Hebreus 3
3
Jesus tynrenseim kuru, Moisés takaze
1Cristo eynynâ ypemugudo, Deus ingâsedybylâ âmaemo, aunloenlâ eagâ mitomoem. Kynynâ aguenriem Deus Ingonotyby Jesus awyly xutuwâdaungâ, târâ Jerusalémdâ Deus ety oday kurâ domodo eynynâ aguewâni modo iwymâry kuru Deus agâ agueim ara. Awylygue, Jesus wâgâ mâpaunzebyra tâiseba itaungâ. 2Deus aguehobyry idânârâ anhetuo, tynynonro modo eynynâ aguenriem itoem, aguehonwânmy Jesus, Deusram. Saguhoem Moisésram tynynonro modo eniem aguehobyry ara. 3Mâkâ âtâ itâni tuomaenzeim kuru, intâdyby takaze kehoem. Arâ lâpylâ Jesus xyrendyly, Moisés takaze kehoem. 4Ânguylâ âtâ tytâze lelâ; Deus olâ idânârâ tâlânro modo xugunipyry. 5Tâzemary, tywymâry ety odano emyenro myakâwândy Moisés. Deus “Aiekâ” kehobyry adyese lelâ myakâwândy. Kurâ domodo Deus xurâ koendâ lelâ myakâwândy nhedyly, nhurudyly warâ. Wayam waunroem Deus agueho wâgâ aguewâm lâpylâmy. 6Cristo Jesus olâ âtâ sodo imery kuru emyenro, Deus imery lelâlâ awylygue. Cristolâ âtâ oday xutuim kuru, Deus aguehobyry ara kehoem anhedyly. Kurâ Jesus einwânni modo, Kunwym Deus ety kurâ, ton-honre Jesus kieinwântuo, “Xuduze urâ” Deus kehobyry kinwânwânsezeduo warâ.
Tâeganepa itaungâ, Deus “Aiekâ” kehobyry aiese
7Deus Ispiritury aguehobyry enanâguewâdaungâ, Deus itaumbyry awo wâgâ iwenibyem mawânrâ.
“Iwerâ âyanmo Deus agueho mâindatuomo,
8âdamudomo ara tâeganepa itaungâ.
Aguelymo myakâwâm:
‘Deus wâgâ kydâtynanâdaymba kine’ kewânmomy.
Mârâ ume, myarâ myarâ warâ âdy peba ato einkâ tadakobâdaymo, aguelymo:
‘Kyzene olegue Deus inakanhe aguidyly nhemaenly, kânagazenehombalâ’ kelymo.
9Deus aguely:
‘Quarenta anu akâwâm akaemo eseze wawyly,
toenzepa kâinane xurâmoem koendonro modo agânhedyly.
Arâlâ olâ akâwâm udueryem idylymo.
“Kyzene olegue Deus inakanhe aguidyly nhemaenly, kânagazenehombalâ” kelymo.
10Aituo eagâmo yewiâpadyly,
eyanmo auguehobyry adiendyseba awylymogue.
Tâeganemo akâwâm.
Auguehobyry tutuzelâ akâwâm,
izepa wato anhedylymo.
Mâkâ tani neinwâmpyra tawylymogue,
ânwa oze xuzani emyenro akaemo.
11Awylygue eagâmo yewiâpadyly; ton-honre kehoem auguely:
“Ynynonro modoram kâunduly” ugueho onroam
âdaunloenlâ naintaymbamo, negawântaymbamo warâ ise;
auguehobyry ara âdaunloenlâ târâ nekobyzeguebamo ise warâ’ ”
kewândymy Deus kydamudo wâgâ, warâ iwenibyem awyly Deus itaumbyry awo wâgâ.
12Cristo eynynâ ypemugudo, tonomeguelâ itaungâ. Tâeganepa itaungâ, Deus agueho mankabyra mitoem, Deusdâ iwague mipyra mitomoem warâ. 13Deus itaumbyry awo wâgâ iwenibyem: “Iwerâ âyanmo Deus agueho mâindatuomo, tâeganepa itaungâ” kely. Saguhoem “iwerâ” kehobyry umelâ lâpylâ kurâ iwerâ. Awylygue agonromo eon-hondâdaungâ, Satanásram nâzenokuoba itomoem, Deus izepa ato aniempyra itomoem, tâeganepa itomoem, Deus einwândyly nimoba itomoem warâ. 14Jesus kieinwândyly adaguhobyry aralâ, kyigueho odaji kehoem kieinwânsezedyly watay, idânârâ iwymâryem awyly ume mâkâ agâlâ ise kurâ.
15Xirâ mawânrâ Deus itaumbyry awo wâgâ agueho:
“Iwerâ âyanmo Deus agueho mâindatuomo,
âdamudomo ara tâeganepa itaungâ.
‘Deus wâgâ kydâtynanâdaymba kine’ kewânmomy.”
16Ânguyka myakâwândy Deus neinwâmpyra ini, aguely tindadyly umelâ? Akaemo kydamudo Egitodâba Moisés nhatyby modo. 17Ânguy agâka myakâwândy Deus quarenta anu lelâ iewiâky? Izepa ato aienibyry modo agâ myakâwândy iewiâky. Awylygue myakâwândy mârâ âji âdy peba atodâ iguelymo. 18Ânguy wâgâka myakâwândy Deus ton-honre kehoem aguely: “ ‘Ynynonro modoram kâunduly’ ugueho onroam âdaunloenlâ naintaymbamo, negawântaymbamo warâ ise; auguehobyry ara âdaunloenlâ târâ nekobyzeguebamo ise warâ” kely? “Deus wâgâ kydâtynanâdaymba kine” keypy modo wâgâ myakâwândy mâkâ aguely. 19Aituo tutuzelâ kurâ, “Ynynonro modoram xuduze urâ” Deus kehobyryam akaemo naimpyra atobyry, mâkâ tyeinwândyseba atomobyry wâgâ.
Currently Selected:
Hebreus 3: bkq
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.