Lucas 18
18
Jesus pekodo pypâ, juiz warâ wâgâ unâ nhegatuhobyry
1Aituo myani Jesus unâ nhegatuly, tynynonro modo tienomedâdoem, Deusram tâwâlâ ize tato nhekazezedomoem, aunlolâ eyam nhekadomoem warâ.
2— Tâlâ myani xidadâ oday uguondo, kurâdo ewentâdyly, tâwentâzeba warâ awyly wâgâ tâwaneim, awylygue juizgue ezeku. Koendonro keba olâ myani mâkâ, Deus ize ato ara aini keba, kurâ domodo koendâ eni keba, tienmawyadâdyzedonro keba warâ. 3Tâlâ myani mârâ xidadâ oday pekodo pypâ. Aunlolâ myani juizram idâzesedyly, eagâ aguezeseze. “Mâkâ urâem inakanhe aityby agâ wao aguekâ” kezesedyly juizram.
4— Iweâpa myani juiz mâkâ pypâ aguely indasezedyly kulelâ. Ilâpyryem olâ myani âpaunzedyly: “Âkealâ, Deus ize ato agânhedysedonro keba lelâlâ urâ. Kurâdo kâenmawyadâdyzeba warâ. 5Ynadyly olâ pypâ yam nhekazezedylygue. Awylygue ise aguehobyry agânhenehonly. Agânhepyra urâ-ro watay, aguezesedylygue xynazema urâ” kely. Aituo juiz, mâkâ pypâ nhekadyby anhedyly — kely Jesus.
6Jesus aguely:
— Âpaunzedaungâ juiz aguehobyry wâgâ. 7Adiendyseba lelâlâ wâne, pypâ nhekazezedyby olâ aiemâ. Mâkâ juiz ânguydo kulâ pypâ aiedyse ato aiemâ, nhekazedylygue; Deusma kuru ise koendonro tawylygue, tyam ekazezenibyryram xuduze. Koendonro ise anhekyly, aunlolâ ekani modo xurâem. 8Tynynonro modo emakeze; inepa kehoem ise awârâ modo anhedyly. Urâ Uguondo Kaynâpa Âetyby kodopâduo olâ ise aguipa kulâ yeinwânni modo. Xirâ mâuntudyzemo kuru wato — kely Jesus.
Jesus fariseu wâgâ, impostu epywadobyry emakerim wâgâ warâ unâ nhegatuhobyry
9Jesus unâ nhegatuly myani “Tagonro takaze kehoem koendonro urâ” keim modo wâgâ. Eyanmo aguely:
10— Azagâ uguondope myani. Tokalâ myani fariseu, judeu domodo ezewenry Moisés inweniby ara lelâ adâidysedo. Eagonro myani impostu epywadobyry emakerim, pymâ ton-honreim Roma donro xurâem. Azakâlâ idâlymo myani Deus etyram eagâ agueze. 11XYDYK itybyem myani fariseu. Deus agâ adâkely waunlo ara myani tânanaji; tywâgâ kulâ olâ myani aguely. Aguehobyry Deusram naimpyra. “Tuomare urâ, yagonrodo takaze koendonro urâ. Ânguy enokuni keba urâ. Ânguy kâenmagazedaymba urâ. Moisés inweniby agueho ara lelâ awidyly. Ywydy lelâ kâynanâguyly, eagonro pekodo lâpylâ warâpa. Tuomare urâ, mâkâ pymâ Roma donro xurâem impostu epywadobyry emakeim araba wawylygue. 12Azagâ iguandyly lelâ inanry semana oday kâwinduapyra widyly wao, imâem agâ auguehoem. Dez lelâ âdylâ kâenmakely-ro watay, aunlolâ inanry tokalâ âyam kâunduly” kely fariseu.
13— Impostu epywadobyry emakeim olâ myani toenzepa âpybazeni, inakanhe aini tawylygue. Awylygue myani enagozeybyem lelâ awyly, iwaguelâ Deus agâ aguewâni mododâ awyly. Âjihogainly tytyrungue. Aguely: “Inakanhe aini kulâ urâ, Deus. Ytyendâlâ ikâ” kely.
