Asa Sava lalana
Sava lalana
Ny boky mirakitra ny Asan’ny Apôstôly dia tohin’ny boky Vaovao Mahafaly araka an’i Lioka. Ao amin’ny Vaovao Mahafaly dia ny vanim-potoana niainan’i Jesoa teto an-tany no ifantohan’i Lioka. Rehefa niakatra any an-danitra kosa i Jesoa (Asa 1.1-11), dia miova endrika ny fifaneraseran’i Kristy amin’ireo mpianany. Araka izany, dia ny Asan’ny apôstôly no misantatra ny tantaran’ny Fiangonana: eo amin’ny Fiangonana lalandava i Jesoa, amin’ny alalan’ny Fanahy Masina Izay manentana ny mpianatra.
Tantara velona sy mampitaintaina no raketin’ny Asan’ny apôstôly. Atrehina ao ny nahaterahan’ireo vondrona kristianina teo amin-dry zareo Jiosy (miaraka amin’i Petera apôstôly) toy ny tao Jerosalema, na koa teo amin-dry zareo hafa firenena, toy ny tao Antiôkia sy Kôrinto na Filipy. Arahina ao koa i Paoly tsy sasatry ny mitety tany ary manatontosa dia maromaro mba hitory ny Vaovao Mahafaly. Tsikaritra ao ny olana midona amin’izany Fiangonana vao manomboka izany ary ny fomba nahaizany namaha ny olana noho ny Fanahin’ny Tompo.
Amin’ireo loharano nipoiran’ity boky mirakitra ny Asan’ny apôstôly ity dia singanina ilay azo antsoina hoe «Diarin’i Lioka». I Lioka, mpanoratra ny Asan’ny apôstôly, dia dokotera mpiara-miasa tamin’i Paoly (Kôl 4.14; Fm 24; 2 Tim 4.11) ary tena mpiara-dia taminy (Asa 16.10-40) ka tafapaka hatrany Jerosalema izay isamborana an’i Paoly (Asa 20.5-21, 18), ary farany hatreo Kesaria ka hatrany Rôma izay itoeran’i Paoly roa taona ngarangidina alohan’ny hitsarana azy (Asa 27–28).
Vao manomboka dia ambaran’ny mpanoratra mazava tsara ny soritra harahiny (1.8):
–Ny fiandohan’ny Fiangonana voalohany tao Jerosalema, taorian’ny fiakaran’i Jesoa any an-danitra (1.1–8.3);
–ny fielezan’ny Vaovao Mahafaly tamin’ireo faritra hafa tao Palestinina, dia tany Jodea sy Samaria (8.4–12.25);
–ny fielezan’ny Vaovao Mahafaly tamin’ireo tany manamorona ny Ranomasina Mediteranea ka hatrany Rôma, renivohitry ny fanjakana rômanina (13.1–28.31). Soritana ao anatin’izany ireo dia nataon’i Paoly sy ny figadrana nanjo azy:
a) dia voalohany (13.1–14.28);
b) dia faharoa (15.36–18.22);
d) dia fahatelo (18.23–21.16);
e) figadrana tao Jerosalema sy tany Kesaria ary tany Rôma (21.17–28.31).
Ny hafatra, izay naely tamin’ny faritany rehetra fantatra fahizany, dia voafantina ao amin’ireo toriteny sy lahateny nataon’ny apôstôly. Hita amin’izany fa ilay Jesoa Kristy, notorîna tamin’ny olona rehetra na Jiosy na hafa firenena, dia tsy iza fa ilay Jesoa avy any Nazareta, niaina tao Palestinina. Ny Fanahy Masina no mampitodika lalandava ireo mpianatra amin’ny tenan’i Jesoa ary amin’ny teniny sy ny asany.
Ireo zava-nitranga voatantaran’ny Asan’ny apôstôly dia ahitana sahady ny soritr’asa tsy maintsy efain’ny Fiangonana amin’ny fotoana rehetra sy amin’ny toerana rehetra: mitory ny Vaovao Mahafaly momba an’i Jesoa Kristy amin’ny olombelona tsy an-kanavaka, hatrany amin’ny faran’ny tany.
Currently Selected:
Asa Sava lalana: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.