Ezekiela Sava lalana
Sava lalana
–I Ezekiela, mpisorona tao amin’ny tempolin’i Jerosalema, dia isan’ireo Israelita nentin’i Nebokadnetsara ho babo tany Babilôna tamin’ny taona 597 tal J.K. taorian’ny nahazoan’i Nebokadnetsara an’i Jerosalema voalohany. Tokony ho efatra taona tatỳ afara dia nantsoin’Andriamanitra ho mpaminany izy. Tany an-tsesitany izy no nandefa teny fampitandremana ho an’ireo Jiosy babo tany Babilônia sy ho an’ireo Jiosy sisa tavela tany Jerosalema. Taorian’ny nianjeran’i Jerosalema sy ny faharavàn’ny tempoly tamin’ny taona 587 tal J.K. dia nampiany teny fampiononana sy fampanantenana ireo teny fampitandremana nataony ireo.
Mizara efatra lehibe ny bokin’i Ezekiela:
Ny fizaràna voalohany dia mirakitra ireo fanakianana sy fandrahonana ny Israelita talohan’ny fahirano faharoa nihatra tamin’i Jerosalema (toko 1–24).
Ny fizaràna faharoa dia manambara ny fitsarana hampiharin’Andriamanitra ihany koa amin’ireo firenen-kafa izay namitaka sy nampahory an’i Israely (toko 25–32).
Ny fizaràna fahatelo dia misy ireo teny nambara taorian’ny fianjeran’i Jerosalema tamin’ny taona 587 tal J.K., ka ahitana indrindra ny hafatra fampaherezana ho an’ny vahoaka Israely (toko 35–39).
Ny fizaràna fahefatra kosa dia manoritsoritra ny ho endriky ny tempoly amin’ny hoavy araka izay nahitan’ny mpaminany azy tao amin’ny fahitana (toko 40–48).
I Ezekiela dia nahazo aingam-panahy tamin’ny alalan’ireo fahitana maro; koa matetika izy no mandravaka ny toriteniny amin’ny fanaovana asa sy fihetsika mifono hafatra. Ary amin’ny maha mpisorona azy dia omeny lanja lehibe ny tempoly, kanefa hamafisiny fa ny fanatrehan’Andriamanitra dia tsy voafatotry ny Toeramasina ao Jerosalema, fa afaka miasa na dia any Babilônia aza (ohatra 11.16). Miala amin’ny lovam-pampianarana jiosy mifototra amin’ny «andraikitra iombonana» i Ezekiela raha manambara fa ny olona tsirairay dia tompon’andraikitra amin’ny ataony avy (toko 18). Noho izany dia tsindriany manokana ny fihavaozam-piainan’ny olona tsirairay; nefa koa dia ambarany fa ny vahoakan’Andriamanitra, rehefa havaozina amina karazana fitsanganana amin’ny maty (toko 37), dia haverina any amin’ny taniny (11.14-20; 36.1-38).
Currently Selected:
Ezekiela Sava lalana: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.