JOSHUA 2
2
Joshua In Jerikho Ah Thlingthlatu A Thlah
1Cule an riahnak Shittim ihsin thlingthlatu pahnih a thupte in Joshua in a thlah ih, “Va feh uhla an ram le an khawpi Jerikho va thlingthla hnik uh,” tiah a fial. An feh ih Jerikho khua an thlen tikah hlawhhlang nu Rahab ih inn ah an riak. 2A cuih thu cu Jerikho ih siangpahrang hnenah, “Kan khua le kan ram thlingthla dingah Israel mi zanah an ra thleng,” tiah an sim. 3Cutikah Rahab hnenah cun siangpahrang in mi a thlah ih, “Kan ram pumpi thlingthla dingah a ra ih na innih a riakmi pawl rak suah aw,” tiah thu a pek.
4Sikhalsehla Rahab cun Israel mi pahnih cu a thup ih siangpahrang hnenah cun, “Ka inn ah mi hrekkhat an ra ngai a si; asinain khuitawk khua in an ra ti ka thei lo. 5Khua a thim cuahco ih khawpi kotka an khar zik zawng ah an rak feh ngah. Khuitawkih feh an tum ti khal ka thei lo; asinain zamrang teih nan dawi a si ahcun nan man ko ding,” tiah a ti. 6Rahab in thlingthlatu pahnih cu a inn tlun diphun ah a kaipi ih a tlartlar-ih a retmi khumla ko lakah a thuh. 7Cule siangpahrang ih ralkap pawl cun an dawi ih khawleng an thlen vete in kotka cu an khar. Jordan tiva thleng tiangin ralkap pawl cun an dawi.
8Israel mi pahnih an ih hlanah Rahab cu a inn tlun diphun ahcun a hung kai ih, 9“Bawipa in hi ram cu a lo pek zo ti ka thei. Kan zatein kan thin a phang ngaingai ih kan ram pumpi hi a khur thlohthlo a si. 10Izipt ram ihsin nan suah tikah nan hmaika rori ah Bawipa Pathian in Tipi Sen cu a roter, ti kan thei zo. Cuih tlunah Jordan tiva ihsin nisuahnak lamah Amor miphun ih siangpahrang pahnih Sihon le Og nan that ti kan thei fawn. 11A cuih thu kan theih vete in kan thin a phang sinsin. An lo ṭih ruangah mi hmuahhmuah an tha a nau thluh. Bawipa nan Pathian cu vanih Pathian a si ih leilung ih Pathian khal a si. 12Curuangah nanmah ṭhateih ka lo kilkhawi bangtuk in kan innsang pawl khal nan kilkhawi ve nak ding le nan thutiammi vekih nan thlunnak dingah Bawipa ih hnenah siatcam in thu kam uh. Cule rintlak nan sinak langternak dingah thukam awhnak in pe uh. 13Ka nu le ka pa siseh, ka unau pawl le an sungte pawl siseh, humhim uhla in that hram hlah uh,” tiah a ti.
14Cutikah thlingthlatu pahnih cun, “Kan lo tiammi vekin kan tuah lo a si ahcun Pathian in kan nunnak in la ko seh. Kan thil timi hi in phuang lo a si ahcun hi ram hi Bawipa ih in pek tikah kan lo kam ciami cu kan thlun tengteng ding a si,” tiah an ti.
15Rahab ih inn cu khawpi kulhnak ralhruang thawn dai-aw ih sakmi a si; curuangah a sangkate ihsin hridai in a lengah a vun thlak hai. 16“Hramlakah tlan uh; culole siangpahrang ih ralkap pawl in an lo hmu pang ding. A lo hawltu pawl an ra kir hlan lo, ni thum sung va relh uh. Cuih hnuah nan duhnak ah nan feh leh ding,” tiah a tiamta.
17Cule thlingthlatu pahnih cun, “In tiam vekin kan thlun ding. 18Ngai hnik! Nan khua kan siim tikah, in thlaknak sangkate ah hi hridai sen hi rak khit leh aw. Na pa le na nu, na ṭapa pawl le na pa ih innsang an zatein na inn ah hin rak khawm thluh aw. 19Pakhatkhat na inn ihsin suak tahratin lamzin ah a feh ih a thih a si ahcun amah ih mawh a si ding ih kannih sual a si lo ding; asinain na inn sung na hnenih ummi pakhatkhat in tuahmawhnak a tong a si ahcun kanmah ih mawh a si ding. 20Sikhalsehla kan thil timi hi na phuan ih in phiar a si ahcun kan thukammi in in kai lo pei,” tiah an ti. 21Cule Rahab cun, “Nan ti vekin ka lung a kim a si,” tiah a ti. Cule Rahab in a thlah ih an feh; a senmi hridai cu a sangkate-ah cun a khih.
22Thlingthlatu cu tlangpar hramlakah an feh ih an relh. Cule siangpahrang ralkap pawl cun an ram pumpuluk in ni thum sung an hawl. Pakhat hman an hmuh lo ruangah Jerikho khua ah an kir sal. 23Cutikah thlingthlatu pahnih cu tlangpar ihsin an ṭum ih tiva an tan hnuah Nun ih fapa Joshua hnenah cun an feh ih an theihmi thu hmuahhmuah an sim. 24Annih in, “An ram pumpi in Bawipa in in pe zo, tiah kan zum. An minung zatein kan thawmvang an theih tikah an thin a phang ngaingai a si,” tiah an ti.
Currently Selected:
JOSHUA 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.