GALATI 2
2
Polu Yo Gootu: Lagyoo: Yi Da" Khyoo:
1Hau: thang: ri daxe: myid: zain lailo" thang ri Titu ri bo shu" ci: lho: Barnaba yo' dage" Yerusalem voomo" khyoo: ngoo doem do, lo. 2Ngoo hidsu" do, lo" khyoo: gi Mangsoo byid: da" yoeb myang yoomo nghoid- vhu" jhung: yi kyeing" phoung da" zoeb, phung: moo tung bau byumyu" yi ri ngoo kho" kyo" da" ngei bu: lu dang: da" khyoo: ri tid phoid: sho' kyo- Khasu" wim gari shid' phyang" we' akhid" we' ngoo zei: so' voin vu, nyid da" moozoo" ri akoem: amyed aji abue" loo nhang: noug yoomo nghoid. 3Nga" byen cang" phoo Titu gi Heleni byumyu" nghoid- nghoid loug we' nyang: ri ayoid ayu" - athang: yham" wa shid re" aphoug akhyoid' akoid nhang: boem. 4Byu yi dayham" koem gi nyang: ri athang: yham" pyam' nhang: nau boem- houg: bang: gi Khristu Yesu yo' daloem: za: bue" wigi kangso dei nyid yoomo ngoonu" yo" yu bye: da" loid byoin akhang" ri kin-yu koid wa shid re" Khristain mang nhung bue" mhau' lho: yha" da" phung: moo bo gau" vang loo mo, nghoid boem ago- nyangnu" gi ngoonu" ri join, koid noug mo, nghoid nyid boem ago". 5Nghoid loug we' hau: ngei bu: lu dang: da" deungmain" khyoo:- nanu" shid re" dageung: teung jo, baja"- ngoonu" gi nyangnu" ri daminid' za: lang" asoem" byid: khyo, nyhoem: pyam' boem wa zi anghoid.
6Myo, nhoo: yo" da" vhu" jhung: yi,, ein: soin: too" shau" bang: gi nyangnu" hang" nghoid boem zigi nga" shid' re" gi ce" yhaug: gyen: we' anghoid- Khasu" wim gari Mangsoo gi nghe: shoid' khyo myang lhoo za: dang: aphyed' ngoori phajhi" byid: da" khyoo: aseig ci" we' abyid: boem nghoid da. 7Nyang: nu" gi ngoori phajhi' aseig byid: wa gungkhoo:- Mangsoo gi Petru ri athang: yham" kham' byid: da" Yuda yi ri hau: ngei bu: lu dang: kho" kyoo" wa yoovoin, byid: to" ziyo' dakhyoo" ti"- ngoori gi athang: aphyed' da" tung bau byumyu" yi ri kho" kyoo" wa yoovoin, ab, byid: bye: da" khyoo: ri nyangnu" myang se' boem bye. 8Khasu" wim gari Mangso da" yoem: moo" so' zeing khyo" Petru ri Yuda byumyu" yi shid re" lagyo: aya moo tang: too" byid: ziyo' dakhyoo" ti"- ngoori we' tung bau byumyu" yi shid' re" lagyo: aya moo tang: too" byid: bye. 9Hougsu" ngoori byid: too" bye: da" jeju" ri zheung: myang da" uri phoung: da" zeing bung: te" vhu" jhung: zheung: nghoid nyid da- Yaku, Petru yo' Yohan gi Mangsoo ngoori byid: to" da" kooki" lid' da" yoovoin ri-lazoem" asoo" so" too" byid: boem bye- Hougsu" nghoid yoomo ngoonu" dangain" bang: gi moo" voin, luxoem" cang" yi nghoid da" khyoo: alhoo: ri thoin" shug khyoo" wigi nyangnu" gi Barnaba yo' ngoori lo, yo lo, khyo" lo, zei: zei: yu boem bye- Ngoonu" gi tungbau byumyu" yi jang" moo moo" voin wigi nyangnu" rigi Yuda byumyu" yi jang" moo moo" voin wa shid re" myid veung" to" boem bye. 10Nyang: nu" gi ngoonu" ri asho" ajhen: bang: da" khyoo: moo pang" thoug yu wa da" khyoo: ri ato" myhid' wa khyoo: dakhaid za: pyeung: kaid boem- he: da" khyoo: gi ngoo gye" myid to' ziyo' voin, vu, nau da" moozoo" nyang: nghoid nyid bye.
