2 Samoela 3
3
1Naharitra ela ny adin’ny mpomba an’i Saoly sy ny mpomba an’i Davida. Nihanahery hatrany anefa i Davida fa tsy nitsaha-nikorosy kosa ny taranak’i Saoly.
Ireo zanakalahin’i Davida teraka tao Hebrôna
(Jereo 1 Tan 3.1-4)
2Zanakalahy maro no naterak’i Davida tao Hebrôna. Ny voalohany tamin’izany dia i Amnôna zanany tamin’i Ahinôhama avy any Jizrehela; 3ny faharoa dia i Kilàba tamin’i Abigaîla vadin’i Nabala avy any Karmela; ny fahatelo dia i Absalôma zanakalahin’i Mahekà zanakavavin’i Talmay, mpanjakan’i Gesora#3.3 Gesora: jereo 13.37-38 sy nta.; 4ny fahefatra dia i Adônià zanakalahin’i Hagita; ny fahadimy dia i Sefatià zanakalahin’i Abitala; 5ary ny fahenina dia i Jitrehama zanany tamin’i Heglà izay vadin’i Davida koa. Ireo avy no zanakalahy naterak’i Davida tao Hebrôna.
Tapaka ny fihavanan’i Abinera sy i Isbôsèta
6Raha mbola niady hatrany ireo mpomba an’i Saoly sy ireo mpomba an’i Davida, dia nanamafy ny heriny i Abinera teo amin’ny mpomba an’i Saoly. 7Ary i Saoly nanana vaditsindrano natao hoe Ritsepà zanakavavin’i Aià. Ka hoy i Isbôseta tamin’i Abinera:
–Nahoana ianao no nandry tamin’ny vaditsindranon-draiko#3.7 Io fihetsika io dia milaza tena ho manana fahefà-mpanjaka. Ampit 16.21-22; 1 Mp 2.22.?
8Tezitra mafy i Abinera noho izany tenin’i Isbôseta izany ka nilaza hoe:
–Alikalahy miandany amin’i Joda angaha aho? Mandraka ankehitriny dia naneho fitiavana ny fianakavian’i Saoly rainao sy ny rahalahiny ary ny sakaizany aho, ka tsy nanolotra anao ho eo an-tanan’i Davida, nefa ianao indray izao no manameloka ahy noho ny hadisoako tamin’iny vehivavy iny? 9Hosazin’Andriamanitra mafy tokoa anie izaho Abinera, raha tsy hataoko amin’i Davida izay nianianan’ny TOMPO taminy, 10dia ny hanaisotra ny fanjakana amin’ny fianakavian’i Saoly ka hampitoetra ny sezafiandrianan’i Davida amin’i Israely sy amin’i Joda hatrany Dana ka hatratỳ Beriseba#3.10 hanaisotra... fianakavian’i Saoly: jereo 1 Sam 15.28. –Dana sy Beriseba: toerana any amin’ny farany avaratra sy farany atsimo amin’ny tanin’i Israely..
11Tsy hitan’i Isbôsèta intsony izay havaly an’i Abinera noho ny fahatahorany azy.
I Abinera miara-dia amin’i Davida
12Naniraka olona amin’ny anarany nankany amin’i Davida i Abinera hanontany azy izay tompon’ny tany ka nanao hoe: «Manaova fanekena amiko fa hanampy anao aho hahatonga an’i Israely manontolo hiara-dia aminao.» 13Dia hoy i Davida namaly azy: «Eny àry fa hanao fanekena aminao aho, saingy izao kosa no mba hangatahiko aminao: Aza miseho amiko raha tsy entinao atỳ i Mikàla#3.13 Mikàla: jereo 1 Sam 18.20-30; 25:44. zanakavavin’i Saoly.» 14Dia naniraka olona nankany amin’i Isbôsèta zanakalahin’i Saoly i Davida hanao aminy hoe: «Omeo ahy i Mikàla vadiko izay efa azoko ho takalon’ireo tsitsy#3.14 tsitsy: jereo ny FTS amin’ny voambolana hoe FAMORANA. zaton’ny Filistinina.» 15Ary i Isbôsèta nampaka an’i Mikàla tany amin’i Paltiela#3.15 Paltiela: antsoina hoe Palty ao amin’ny 1 Sam 25.44. vadiny sady zanakavavin’i Laîsy. 16Nanaraka azy hatrany Bahorima#3.16 Bahorima: toerana tsy fantatra mazava tsara nefa dia an-kilaometatra vitsivitsy fotsiny ao atsinanan’i Jerosalema. i Paltiela sady nitomany. Kanefa hoy i Abinera taminy: «Mandehana mody amin’izay!»; ary dia niverina izy.
17Avy eo nifampidinihan’i Abinera ny loholon’i Israely ka nilazany hoe:
–Ela izay nanirianareo an’i Davida ho mpanjakanareo izay. 18Koa tanteraho izany ankehitriny, satria ny TOMPO efa nilaza tamin’i Davida hoe: «Amin’ny alalan’i Davida mpanompoko no hanafahako ny Israely vahoakako amin’ny herin’ny Filistinina sy ny fahavalony rehetra.»
