Tononkiran'i Salômôna 1
1
1Ny tononkira tsara indrindra amin’ny tononkira rehetra. Ao amin’ny rakitsoratr’i Salômôna#1.1 Ny tononkira tsara... rehetra: araka ny hevitry ny teny hebreo miverina indroa izany. –rakitsoratr’i Salômôna: jereo 1 Mp 5.12..
Ralehilahy sy ravehivavy: Ny tafan’ny mpifankatia
(Ravehivavy)
2Hanoroka mafy ahy tokoa anie ianao!
Fa ny safosafonao dia fy
mihoatra noho ny divay
3ary koa mamerovero
mihoatra noho ireo ilomanitrao.
Ianao dia mahasintona
mihoatra noho ny ilomanitra voafantina;
koa izany no itiavan’ireo zatovovavy anao.
4Ento aho hanaraka anao,
ary aoka isika hihazakazaka.
Dia ianao mpanjakako#1.4 mpanjakako: tsy hoe mpanjaka ara-bakiteny ilay olon-tian’ny ampakarina, fa hasohasoiny ho toy izany, satria izay tiana mitombo tarehy; jereo koa 1.12.
no hampiditra ahy an’efitranonao.
Aoka isika, noho ny aminao,
hiara-tsambatra sy hiara-paly;
dia hankamamiantsika anie ny safosafonao
izay fy mihoatra noho ny divay.
Marina ny itiavan’ireo zatovovavy anao!
5Ry tovovavin’i Jerosalema ô,
zarazara hoditra aho nefa bikana;
ny tarehiko dia mivalomainty
toy ny lain’ireo mpifindrafindra lasy,
nefa meva toy ny temitr’i Salômôna.
6Aoka re aho mba tsy hojerenareo
araka ny mahazarazara hoditra ahy,
satria nodanihin’ny hainandro aho!
Tezitra tamiko ireo anadahiko
ka nanery ahy hiambina ny tanimboalobony;
nefa ny tanimboaloboko,
dia ny an’ny tenako manokana,
tsy mba nambenako akory!
7Ambarao ahy, ry ilay tiako,
izay iandrasanao ny ondrinao
sy izay ampialanao sasatra azy
rehefa mitataovovonana
mba tsy hivezivezeko#1.7 hivezivezeko: amin’ny hebreo hisaronako voaly. hitady anao
eny amin’ny andiam-bibin’ireo namanao.
(Ny mpiandry* ondry)
8Raha tsy fantatrao izany,
ry vehivavy tsara tarehy indrindra,
dia araho ny dian’ondry;
ka tariho ny zanak’osinao
hanakaiky ny lain’ireo mpiandry ondry.
(Ralehilahy)
9Amiko ianao, rahavako, dia meva
tahaka ny soavaly mpanao matso
izay mitarika ny kalesin’ny Farao.
10Mahatsara ny takolakao
ireo kavina eo an-daniny avy;
ary manendrika ny tenanao
ny rado iambozonanao.
(Ny mpiandry ondry)
11Rojo volamena voaravaka volafotsy
no hampanaovinay ho anao.
(Ravehivavy)
12Fony mbola eo amin’ny fanasàny
no mipetraka ity mpanjakako,
dia mamerovero aoka izany
ny ilomanitro natao tamin’ny narda.
13Ny malalako amiko dia mamerovero
tahaka ny miora iray fonosana
izay mialina eo an-tratrako;
14ny malalako amiko dia manimanitra
tahaka ny voninkazo dia mamelana
any an-tanimboalobok’i Haîna-Gedỳ#1.14 Haîna-Gedỳ na hoe Loharanon’ny zanak’osy: faritra anirian-java-maniry eo anivon’ny taniefitra amin’ny morona andrefan’ny Ranomasina Maty..
(Ralehilahy)
15Tsara tarehy ianao, rahavako,
eny, tsara tarehy ianao;
ny masonao dia mahafinaritra
tahaka ny voromahailala.
(Ravehivavy)
16Tsara tarehy koa ianao, ry malalako,
sady mambabo tokoa.
Ahi-maitso mavana no fandriantsika;
17rantsana sedera no miendrika
sakamandimby amin’ny tranontsika,
ary hazo kipresy no toa peta-drindrina.
Currently Selected:
Tononkiran'i Salômôna 1: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.