NEHEMIAH 2
2
Nehemiah Jerusalem Ah A Feh
1Siangpahrang Artakzaksis in siangpahrang a ṭuan kum kulnak, Nisan#Nisan thla cu atu March le April hrawng hi Hebru mi pawl ih nithla siarnak in thla khatnak a si. thla ah, voikhat cu siangpahrang bawipa rawl a ei laiah sabitti cu ka pe. Hi hlan ahcun mithmaisia ih ka um i hmu dah lo. 2Curuangah, “Ziangah so na riah a siat? Na dam lo a si lo ahcun na lung a dam lo a si hi!” tiah i ti.
Cutikah ka thin a phangzet ih, 3“Maw Siangpahrang bawipa, na nunkhua sau hram seh. Ka pupa pawl an phumawknak khawpi siatbal thluh in le a kotka pawl ur ciam thluh ih a um laiah hin ziangtinso riahsia lo cun ka um thei ding?” tiah ka ti.
4Siangpahrang bawipa cun, “Ziang tuah so na duh?” tiah i sut.
Cutikah Van ih Pathian hnenah thla ka cam hnuah, 5siangpahrang hnenah cun, “Maw siangpahrang bawipa, ka parah na lung a awi ih ka lo dilmi i pe ding a si ahcun Judah ram, ka pupa pawl an rak phumawknak khawpi ah i thlah hram aw; cuih khawpi dinsal ka duh a si,” tiah ka ti.
6Siangpahrang bawinu cu a kiangah a to ih siangpahrang bawipa cun, “Ziang can so na rei ding? Ziangtikah so na rakir sal thei ding?” tiah i sut. Ka rei ding can cu ka sim ih thlah dingah a lung a kim.
7Cule siangpahrang hnenah cun, “Bawipa, na lung a kim a si ahcun Judah ram tiang ka feh suak theinak dingah Eufrates Nitlaknak lam pengih ram uktu Mangki bawi pawl hnenah ca i ngan sak hram aw. Judah ram ka thlen hlan lo anmah in tluang tein in fehter ding. 8Cun siangpahrang ih tupi thing pawl kiltu Asaf hnen ihsin Biakinn hauhruang kotka hrang, khawpi kulhnak phar hrang le ka umnak inn hrangah zanthing i pek theinak dingin a hnenah ca i ngan sak hram aw,” tiah ka dil. Mi zaangfahnak neitu Pathian kut cu ka hnenih a um ruangah, ka dilmi hmuahhmuah cu siangpahrang bawipa in i pek ṭheh a si.
9Siangpahrang bawipa in keimah thlahtu ah ralbawi hrekkhat pawl le rang ralkap pawl a fial ih Eufrates Nitlaknak ram lam ahcun ka feh. Ka thlen tikah cuih peng uktu Mangki bawi pawl hnenah siangpahrang bawipa ih ca cu ka pek. 10Asinain Beth Horon khuami Sanballat le Ammon mi bawi pakhat Tobiah in, Israel mi pawl ṭhatnak le thawvennak ngaihtuah dingah mi pakhat a ra, ti an theih cun thin nuam lo zetin an um.
11Cun Jerusalem khawpi ah ka va thleng ih ni thum sung ka cawl. 12Jerusalem hrang hnaṭuan dingah Pathian in ka thinlung sungih i simmi cu zohman ka sim lo. Cule zanah ka tho ih ka rualpi mi malte thawn kan feh. Zianghman kan keng lo; ka tomi rang pakhat lawng kan keng. 13Nitlaknak lam Phairawn Kotka in ka suak ih thlanglam ah suk in Rulhreng Cerhti ka lan ih Hnawm Kotka ka thlen ah zan a si lai. Ka feh phah ah khawpi kulhnak phar pawl a siatmi pawl le mei ih an ur thluhmi kotka pawl cu ka zoh phah vivo. 14Cun ka so ih Cerhti Kotka le Siangpahrang Tili ka thleng. Ka tomi rang cun a cimmi lung le thing lakah lamzin a hmu thei lo. 15Curuangah Kidron phairawn sungah ka ṭum ih rang par in phar pawl cu ka zoh phah vivo. Ka pawhnak hmun ka thleng sal ih Phairawn Kotka cun khawpi sungah ka lut sal.
16Bawi pawl pakhat hmanin khuitawk ka feh ti le ziang ka tuah, ti an thei lo. Judah mi pawl, puithiam pawl, an hotu pawl, an bawi pawl le hnaṭuannak ih a teltu ding pawl pakhat hnen hmanah zianghman ka ṭong hrih lo. 17Atu lawngah an hnenah hiti in ka sim: “Jerusalem khua cu a siat thluh ih kotka pawl tla ur thluh a si ruangah ziangtluk vansaannak sungah so kan um, ti cu nan hmu. Khawpi kulhnak phardawl cu dinsal uhsila kan thangsiatnak hi rehter uhsi,” tiah ka ti. 18Cule Pathian ka hnenih a umzia le i bomnak pawl ka sim ih siangpahrang bawipa ih ṭongmi pawl tla ka sim ṭheh.
Cutikah, “Tho uhsila dinsal uhsi,” an ti. An tim an tuah ih hnaṭuan cu an thok lohli.
19Sikhalsehla Sanballat, Tobiah le Arabia mipa Geshem an timi in kan thil tuah tummi cu an theih tikah in hnihsan ih, “Ziang kan tuah, tiah so nan ruah? Siangpahrang kan dodal ding nan ti maw si?” ti tiangin in hmuhsuam.
20Cule kei in, “Van ih Pathian in hlawhtlinnak in pe ko ding. Kannih cu a siahhlawh kan si ih a siatmi saksaal ding cu kan ṭuan ko ding. Asinain nannih cu Jerusalem ahhin covo nan nei lo; thu nan nei lo ih ham ding zianghman nan nei lo,” ka ti hai.
Currently Selected:
NEHEMIAH 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.