Ezekiela 3
3
1Dia hoy Ilay niteny tamiko hoe: «Ry ilay taranak’olombelona#3.1 Ry ilay taranak’olombelona: jereo 2.1 sy nta. –Momba ny and 1-3, jereo Apôk 10.9-10., hano io horonan-taratasy izay naseho anao io, dia mandehana miteny amin’ny Israelita.» 2Dia nosokafako ny vavako ary nafahany ahy ilay horonan-taratasy. 3Ary hoy Izy tamiko: «Ry ilay taranak’olombelona, fenoy ny kibonao ary vokiso amin’io horonan-taratasy omena anao io ny tenanao.» Dia nohaniko izany, ka tao am-bavako dia mamy toy ny tantely.
4Ary hoy indray Izy: «Ry ilay taranak’olombelona, mandehana mankany amin’ny Israelita ka ampitao aminy ny teniko. 5Tsy maniraka anao any amin’ny vahoaka izay miteny fiteny vahiny sarotra takarina Aho, fa any amin’ny vahoakan’i Israely. 6Raha maniraka anao hankany amin’ireo firenen-kafa izay miteny fiteny vahiny sarotra sy mety tsy ho takatrao Aho, dia tsy isalasalana fa hihaino anao izy. 7Fa ny Israelita kosa tsy hanaiky hihaino anao satria tsy te hihaino Ahy izy, fa olona mafy loha sady be kirina izy rehetra. 8Kanefa hataoko sahy mifanatri-tava aminy ianao, ary hataoko mafy loha tahaka azy. 9Eny, hataoko mafy lalandava ny lohanao ary mafy lavitra noho ny vatolampy aza. Ka aza matahotra azy ianao, ary aza mivadi-po noho ny fihetsika ataon’io vahoaka maditra io. 10Dia notohizany hoe: «Ry ilay taranak’olombelona, raiso ao am-ponao ary henoy tsara ny teny rehetra izay ambarako anao. 11Avy eo dia mankanesa any amin’ireo babo izay isan’ny mpiray firenena aminao, ka mitenena aminy hoe: ‹Izao no lazain’ny Tompo ANDRIANANAHARY.› Mitenena aminy na hihaino izy na tsy hihaino.»
12Ary ny Fanahin’Andriamanitra nanainga ahy hiala amin’ny tany; dia nandre horakoraka mafy tao ivohoko aho nanao hoe: «Hoderaina anie ny TOMPO any amin’ny toerana izay isehoan’ny voninahiny.» 13Reko koa ny fikopakopaky ny elatr’ireo zava-miaina izay nifanendry sy ny feon’ny kodiarana teo anilany, ka kotaba moa izao! 14Dia nentin’ny Fanahy izay nanainga ahy niala avy tamin’ny tany aho. Voasariky ny herin’ny TOMPO aho ka tsy nahatohitra, fa lasa nandeha tamin’ny fo nalahelo sady nangitakitaka. 15Tonga tany Tela-Abiba aho ka mby teo anivon’ireo babo izay nipetraka teo amoron’ny ony Kebara; ary niara-nitoetra taminy tao fito andro aho sady talanjona aoka izany.
Ho mpitily ho an’ny firenen’i Israely i Ezekiela
16Nony afaka fito andro dia nisy tenin’ny TOMPO tamiko nanao hoe: 17«Ry ilay taranak’olombelona, ataoko mpitily ho an’ny Israelita ianao; koa hohenoinao ny teniko ary hampitainao aminy ny fampitandremana avy amiko. 18Andeha hataontsika hoe misy olon-dratsy iray tiako hilazana fa hahafaty azy tokoa ny afitsony: raha tsy mampitandrina azy ianao hialany amin’ny toe-dratsiny mba hahavelomany, dia ho faty noho ny otany tokoa izany olon-dratsy izany, nefa ianao no tazoniko ho tompon’andraikitra amin’ny fahafatesany. 19Raha ohatra kosa ka nampitandrina azy ianao, nefa tsy nanaiky hiala tamin’ny fahadisoany sy ny toe-dratsiny izy, dia ho faty noho ny otany tokoa izy, fa ianao kosa hahavonjy ny ainao. 20Andeha hataontsika hoe misy olo-marina iray miala amin’ny tsara ka manao ny ratsy: hataoko hampidi-doza aminy izany ka ho faty izy. Raha tsy mampitandrina azy ny amin’io loza io ianao, dia ho faty noho ny otany izy; fa tsy hisaiko ny asa soa nataony taloha ary ianao no tazoniko ho tompon’andraikitra amin’ny fahafatesany. 21Fa raha nampitandrina io olo-marina io kosa ianao mba tsy hanao ratsy ka mifady ny ratsy tokoa izy, dia mety ho velona izy noho ny fampitandremana nataonao; sady hahavonjy ny ainao koa ianao.»
Teren’ny Tompo hangina aloha i Ezekiela
22Ary voasariky ny herin’ny TOMPO indray aho, ka hoy Izy tamiko: «Mitsangàna, mankanesa any an-dohasaha fa any no hitenenako aminao.» 23Dia nitsangana aho, ka nandeha nankany an-dohasaha. Ary indro ny voninahitry ny TOMPO niseho tao tahaka ilay efa nahitako azy teo amoron’ny ony Kebara, koa nikarapoka nihohoka aho. 24Tamin’izay dia niditra tao amiko ny Fanahin’Andriamanitra ka nampitsangana ahy. Ary hoy ny Tompo tamiko: «Mandehàna mihidy ao an-tranonao. 25Ao no hotadina ianao, ry ilay taranak’olombelona, ka hafatotra tsy ho afa-mivoaka ny trano intsony hankeo amin’ny Israelita. 26Hampiraiketiko amin’ny lanilaninao ny lelanao, ka hanjary moana tsy ho afa-mananatra io firenena maditra io ianao. 27Nefa raha misy zavatra holazaiko amin’ny alalanao, dia hataoko afa-miteny ianao. Amin’izay dia hiteny aminy ianao ka hanao hoe: «Izao no lazain’ny Tompo ANDRIANANAHARY». Ny sasany dia ho vonona hihaino anao, fa ny sasany kosa tsy hanaiky hihaino anao satria vahoaka maditra izy.»
Currently Selected:
Ezekiela 3: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.