NGOUG JI: 2
2
Yerusalem Ri: Aseing wigi Yooboo Dam Byid: Khyoo:
1 Aseing gi nyang: nheig yo: wigi Ziun ri: ceig no, ziyo' nghoeb to".
Nyang: gi mougkhung: mo gyi: sheung: reung: da" khyoo ri:
byo, yoin" khyoo: bue" loo" nhang: bye:.
Nyang: nheig joem: yo: lo da" bidnyid moo:
nyang: gi nya: Noku Yhoem: Moo" rilang" she: pyam too" khari" bye:.
2 Aseing gi nheig akhyeug loo: za:
Yuda mung" mo voogung khang" moo" ri phyo shoin pyam bye:.
Hau: mung" hau: meing: ri goem loem byid: da" gyidab joem ri we'
phyo khyo pyam byid: bye:.
Nyang: gi hau: khokham mungdain: yo'
vhoeb khang" bang: ri myonhoo: shoem: loo" nhang: bye:.
3Nyang: gi nya: nheig joem: yo: wigi Israela yi da" yoem: ri
phyo sain" pyam byid: bye:.
Gyivoo joem re" lo da" ayo, moo nyang: ngoo ri
apang" yu nghoid da:.
Nyang: gi ja: khang" moo" ri phyo sain" pyam da" myi: yhang: ti"
nya: nheig joem: yo: da" zigi ngoonu" ri ngi" bye:.
4Nyang: gi gyivoo dayug ri yhang: ti" nya: myoovhu" gi
ngoonu" khyoo: yeung to".
Nyang: gi ngoonu" ngei pyoo: ngei lhoo' za:
nyid mo, dangain" ri said pyam byid:.
He: Yerusalem moo nya: da" nge" nyid nheig joem: yo khyoo: ri
ngoonu" shoug" kham zo: boem bye:.
5 Aseing gi gyivoo dayug yhang: ti" Israela ri phyo shoin pyam bye:.
Nyang: gi Israela da" gyidab joem yo'
Khokham khoo" joem ri byo, yoin" jo, nhang: bye:.
Nyang: gi Yuda byumyu" yi da" tho' moo:
athang agoin da" kougshu: khyoo: ci: ri" byid: abye:.
6Nyang: gi ngoonu" nyang: ri noku lid: lo da"
Noku Yhoem: Moo" ri ajab, amoin" koid phyo sain" pyam byid: bye:.
Nyang: gi gyeung" shang: bidnyid yo' doug no: bidnyid ri thang byug nhang: bye:.
Khokham yo' khainjung phoo gi nya: nheig joem: yo: khyoo: ri
dage" shoug" loem zo: abye: go".
7 Aseing gi nya: da" xoin" ngei" phoin: ri ngeug pyam wigi
nya: gyeung" shang: Noku Yhoem: Moo" ri we'
phyo sain" pyam khari" bye:.
Nyang: gi hau: da" vang kham: joem ri gyivoo joem wigi
phyo sain" pyam wa da" akhang" byid: bye:.
Shid phyang" ngoonu" gi ngei pyo: ziyo'
dalheing: coung" nghei lid loo bye: da" joyoo moo:
nyangnu" oung: doid da" khyoo: yo" yu ago".
8 Aseing gi Ziun vang khyam: joem gyoeb, moin" pyam ca" ga:
myid phyed pyam gu: nghoid bye:.
Nyang: gi hau: gu: bain sho' phyo sain" pyam wa ziri
deing" deing nyang: yo" se' yu sho' hau: vang khyam: ri bain ke' yu" bye:.
Gyipyu' zung yo' vang khyam: joem gi akhid" dage" byo yoin" leung jo, bye:.
9Vang khyam khoem" moo" joem gi mhoid soid boem khoug: moo: noeb leung jo,.
Houg: mo khoem" kyang youg: joem gi ajab, amoin" khyau" sain" pyam zi shoug" bye:.
Khokham" yo' zoug: ludaid yigi akhid" pyoung" she: lo" zi shau" abye: go".
Tarha" ri we' ajhoug" byid: lo: ziyo'
Lapi: yi we' Mangso jang" mo yoeb myang: ri we' ashau" myang boem loo: nghoid ago".
10Yerusalem mo phoug" mang: yigi myid keing: doem: moo sam: zoo: zhung: jo, boem.
Nyangnu" gi nyang: nya: vhuloem tho' moo: pheilhoug: geug shoin" ci: lho:
nyangnu" gung moo gi: jid: moo" byimi ri yeug ci: ago".
Zoomyi: nu" yigi nyangnu" da" vhuloem ri myidjang khyoo: goeb, goem" ci: ago".
11Ngoo gi ngau nyid yoomo myo, kyoem: bye:.
Nga" Venyi gi: dayam, dayoo: myid myo: nyid.
Nga" byumyu" yigi byo, yoin" zi shoug" lo" boem yoomo kougshu: wigi nga" yoem: goin byug bye:.
