ZEKARIYA 10
10
Untwa Kyala ikufinga isya kubatabula
1Munsumege Untwa Kyala ukuti abapege ifula nkabalilo ka mpingo. Yo yu Ntwa Kyala uyu ikutuma amabingu ga fula, nifula iyi yikutima nukufipelela ifibyaligwa ukukula mmigunda. 2#Mat 9.36; Mar 6.34Abandu bikubuka ku fifwani fya ba Kyala ukwakulalusya nakubalagusi, loli isi bikubabula syo sya itolo kangi sya butungulu. Bamo bikusanusya injosi, loli bikubasofya itolo umwe. Isya kubasangalusya isi bikubabula umwe sya itolo. Bunobuno abandu bikwembela ukubuka kuno na kuno bo si ng'osi isi sisobile. Bikutamigwa papo bakaya nundongosi.
3Untwa ikuyoba ikuti, “Mbakalalile abatimi binu, aba bikubalagila abandu bangu, po lelo nikuya pakubafunda. Abandu ba nkisu kya Yuda bangu une, bunobuno une ne Ntwa Kyala Umwenemaka gosa nisakubapakisyaga. Bisakuya bo si falasi syangu isya maka pakulwa ubwite. 4Mmyabo mo bisakufumaga abalagilafisu, abalongosi ba bandu na balongosi ba filundilo fya bwite, ukubatalusya abandu bangu. 5Abandu ba nkisu kya Yuda bo bisakuyaga baponjoli, bo ba balwa bwite aba bikubakanyangila abalugu babo mmatope ga mmipulo. Bisakulwaga ubwite papo Untwa ali nabo, kangi bisakubatola na balugu babo aba bikwenda pa falasi.
6“Nisakubapaga amaka abandu ba nkisu kya Yuda;
nisakubapoka abandu ba nkisu kya Israeli.
Nisakuyaga nikibabilisi pamyabo nukubagomola ukwisa nabo kumyabo.
Bisakuyaga bo ba bandu aba ngabakanilemo siku.
Une ne Ntwa Kyala gwabo,
nisakupilika inyiputo syabo.
7Abanya Israeli bisakuyaga bamaka bo ba bandu abalwa bwite,
bisakuya nubwikyele bo ba bandu aba bafumile pakunwa ubwalwa bwa mafilu.
Abanababo bisa kukumbuka nisya buponjoli bububu,
po bende nukusekela pali isi Untwa abombile.
8“Nisakubabilikila abandu bangu
nukubabungania palikimo.
Nisakubapoka, kangi nisakubolosya, bisakuya bingi itolo bo mumo bayilile iyolo.
9Palema mbanyambenie mfikolo fya bapanja,
bisakungumbuka une na mfisu fya mbutali.
Abene palikimo nabanababo bisakuyangako kubumi,
kangi bisakugomokelaga kumyabo palikimo.
10Nisakubatwala kumyabo ukufuma ku kisu
kya Egiputi nikya Asiria,
nukubapa ubuyengo nkisu kyabo.
Nisakubapaga ubuyengo nkisu
kya Gileyadi na nkisu kya Lebanoni;
ikisu kyosa kisa kwisulaga nabandu.
11Bo bikwenda mbutolwe ubu buliti nyanja,
Une ne Ntwa nisakugapinga amayiga
mope nambusolofu bwa lusoko lwa Nayelo mwisakuma.
Aba lwitufyo ba nkisu kya Asiria ubuywelufu bwisakubaga,
bope na bamaka ba nkisu kya Egiputi
amaka gabo gisakumalika.
12Abandu bangu nisakubapela ukuya bamaka;
bisakumbungulukila une nukukonga isi nikubabula.”
Sisisi syo ikuyoba Untwa.
Currently Selected:
ZEKARIYA 10: NNBII
Highlight
Share
Copy
Want to have your highlights saved across all your devices? Sign up or sign in
BAIBULO INONGWA INUNU © Bible Society of Malawi, 2017.