1 THESALON 2
2
Thesalonika Khua Ih Paul Hnaṭuannak
1U le nau pawl, nan hnen kan ra thlen cu a lak a si lo ti kha nanmah rori in nan thei. 2Thesalonika khua ih kan ra thlen hlanah Filipi khua ah tisiatnak le dekcoknak kan tuar zia khal nan thei zo. Cubangtuk in dodalnak tampi a rak um naón Pathian in ralṭhatnak in pek ih amah ih Thuthang ṭha cu nan hnenah kan phuang. 3Kan lo simmi thu-ah hin palhnak a um lo, thinlung thiang lo sung ihsin a rami khal a si lo, mibum kan tum ruang khalah a si lo. 4Pathian in simter in duhmi kan sim, ziangahtile Thuthang ṭha phuangtu dingah in hniksak ih rintlak in in hmu a si. Milai lungawiter kan tum lo, sikhalsehla kan thinlung in hmutu Pathian lungawiter kan tum a si. 5Nan theih vekin nan hnen kan ra thlen laiah khan nanmah porhnak ṭongkam kan hmang lo; kan hamṭamnak khuhtu ding ṭongkam khal kan hmang lo; Pathian cu in theihpitu a si. 6Nanmah ih hnenin siseh, midang hnen khalin siseh, thangṭhatnak ngah kan duhmi a si lo. 7Khrih ih tirhthlah kan si vekin nan hnen ihsin cubangtuk cu a ngen ngamtu ding khal kan si ko naón cumicu kan tum mi a si lo. Nu in a faale a cawm ih dimdoihnak thawn a tuamhlawm hai vekin nan hnenih kan um laiah khan thinnemnak thawn kan um a si. 8Kan lo duhdawtzet ruangah Pathian Thuthang ṭha lawng hman si loin kan nunnak rori khal hi hlawm kan lo duh a si. Kan duhdawtzetmi nan si zo. 9U le nau tla, baangzet le harzet in hna kan ṭuan ṭheu cu nan thei ko. Pathian Thuthang ṭha nan hnenih kan phuan tikah nan hrangih thilrit kan si lonak dingah sunzan hna kan ṭuannak a si.
10Nannih a zumtu pawl lakih kan umtlandan cu a thiang le a dikmi, soiselnak um lomi a si. Hi thu ahcun nanmah rori hi in theihpitu nan si vekin Pathian khal in theihpitu a si ve. 11Pa in a faale pawl a kilkhawi bangin nannih khal kan lo kilkhawi ti cu nan thei. 12A Uknak le a sunlawinak lo hlawm dingih a lo kotu Pathian lungawiter dingih nung thei dingah cat loin kan lo forh, kan lo hnem ih tha kan lo pek a si.
13Cule Pathian hnenih lungawi thu kan sim sannak dang a um lai. Pathian thu nan hnen kan thlenpi tikah khan minung ih thu si loin Pathian ih thu a si ti nan thei; cuti nan theihmi cu Pathian thu taktak a si ih nannih in cumi cu nan pom ngah zo. Ziangahtile zumtu pawl nan sungah cuih Pathian thu in hna a ṭuan a si. 14U le nau tla, Judea ramsung Pathian kawhhran pawl le Khrih Jesuh minung pawl ih tonmi thil cu nannih khalin nan tong ve a si. Judah mi pawl in an rak hrem bangtuk in nannih khal nanmah ih ramsungmi lala in an lo hrem a si. 15Judah mi cu Bawi Jesuh le profet pawl a thattu an si ih kanmah hremtu khal an si. Ziangtluk Pathian ninghangtertu so an si! Mi hmuahhmuah dodaltu an si! 16Zentail mi hnenih rundamnak Thuthang ṭha sim ding hman in rak dawn. Cuticun an rak tuah ringring ṭheumi sualnak cu a pittawp an thlenter ih a netnak ah Pathian ih thinhengnak an parah a rung thleng.
Paul In Thesalonika Tlawn Sal A Duh
17U le nau tla, kan thinlung cun kan ṭhen aw lo naón kan taksa in caan tawite sung nanmah thawn kan ṭhen awk tikah hin kan lo ngai zet ih nanmah lo ton sal ding lawng kan zuam rero a si. 18Nanmah ra tlawn sal kan duh. Kei tla cu voi tam nawn nanmah ra tlawng dingah ka tum rero naón Satan in kan lamzin in kham ṭheu. 19Thungai ti-ah cun, midang niamter cuang loin, nanmah hi kan Bawipa Jesuh a ra thlen sal ih nehnak thawn a hmaiih kan din tikah, kan ruahsannak, kan lungawinak le kan hmaihngalnak nan si ding. 20Nanmah hi kan hmaihngalnak le kan lungawinak taktak nan si.
Currently Selected:
1 THESALON 2: FCL
Highlight
Share
Copy
Want to have your highlights saved across all your devices? Sign up or sign in
Falam Bible Revision © Bible Society of Myanmar, 2002.