Zooshang: yi yo' noug" nu" yigi voomoo" khoug: mo
fu" moo" khyoo: joem moo mo, leung jo, boem ago".
12Nyangnu" gi zooyoid gyid shed zoore nyangnu" da" nya: myhi' bi" ri: yoid ngau nyid boem.
Nyangnu" gi dam dab, mo, yhang: ti" fu" moo" khyoo: moo: lu: leung yen" ago".
Houg: yoomo nya: myhi' be" da" shid khoin khoug: moo: zo" re re shid: lo" ago".
13O" Yerusalem we"- ngoo jheddab thang da" Yerusalem we"-
ngoo khasu" se' tho' tid loo: wa lha". Ngoo khasu" nang ri nheig yo" teing byid: wa lha".
Hid: yhang: ti" hang" dayug we' yo" kham' zoo: wa zi anghoid.
Nang byo, yoin" lo" zigi atho' ke' da" Nammugdara yhang: ti"
thang ga: zi ajo, yoomo ge bui" wa da" nheig byu jang: ci: we' ajo, loo.
14Re" da" lapi: yigi nang ri mhau' tid wa tho' moo jain" lho:
tid kyoo" wa zi ci: we' ayoo" loo: nghoid ago".
Nyangnu" da" tarha" kho" dang: gi re" yooboo ri khanham we'
apau: thu' loo: nang ri mhau' pyam nyid ago".
Nyangnu" gi nang ri nheigloem: thid aca" ga: myid nhang: nyid.
15Voomoo" khyo" so" lid: lo" da" mung" byu yigi
nang ri coem yu" juang" ago".
Nyangnu" gi vhu" pyi: pyi: wigi byo, yoin" lo" ziri: juang" yi ago".
He: zigi yu" jhed tung" da" voomoo" nghoid la".
He: zigi mougmyid da" myonhoo: sho: joyoo nghoid la"» ga: tid ago".
16Re" da" gyivoo joem dangain" gi nang ri coem' juang" lho: zhoug yu" to" boem.
Nyangnu" da" nhoid ri pyoin" lho: ngoonu" gi hau: ziri phyo shoin pyam bye:.
He: bidnyid gi ngoonu" nheig byu to" bidnyid nghoid ga: coem nyhab ago".
17 Aseing gi nyang: koid wa ga: kyug nhain' lid loo: bye: da" moo" zoo" ri
lo" thang moo zei: bue" kaid bye:.
Goonham mo nyang: tid poin" lid: lo da" ziyo' dayhang: ti" ngoonu" ri
nheig khyeug myid aboo loo: za: lhu: phyo' pyam bye:.
Nyang: gi ngoonu" da" gyivoo joem ri oung: doid loo" nhang: bye:.
Nyang: gi ngoonu" leung lo" da" jang" moo: nyangnu" ri ngei pyoo: nhang: bye:.
18O" Yerusalem we"- re" vang khyam: joem Aseing jhang khyoo: yoid mho' goo" baja".
Re" da" ngoug byid joem gi: gyid lang joem yhang: ti"
nyid" ri myen" ri yau nyid baja". Nanya: gung nanyang: ri ngau lho:
kougshu: wigi wigi joem: thang loo" nhang: we'.
19Damyen goin" goin" doem so" to' ri" ri" wim nyid wigi Aseing ri mho' yoid nyid we'.
Re" nheigloem: ri thoid yu lho: re" zooshang: shid re"
fu" moo" khyoo: kang" khyi' khang" moo" moo:
zooyoid shid: lo" nyid da" zooshang: yi shid re" nheig khyeug yu zi shau" sho' mho' we'.
20O" Aseing we"- yu" we' nang ciwim yoomo ngoonu" ri hid te" da" yooboo byid: la".
Myiyi: yigi nyangnu" jheddab da" zooshang: yi manggung ri zo: nyid ago".
Khainjung yo' lapi: yigi Aseing da" gyeung" shang: da"
Noku Yhoem: Moo" moo: nyang: nyang: said shid: nyid ago".
21Phoug" mang: yi yo' zooyam yigi fu" moo" khyoo: moo: shid: leung jo, boem.
Zoolu: yi yo' myiyi: yigi gyivoo joem da" shamcoin" wigi
thau" said pyam zi shau" ago".
Nang nheig yo: nyid da" bidnyid moo nyangnu" ri
nang nheig akhyeug loo: za: said toem" pyam abye:.
22Nang gi nga" da" ayam, aqei: goem: sho' moo byu shoo" zo: shug da" gyoug ci' noem ri
koid shug wa shid re" nga" gyivoo joem ri khe: too" bye:.
Houg: yoomo nang nheig yo: nyid da" hau: bidnyid moo:
hang" we' ayo" loid loo" nghoid ago".
Nyangnu" gi ngoo coung: gyi: lho:
jheddab nyid da" nga" zoo yiri said pyam byid: boem ago".
Currently Selected:
NGOUG JI: 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.