SHOLUMON JIKHOIN" 8
8
1Ngoo gi nang ri nga" yhid noug" shoin" mang: nhung" yhang: ti" bui" nhang: nau zi nghoid.
Hougsu" nghoid lang"- ngoo nang ri khyoo: moo shoug" go" uri
babug bug nghoid loug we' hang" nheig yoo: wa zi anghoid.
2Ngoo gi nang ri nga" yhid da" yhoem: khyoo: shu" lo" wigi
nang ngoo ri jheddab myid yo' jhau" byid: wa zi nghoid.
Ngoo gi nang ri nam pyo: zabyid yhid: byid: wigi
nga" lamei shi"- zabyid yhid: ri byid: jhug wa zi nghoid.
3Nya: lo, kung" lo, gi nga" vhuloem vhoo: moo kaid to" wigi
lo, yo lo, yo' ngoo ri po: ci: wa zi nghoid.
4Yerusalem mo myiyi: zoo: yi we"
nanu" gi ngoonu" da" jheddab myid ri alhu: nhung" wa ein:
ngoo ri dangsoo" byid: we'.
Khyug Loem: ein: da" Jikhoin"
Myiyi: myhi' yi
5Nya: jhed yo' lo, zei: go" wigi
myid coo: boem khyo" lo nyid su: gi hang" nghoid lha".
Myiyi: myhi'
Nang khu: da" joyoo he: da" shi" sang" gam gyid" moo
nang ri ngoo nhoug" too' bye: zi nghoid.
6Nang gi nga" re" nghoid nyid yoomo
gooyug ri jheddab myid acang byid: yen".
Re" lo, gi hang" ri we' azei: ngoo ri za: zei: we'.
Jheddab myid gi shid: gyoin' noo gyoin da" yoem: so' yo' du nyid da:.
Jheddab kang: tei" khyoo: gi nyang: gung nyang: ri yo" shid: nhang: da" yoem: so' bo nyid da:.
Hau: zigi myi: yhang: ti" nge" boug lo lho: gye" thain: da" myi: yo' du nyid da:.
7Hau: ziri gyid yo' we' ayo" said nghoid da:.
Tigyid yo' we' ayo" nghoeb pyam nghoid da:.
Nyangnu" ziyoo ngei sheing: yo' jheddab myid ri qei wa shid re"
yoem: kaid nghoid loug we' nyangnu" dangain" wigi
avhoo: angei zi kyeing" shoug" wa zi nghoid.
Myiyi: Myhi' da" Nya: Mang: Bang:
8Ngoonu" moo ngoonu" da" nya: nhung"
myiyi: zoo: dayug nyid.
Nya: noug" ngei shi" zi nghoid da:.
Yuggi nu" ri mho' uri nya: shid re" ngoonu" khasu" koid wa lha".
9Nyang: vang khyam: nghoid rigi ngoonu" nyang: ri ngei gyi pyuzung koid byid: wa.
Nyang: vang khoem" nghoid rigi ngoonu" nyang: ri
shamu thi" khyam" yo' kyam' go too" wa zi nghoid.
Myiyi: myhi'
10Ngoo gi vang khyam: nghoid wigi nga" noug" gi hau: da" gyi pyuzung nghoid nyid da:.
Ngoo gi nga" jhed gi nyang: yo' dage" nghoid ri
ngoo ngei pyo: yug yoo nyid ein: ziri nyang: se' nyid da:.
Yuggi Phoo"
11Sholumon gi Bala Hamon ga: da" jhang: moo zabyid khyam: dakhyam: yo" da:.
Houg: moo moo" zei: wa byu yiri nyang: shu" to" wigi
yugkhang" moo" ri ngei pyi" dakhyeing" khyeing" byid: da:.
12Nga" jang" moo ngoo seing: da" zabyid yoo dakhyam" jo,.
Sholumon gi ngei pyi" dakhyeing" yo' khab' yu nghoid loug we'
ngoo gi moo" zei: bang: ri eig shoo: shoo: byid: wa zi nghoid.
13Nga" jhed we" hau: khyam: khoug: mo re" thui: ri ngoo ri shoug" gyoo: nhang: we'.
Nga" byencang" yi we' re" dang: thui: ri tam" gyoo: wa shid re" lang" nyid boem ago".
Myiyi: myhi'
14Nga" jhed we" lobain gam yug da" boem moo xaid zoo: yhang: ti" we'
shoocid: loo: yhang: ti" we' nga" jhang khyoo: re" loo we' o".
Currently Selected:
SHOLUMON JIKHOIN" 8: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.