Antioki Voogung Moo Petru Ri: Polu Gyikoid Da" Khyoo:
11Nghoid loug we' Antioki voogung khyoo: Petru ju" yhe: uri nyang: zei so nyid da" avoid asam" gishoid nyidda" khyoo: gi bang bang nyang: nghoid nyid yoomo ngoo ginyang: ri mung" byu yi da" shid' khoin" moo gyi koid. 12Yaku nhang: kaid da" byu yi houg: moo aju" ri" shi" da" shid' moo Petru gi tungbau mang nhung" yi yo' dage" voem: shoin" zo: nyid ago- nghoid loug houg: nhang: kaid da" byu yi ju" re" da" uri athang: yham" bye: bang: ri gyoug yoomo tungbau byumyu" yi yo' voem: shoin" zo: nyid jang" mo yho' thu lo. 13Yuda mangnhhung" gooji yi we' Petru yo' dage" seing" ayang" mo, yhang: ti"- bo zheung: thu' lo" boem yoomo Barnaba lang" nyangnu" yo' bo yho' thu lo" nyid. 14Akhid" nyangnu" gi ngei bu lu dang: da" deingmain" da" khyoo: moo dain: dain: aso" nyid boem ziri ngoo shau" myang lang" gi nyangnu" dangain" bang: da shid' khoin" moo Petru ri nang gi Yuda byu nghoid lho: wigi Yuda byu yhang: ti" anghoid- tungbau byu yi yhang: ti" kangso dei nyid lho: tungbau byumyu" yi ri Yuda byumyu" yi yhang: ti"- kangso dei wa shid' re" khasu" koid yo" nyen" nhang: wa lha". ein: wigi ngoo tid pye.
Yuda Byu Yi Yo' Tung Bau Byu Yi gi Loem" Jeung" Ziyo' Khyoid yu Shau" Da" Khyoo:
15Ngoonu" gi khu: lo bidnyid mo nyang- Yuda byumyu" nghoid nyid Youg: noo yooboo yo" da" tungbau byumyu" yi,, ga: myeing myheung shau" bang anghoid boem. 16Nghoid loug we' byu xangsu: yi gi toung: to" da" tarha" ri cang pyeung da" moozoo" yo' Mangso shid khoin" moo yo" deing byeung" lo" zi anghoid- Yesu Khritstu ri loem" jeung" da" shoid khyo" za: dayo" deing byeung" lo" ziri ngoonu" se' boem- Ngoonu" we' toung: to" tarha' ri cang byeung" khyo" wigi anghoid loo: za: Khristu yesu ri leom" jeung" da" yoomo Mangso shid' khoin" moo deing byeung" bang: bue" loo goo" baja" ga: Khristu Yesu ri loem" jeung" lo boem bye- Khasu" wim gari hau: toung: to" da" tarha" ri cang pyeung" da" moozoo" yo' hang" we' Mangso da" shid' khoin" moo deing byeugng" zi ayo" yu. 17Hougsu" nghoid yoomo ngoonu" gi Khristu yo' dadeing: daloem: za: bue" loo bye: khyo" Mangso shid moo yo" deing byeung" loo baja"- ein: yoem: kaid jang" moo ngoonu" nyang: we' tungbau byumyu" yi yhang: ti"- yooboo yoo" mo, nghoid khyoo: bang thu' lo rigi Khristu nyang: yoobo da" moozoo" ri voin, vu, nyid su: nghoid ein: yo" tid wa la". Kha: khyo" we' age tid. 18Khasuwim gari ngoo xang: shed" ri lhu: phyo' sain" pyam bye: da" toung: to" da" tarha" akhyoo" ri ngoo deom tu: zhoug nghoid rigi ngoo gi toung: to" da" tarha" ri shoid vhang": su: nghoid ziri toin" shid nyid. 19Toung: to" da" tarha" yo' sen: lho: wigi tid shang ga: rigi toung: to" da" tarha" wigi nyang: ngoori said' pyam bye: yoomo ngoo gi shid: mang danghoid lo- hau: zigi ngoo Mangso shid mo dei nyid wa shid re" nghoid- ngoo gi Khristu yo' dae"- nya: da" pyang" zeing moo baid' jen" said' zi ngoo shau" bye. 20Houg: yoomo ngoo nya: gung nyang: dei nyid lo: zi anghoid- Khristu gi ngoo moo kangso dei nyid akhid" ngoo hid: dei nyid da" kangso gi ngoori jheddab yoomo nga" shid re" nya: kangso xoin" to' pyam da" Mangso nya: zoo: ri loem" jeung" da" khoug: moo dei nyid da"Kangso danghoid. 21Ngoo gi Mangso jeju" ri he: ngeug pyam wa zi gyo: nyid su: anghoid- Khasu" wim gari byu yi gi toung: to" da" tarha" yo' Mangso shid khoin" moo yo" deing byeung" lo" nghoid rigi Khristu gi amyed aji moo akoem: za: te: shid: kham: pyam bye.
Currently Selected:
GALATI 2: LCL
Highlight
Share
Copy
Want to have your highlights saved across all your devices? Sign up or sign in
Lacid Bible © Bible Society of Myanmar, 2009.