TIT 3
3
Khirstain Asam" Aved.
1Mung" dain ri vhoeb khang" nyid bang: yo' amyeing" akhang ci: bang: da" vhoo: moo tam' gyo: nyid wa ziyo' ge da" moozoo" jid: zoo: jo, moo jo, ri zei: soo, wa jen" jen" nghoid nyid wa shid re" re" da" byu yi ri tid poin" nyid we'. 2Nang ri nghoid loug we' age khyo" lu, wim gei sang: da" dang: ri atid loo: za: myenjham" ngei pyoo: tung" zoem" khau: veing" goo" wa ziyo' khanham we' byu dangain" bang: ri nu" nham, nheigloem: shed nyid baja"- nyangnu" ri tid poin" nyid we'. 3Khasu" wim gari shid' phyang" gi ngoonu" nyang: we' myid fang: boem- atam" gyo: ziyo' shoid vhang: khyoo: dam: dam: bang: nghoid nyid boem. ngoonu" gi aco' ajhoid ziyo' mougmyid pyo: da" khyoo: aja: ja: ri cang lo yu" boem bye. Hau: khyoo: mo join, we' nghoid nyid boem bye. Ngoonu" moo khanham we' anoug angei go" ziyo' noo" goo" zoo go" ziza: bo nyid boem- gootu: byu yi ngoonu" ri anoug angei ziyo' dakhyoo" ti"- ngoonu" we' subi" ri anoug angei bang: nghoid. 4Nghoid loug we' ngoonu" da" khyoid' yu Aseing: Mangso da" jeju" yo' athang agoin da' nheigloem: thu myhang lo da" uri gi 5Ngoonu" gi loem goem khyoo: shau" yu boem bye:. Hid: yhang: ti" loem: jeung" khyo" shau" yu zigi ngoonu" nyang: zei: so' yoem kaid da" ge da" moozoo" daja: ja: mo yo" yu zi anghoid. Ciwim gari nya: da" nheig khyeug je ju yoomo za hid: yhang: ti" doem khu: yu ziyo' sen: gyid yo' ced" kyeing shed" shang: pyam ziyo' nyang: gi nyhang" nu" ri khyoid' yu bye. 6Mangsoo gi nyhang" ri khyoid yu Aseing Yesu khoug: moo gyeungshang: da" Venyi ri yha" da" atho' moo agoin ayu: foid shoin" byid: bye. 7Houg su" nghoid nyid da" khyoo: gi ngoonu" gi nya: da" jeju" yo' Mangsoo vho: ngei lho: lheom: kham: yu mo, yo" bue" lo wigi ngoonu" myid byu to" da" apyaid ato: kangso ri yo" shau" myang kham: yu wa shid re" nghoid. 8He: da" dang: gi dang: deing khoin" nyang: nghoid bye:- Mangsoo ri loem, khoug: bang: gi byu yug khang" mo" shid mo akyu" bo lho: ge lho da" moo" ri zei: wa shid re"
ayo, byid: wa khyoo: ri gooki" lid' ayang: koid lho: jhau" shed nyid wa ziri ngoo vho: ngei nyid. 9Nghoid loug we' ce: akyu" abo da" akoo" afang: ga: myed: da" ngeug se: dang: myid: joem- thang ase da" byuxeig shab khyoo: myeing" myoo: yhoo: she: khyoo: yo" tarha" joem ri jang" pyam we'.Khasu" wim garihau: da" khyoo: joem gi akyu" abo ziyo' akoem: za: danghoid nyid. 10Byo, gang: go" lo" khyoo: ze" bue" kaid' su: rigi atham: thang eig lheing: koo: tid poin" tid kyeung" thang: ri nyang: yo' tei" goo" xo' go" khyoo: ci" we' ayhe: koid loo. 11Houg: yhang: te" su: gi byo, yoin" joem: thang loo" su: nghoid nyid yoomo nya: da" youg: noo yooboo joem gi nya: gung ri nyang: dang: phyed nyid su: nghoid ziri nang se' nyid bye.
Thang Thang Khyoo" Shid Dang:
12Artima ri anghoid lang" gi Tukhiku ri re" jhang khyoo ngoo nhang: kaid' lang" Nikapoli voogung khyoo: ngoorire" shau" we' Khasu" wim ga ri hau" voo moo ngoo ngam" ayo, nyid: lhai: kaid' wa ngoo myid phyed' too bye. 13Tarha" Sara zena yo' Apolo gi nya: eig yug gyung: yo" so" loo" wa shid mo ci" we' aca" sho' nya: eig yug ri joeb, joeb, soin' nhang: kaid' we'. 14Akhid" nyang: ca" yo nyid akhyoo: joem, ri-yo" joeb, byeung" nhang: sho' yha: da" byu yi nyang" nu" da" ayo, joem ri ge da" moozoo" ri ci: yhung: wa shid re" jhau" yu goo" baja". Nyangnu" da" kangso dei lo" khyoo: moo ce: phoug" adab kangso' age dei nyid.
15Ngoo yo' dage" nyid bang: dangain" mo, gi nang ri vhu" kaid' boem ago loem" jeung" khyoo: moo ngoonu" da" bidnoem yi ri bo vhu" byid: we'.
Mangso jeju" gi nanu" dangain" bang: yo' dage" dajo, jo, baja" o".
Currently Selected:
TIT 3: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.