ṬAHHLA 3
3
Hremnak, Sirawknak Le Ruahsannak
1Pathian ih hremnak a harzia,
A thinhengnak fungfek,
A theitu ka si.
2Tleunak um lo khawthim sungah,
Pil deuhdeuh in i tuul.
3Zaangfahnak zianghman um loin,
Sunvu cat loin i vuak a si.
4Ka vun a thlek ih ka tit a lang,
Ka ruh pawl khal a khiak ṭheh.
5A pit zetmi thawnginn ah i khum,
Vansan thinharnak thawng sungah.
6Ka duh lo cing in i umter,
Thihnak khawthim rimsia lakah.
7Thir cikcin in i khit,
Luat dingah ruahsannak nei lo
thawngtla ka si.
8Pathian hnen bomnak dilin ka au,
Asinain ka aunak a ngai duh lo.
9Sawn phah rero in ka feh,
Ka hernak kipah lungphar in
i kham.
10Savom bangin i bawh,
Kiosa vekin i zon.
11Lamzin ihsin i dawihlo,
I bauhthlek ṭheh ih i tlansan.
12A li a nawp ih,
A conkiang hmui bahmi ah
i tuah.
13A conkiang in i sai ih,
Ka lung sungah thukpi a lut.
14Miphun pawl in sunvu in hnihsan,
An hrangah cun hnihsuahsainak
zokzeetnak hla meen ka si.
15Ka duh lo cingin tikha i inter ih,
A khami tuarnak cu rawl bangin
i eiter.
16Ka hmai cu leilung ah i rawt ih,
Lungto ah ka ha a khiak ṭheh.
17Hnangam daihnak in in tlansan,
Lungawinak cu ziangvek a si
tihman ka ciing nawn lo.
18Reipi ka nung nawn lo ding,
Bawipa hnenih ka ruahsannak
a cem zo.
19Inn le lo nei loih ka tuar rero
hi ka ruah tikah ka hrangah
a khami thih sii a si.
20Cumi catbaang loin ka ruat ih
Ka thin a nau cuahco.
21Asinain ruahsannak a ra tlungsal,
Hi thil pakhat ka theih tikah cun:
22A hmunmi Bawipa ih duhdawtnak cu
Ziangtik hmanah a cat dah lo;
A zaangfahnak cu net ni a nei lo.
23Zinglam khawvang bangin a thar
ringring;
Rintlak a sinak cu a nasa a si.
24Ka covo cu Bawipa lawng a si;
Curuangah ka ruahsannak
a hnenah ka re ding.
25 Bawipa cu a ṭha a si,
Amah a ringtu pawl hrangah cun.
26Thinsau zetin hngah cu kan hrangah
a ṭha bik,
Amah ih in runnak hngah cu.
27Cuih thinsaunak zir cu
No lai caan ah a ṭha bik.
28Harsatnak kan tuar tikah,
Thinsau le daizirziar in to
ding kan si.
29Tangdornak thawn lukuun ding
kan si;
Ziangahtile ruahsannak a um hrih
thei meen.
30Hmuhsuammi le vuakmi kan si
hmanah, tuar cuahco ṭheh
ding kan si ko.
31 Bawipa cu mi zaangfahtu a si,
Kumkhua cun in hnong lo ding.
32Riahsiatnak in pe hmansehla,
A lainatnak cu a lang ding;
In duhdawtnak cu rintlak a si.
33Lungawinak zianghman a nei lo,
Kan ninghannak le kan tuarnak
ah hin.
34 Bawipa in a thei ṭheh,
Thawnginn ah leilung ih palcih
kan si tikah cun.
35Amah in a thei ṭheh,
Amah ih pekmi covo kan ngah lo
tikah cun.
36Amah in a thei ṭheh,
Thuṭhennak hmun ih thudik
an dinpi lo tikah cun.
37 Bawipa ih tumtahnak tel loin,
Zianghman tuahsuak a si dah lo.
38Cungnungbik thupekmi vekin,
a ṭha le a sia an cang fingfing.
39Ziangah so minung an phunzai rero,
An sual ruangih hremmi an si
tikah cun.
40Kan nuncan hi zohhliah sal uhsila
Bawipa hnenah kirsal uhsi.
41Vancung Pathian hnenah kan kut
lawng si loin kan thinlung khal
hlan uhsi.
Cule hiti in thlacam uhsi:
42“Na hmai ah kan sual ih kan lo
dodal zo;
Cule, Maw Bawipa, nang in in
ngaithiam lo.
43Na thinhengnak in na thuam aw;
Zaangfahnak zianghman nei loin
in dawi ih in that.
44“Na ai-thawhnak khawdur cu
Kan thlacamnak in a pah tlang
thei lo.
45Nangmah in fihnung hnawmhne ah
in tuah,
Leilung pumpi miphun hmaiah.
46“Kan ral pawl hmuahhmuah in
hmuhsuam nautatnak ṭongkam
thawn in roh.
47Siatsuahnak le hlohralnak kan
tong zo;
Thinphannak le ṭihnunnak sungah
kan um.
48Ka minung pawl siatralnak an ton
ruangah ka mitthli cu tiva
bangin a luang.
49“Ka mitthli cu cerhti bangin
Cat loin a puut ringring.
50 Bawipa in vancung ihsin,
I run zoh ih i hmuh hlan lo
a cat dah lo.
51Ka riah a sia ih ka thin a na,
Khawpi sung nunau pawl parih
Thil a thlengmi ruangah cun.
52“Vate bangin thang in in awk,
Thuhla um lo ih i huatu ka ral
pawl cun.
53Ka nungcingin khur sungah
in thlak,
Lungto in an khuh a kaa ahcun.
54Tidai in i khum cuahco,
Ka thi cing ding a sihi, ka ti.
55“Khur sung tawdeng ihsin,
Maw Bawipa, nangmah ka lo ko.
56Ka aunak ngai dingih ka lo dil
tikah i theihsak a si.
57Ka aunak aw cu i let ih,
‘ṭih hlah aw,’ i ti.
58“Keimah ṭan dingah na ra ih,
Maw Bawipa, ka nunnak cu na run
ngah zo.
59Ka thu cu felzetin i ṭhensak aw;
Ka parih an dik lo zia cu
na thei ko.
60Ka ral pawl in in mitkem zia le
In phiar zia cu na thei ṭheh ko.
61“Maw Bawipa, in hmuhsuamnak le
In phiarnak hmuahhmuah na
thei ṭheh.
62Sun ni-hlawh ka thu lawng an rel ih
Keimah zuarthlainak lawng an
ngaih tuah.
63An to ah siseh an din ah siseh
in puahcok ih
Hnihsuahsainak ah in hmang.
64“Maw Bawipa, hiti an tuah
ruangah hin cawh awla
hrem hai aw.
65Siatserh hai awla thinlung
harnak in khat hai seh.
66Na thinheng in hawlsuak hai awla,
Leilung par ihsin hloralter
ṭheh aw.”
Currently Selected:
ṬAHHLA 3: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.