya fika loko ndzi dyuharile ngopfu,
vutlhari byi ndzi tsakisile.
Ndzi fambile entiyisweni wa byona ku sukela loko ndzi ri ntsongo,
byi ndzi rhangerile emahlweni minkarhi hinkwayo.
16Ndzi kumile vutlhari nkarhi lowu ndzi sunguleke ku byi yingisa,
kutani ndzi katekisiwile hi vutivi lebyikulu.
17A ndzi ri karhi ndzi dyondza minkarhi hinkwayo,
kutani ndzi nkhensa hinkwavo lava va ndzi dyondziseke.#Kumbe: Ndzi dyondza ni ku engetela vutivi bya mina minkarhi hinkwayo, kutani ndzi dzunisa swinene HOSI Xikwembu lexi ndzi nyikaka vutlhari
18Ndzi tibohile ku landza vutlhari evutomini bya mina hinkwabyo,
ndzi hisekerile vunene,
kutani ndzi nga ka ndzi nga tisoli hikwalaho ka swona.
19Ndzi lavile vutlhari hi matimba ya mina hinkwawo,
kutani ndzi endlile hinkwaswo hi vuxopaxopa.
Ndzi tlakuserile mavoko etilweni,#Kumbe: Ndzi khongerile ku kombela vutlhari,
hikuva a ndzi byi pfumala.
20Ndzi byi lavile hi mbilu ya mina hinkwayo,
kutani ndzi byi kumile hi ku tshika swidyoho.
Ndzi sungurile ku kula eka byona,
kutani ndzi nga ka ndzi byi tshiki.
21Hikuva ndzi byi naverile hi matimba ya mina hinkwawo,
ndzi kumile rifuwo lerikulu.
22HOSI Xikwembu xi ndzi nyikile matimba eku vulavuleni,
kutani ndzi ta xi dzunisa hi marito ya mina.
23Tanani ka mina, n'wina hinkwenu lava navelaka switsundzuxo,
mi dyondza eka mina.
24Xana hikwalaho ka yini mi vula leswaku a mi tivi nchumu,
kasi a mi endli nchumu hi swona?
25Ndzi mi byerile ndzi ku:
“Ku kuma vutlhari a swi lavi mali.”
26Rhwalani joko ra byona, tsakani ku byi dyondza,
hikuva byi le kusuhi na n'wina.
27Vonani! A ndzi dyondzanga ngopfu,
kambe ndzi kumile ntsako lowukulu.#Kumbe: ku rhula
28Hambiloko swi durha swinene, kumani vutlhari,
byi ta ringana mali ya kona.#Kumbe: Ku kuma switsundzuxo u nga hakela silivhere yo tala, kumbe: Ku kuma switsundzuxo swi ta ku vuyerisa nsuku lowukulu, kumbe: Ku kuma vutlhari swi tlula ku kuma silivhere, swi fana ni ku kuma xuma lexikulu xa nsuku
29Tsakani ni ku nkhensa HOSI Xikwembu hikwalaho ka tintswalo ta xona,
mi nga khomiwi hi tingana ku xi dzunisa.
30Endlani tifanelo ta n'wina hi nkarhi lowu fanelaka,
kutani HOSI Xikwembu xi ta mi hakela hi nkarhi lowu xi wu tsakelaka.
Currently Selected:
Siraka 51: TSO89
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1989. Used with permission. All rights reserved.