14— Deus agâ adâkely ewanikeimbyryem, fariseu tâtyram odopâdyly. Impostu epywadobyry emakeim tâtyram odopâdyly lâpylâ. Warâ myani aidylymo. Impostu epywadobyry emakeim inakanhe aitobyry lelâ myani Deus nhygakely. Deus xurâem, mâkâma koendonro kuru, fariseu keba. Koendonroem tawyly wâgâ aguewâni modo, tynrempa âiehoze. Koendonroem tawyly wâgâ aguedânry ise âdyren-hoim. Xirâ mâuntudyzemo kuru wato — kely Jesus.
Jesus iamimeom agâ atobyry
(Mt 19.13-15; Mc 10.13-16)
15Ilâpygueduo tâjiunwyndo Jesusram tymeom nhadylymo.
— Asaemo nhangahu onwa imary iekâ. Deusram koendâ âzehohomoem ekagâ asaemo xurâem — kelymo Jesusram.
Awârâ tientuo Jesus eynynonro modo iamudo sanipyry modoram aguely:
— Jesus kâdynanâdaundâ — kelymo.
16Aguelymo tindatuo olâ myani Jesus tynynonro modoram aguely:
— Arâ adâkezeba itaungâ! Tâwâlâ yam iamimeom nâedâ. Kodopâdaundâmo. Iamimeom wâne enra ohondybyem lelâ yam tâetoem, myara lâpylâ kurâ domodo nohondâ, yeinwântomoem, Deus iwymârymoem itoem. 17Yam tâetoem ohondânry modo Deusgue tywymâgunebamo ise, iamimeom wâne enra ohondybyem lelâ yam tâetoem myarapa tawylymogue. Xirâ mâuntudyzemo kuru wato — kely.
Uguondo toenzepa âdypeom agâ Jesus aguehobyry
(Mt 19.16-30; Mc 10.17-31)
18Ânwa oze myani uguondo tysejiguyeim aguely Jesusram:
— Koendonro lelâlâ âmâ, Pymâ. Âdaraka awidyly, Deusram udâhoem, aunloenlâ eagâ witoem warâ? — kely.
19Aituo Jesus in-hoguly:
— Amyguely tutuzeka âmâ? Âdaituoka “Koendonro lelâlâ âmâ” myguely yam? Kurâ koendonro lâpeba, Deus lelâ koendonro. 20Tutuzelâ âmâ, âdy Deus aguiendyse ato awyly Moisés inweniby wâgâ: “Eagâ mohogüin-hobyry lelâ xynanâgâ. Ânguy kâdyâ. Tâmagazeba ikâ. Aitobyry wâgâpa kulâ âkelomo kâzewentâdâ. Unwâm, âze warâ einwânkâ, xyrenkâ warâ” — kely Jesus.
21Aituo myani uguondo aguely:
— Salokuzenomoem wawyly umelâ idânârâ Moisés inweniby ara awidyly, adyesezelâ urâ — kely.
22Uguondo aguely tindatuo myani Jesus aguely:
— Tâlâ lâpylâ olâ amânhekyly. Âsejiguy modo idânârâ vende ieta. Ebyry ise âdy pebaom modoram mâunduly-ro warâ. Awârâ amânhedyly-ro watay, tâlâ lelâ ise âmâ mârâ koendonro Deus eydâ atodâ ekanâdyby. Idânârâ tâlâ mato mâunduduo, odopâgâ, ynynonroem mitoem — kely Jesus.
23Jesus arâ aguely tindatuo myani toenzepa kehoem uguondo itywandyly, tysejiguy modo vende tiendyseba tawylygue. Tytynre kehoem idâly. 24Mâkâ toenzepa âjityendyly tientuo Jesus aguely:
— Ton-honre lelâlâ âdypeom modo yeinwântoem, Deusgue tywymâgomoem warâ, tysejiguy kulâ ize atomo kuru awylygue. 25Ton-honre camelu agüie ihu oze sakadoem, arâ lâpylâ ton-honre âdypeom modo tâlâ tato inmohomoem eon-honru, Deusgue tywymâgomoem warâ — kely.