19Niresaka izany tamin’ny Benjaminita koa i Abinera; ary avy eo nankany Hebrôna izy mba hilaza amin’i Davida ny faneken’ny Benjaminita sy ny Israelita hafa#3.19 ny faneken’ny Benjaminita dia zava-dehibe satria mifamatotra manokana tamin’ny fianakavian’i Saoly izay Benjaminita rahateo ireo.. 20Dia tonga tany amin’i Davida tao Hebrôna i Abinera niaraka tamin’ny lehilahy roapolo, ka nanaovan’i Davida fanasana. 21Ary hoy i Abinera tamin’i Davida:
–Handeha aho, tompoko, ka hamory ny Israelita rehetra ho eo aminao. Hanao fanekena aminao izy ireo ary dia hanjaka hatraiza hatraiza araka izay sitrakao ianao.
Navelan’i Davida handeha i Abinera, ka lasa soa aman-tsara.
Najedak’i Jôaba i Abinera
22Taorian’izay dia tonga avy nandranto ady ny mpanompon’i Davida sy i Jôaba, ka nitondra babo maro. Tsy tao amin’i Davida tao Hebrôna intsony i Abinera fa efa navelany handeha soa aman-tsara. 23Raha vantany vao tonga teo i Jôaba sy ny tariny rehetra, dia nisy nampandre an’i Jôaba hoe: «Tonga tao amin’ny mpanjaka i Abinera zanakalahin’i Nera ka navelany handeha soa aman-tsara.» 24Ary nankao amin’ny mpanjaka i Jôaba ka nanao taminy hoe:
–Fa inona izany nataonao izany? Tonga teo aminao i Abinera, ka nahoana no navelanao handeha fotsiny? 25Fantatrao tsara anefa i Abinera zanakalahin’i Nera, fa ny hamitaka anao sy hitsikilo izay alehanao ary hahalala izay ataonao rehetra no nahatongavany!
26Dia nivoaka avy tao amin’i Davida i Jôaba ary naniraka olona hanaraka an’i Abinera. Avy teo amin’ny lavaka famorian-drano atao hoe Sirà no nitondran’ireo azy niverina; nefa tsy fantatr’i Davida velively izany. 27Rehefa tafaverina tao Hebrôna i Abinera, dia notaomin’i Jôaba hankeny am-bavahady toy ny hiresaka mangina aminy izy, kanjo notrobarany teo amin’ny kibony izy ka maty ho valin’ny nahafatesan’i Asahela rahalahiny.
28Rehefa ren’i Davida izany tatỳ aoriana, dia hoy izy hoe:
–Afa-tsiny mandrakizay eo anatrehan’ny TOMPO izaho sy ny fanjakako ny amin’ny nahafatesan’i Abinera zanakalahin’i Nera. 29Hivaly eo an-dohan’i Jôaba sy ny fianakaviany manontolo anie izany, ary tsy ho foana ao amin’ny taranak’i Jôaba koa anie ny olona marary mitsika na marary hoditra sy ny lehilahy kilemaina manao asam-behivavy, ary ny lehilahy matin-tsabatra na tsy ampy sakafo!
30Toy izany no namonoan’i Jôaba sy i Abisay rahalahiny an’i Abinera ho faty noho ny namonoany an’i Asahela rahalahiny tamin’ny ady tao Gibehôna#3.30 Jereo 2.18-23..
31Ary hoy i Davida tamin’i Jôaba sy ny olona rehetra niaraka taminy:
–Triatriaro ny akanjonareo, ka mitafia gony ary aoka hanao fisaonana an’i Abinera ianareo.
Nanaraka taorian’ny tranovorona i Davida mpanjaka. 32Dia nalevina tao Hebrôna i Abinera. Nigogogogo nitomany teo amin’ny fasan’i Abinera ny mpanjaka; ary nitomany toy izany koa ny vahoaka. 33Nanao izao hira fisaonana an’i Abinera izao ny mpanjaka:
Nahoana no tahaka ny fahafatesan’ny adala
no nahafatesanao, ry Abinera?
34Tsy nifatotra tongotra aman-tanana ianao,
nefa maty toy ny olona matin’ny jiolahy.
Dia mbola nitomany azy indray ny vahoaka rehetra teo. 35Raha mbola antoandro ny andro dia nanatona avokoa ireo mba hampihinan-kanina an’i Davida, nefa izy kosa nianiana hoe:
–Hataon’Andriamanitra amiko anie ny famaizana mafy indrindra raha manendry hanina na zavatra hafa aho mandra-pilentiky ny masoandro.
36Ary azon’ny vahoaka rehetra ny hevitr’izany ka nankasitrahiny; sady izay rehetra nataon’ny mpanjaka moa dia nankasitrahin’ny vahoaka. 37Koa fantatry ny vahoakan’i Joda manontolo sy ny Israelita rehetra tamin’io andro io fa tsy baiko avy amin’ny mpanjaka mihitsy no nahafaty an’i Abinera zanakalahin’i Nera. 38Ary hoy koa ny mpanjaka tamin’ireo mpanompony:
–Tsy fantatrareo va fa komandy sady lehilahy malaza teo amin’i Israely no maty androany? 39Fa izaho, na dia mpanjaka efa voahosotra aza, dia mahatsiaro ny tenako ho mbola malemy ankehitriny; ary ireo zanakalahin’i Tseroià ireo dia mahery setra loatra miohatra amiko. Ny TOMPO anie hanafay azy araka ny ratsy nataony.
Currently Selected:
2 Samoela 3: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.