26“Ton-honre âdypeom modo Deusgue iwymâgomoem” Jesus keduo idani modo toenzepa kehoem âseguâdâdylymo, âdypeom modo lakuru Deus eydâ atoram idâim waunlo ara enanajimo awylygue. Aituo aguelymo:
— Arâ atayma ise ânguy nâsemaguewâbyra-ro — kelymo.
27— Deus olâ kurâ domodo anhetânry adyese lelâ — kely Jesus.
28Jesus aguely tindatuo, Pedro aguely:
— Xina-ro? Idânârâ tâlâ tato xina niâm, âynynonroem tâitoem — kely.
29-30Aituo myani Jesus eyanmo aguely:
— Idânârâ tâlâ matomo mânhânlymo, ynynonroem mitomoem watay, Deus xuduze lelâ ipa matomo. Itymo mânhânduomo, âykyhomoem ijidymo xuduze. Âwydymo, âwaigorumo, âukonomo, nhaundumo, unwânmo, âzemo, âmeombyrymo warâ mânhânduomo, Deus âpemugumo nhetomo ara kehoem nhenimo, âwynenimo warâ xuduze lelâ. Iwâgâ mânhâympymo takaze ise Deus nhuduly. Âigueduomo aunloenlâ ise Deus agâ mawylymo. Xirâ mâuntudyzemo kuru wato — kely Jesus.
Jesus, “Yigueduo, kurâem itonze urâ” keontobyry
(Mt 20.17-19; Mc 10.32-34)
31Jesus doze tynynonro modo aguiom duaypa nhejikely, aguely:
— Idataungâ wao auguely. Jerusalémram xirâ kytâly. Deus itaumbyry aguewâni modo aguehobyry ara ise agâieholy, urâ Uguondo Kaynâpa Âetyby. Arâ ise târâ aidyly idânârâ aguehomobyry ara. 32Judeu keba modoram ise kâzegameoly. Âwankuem yesemo. Unâguezemo. Iedakudâzemo. 33Yapiogüen-honzemo. Ilâpyryem ise yâen-honlymo. Azagâ emedyly idyly wâgâ kurâem itondybyem lelâ olâ ise urâ — kely.
34Âdakeze aguely awyly nutubamo myani eynynonro modo. Nutuba itomoem aietybyem waunlo ara.
Jesus epy Jericó donro kua nhetobyry
(Mt 20.29-34; Mc 10.46-52)
35Jesus, eynynonro modo warâ âtâ anary Jericóram saindylymo ume, epy ânwa edazekâ ekadybyem. Sakadaynrim modoram aguely myani:
— Ytyendâlâ itaungâ. Ydinheruru âunduwâtaungâ — kely.
36Târâ ekadybyem tatay, toenzepa kurâdo sakadyly indadyly. Aituo mâkâ lelâba nhapâiguely:
— Âdyka awârâ? Ânguyka sakani? — kely.
37— Jesus Nazaré donro awâkâ sakani — kehonly.
38Adâkehonduo, adaenkely:
— Ytyendâlâ ikâ, Jesus! Âdamu Davi ara pymâ ton-honreim âmâ! — kely.
39Jesus eatado idâwâni modo aguelymo eyam:
— MYK alelâ ikâ! Tadaenkezeba ikâ! — kelymo.
Agueduomo lakuru myani ago kuru epy adaenkely:
— Ytyengâ, Davigue tydamudogueim! — kely.
40Aituo myani Jesus epagudyly. Aguely tonlo modoram:
— Epy yam enetaungâ — kely.
Tuopaji saintuo myani Jesus nhapâiguely:
41— Âdyka âmâem agânhedyse mato? — kely.
— Kâentondyze urâ, Pymâ! — kely.
42— Etonze lelâ âmâ. Kua âeniem wawyly mâinwântobyry wâgâ — kely Jesus.
43Ilâenlâ kehoem myani epy nhetondyly. Ânwa oze Jesus nhapyguenoem idyly lelâ. Tâtâly ume aguely myani:
— Koendonro lelâlâ Deus! Ton-honreim awâkâ Deus! — kely.
Idânârâ tonlo modo, kua itybyem awyly tientuo, aguelymo:
— Âkealâ, ton-honreim lelâlâ Deus! Koendonro lelâlâ awâkâ! — kelymo.
Currently Selected:
Lucas 18: bkq
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.