Tôbita 13
13
Tononkiran’i Tôbita
1Ary hoy i Tôbita hoe:
2«Hankalazaina anie Andriamanitra,
Ilay velona mandrakizay!
Hankalazaina anie ny fanjakany!
Fa manasazy Andriamanitra, dia mamindrafo;
Izy no mampidina ny olona any amin’ny toeran’ny maty,
dia hatrany amin’ny fanambanin’ny tany;
Izy koa no manala avy amin’ny fahaverezambe.
Tsy misy zavatra afa-midify ny fahefàny.
3Ry Israelita, mankalazà an’Andriamanitra
eo anatrehan’ny hafa firenena nanelezany anareo;
4teo koa Izy no naneho halehibiazana taminareo.
Asandrato Izy eo anoloan’ny miaina rehetra,
satria Izy no Tompontsika,
Izy no Andriamanitsika sy Raintsika#13.4 Raintsika: ampit Is 63.16; 64.7.;
Izy no Andriamanitra amin’ny taona rehetra.
5Manasazy anareo Izy noho ny fahadisoanareo
kanefa hamindrafo aminareo rehetra,
ary hanangona anareo avy amin’ny firenena rehetra
izay nanelezana anareo.
6Rehefa amin’ny fo manontolo sy aina manontolo
no hiverenanareo amin’Andriamanitra
mba hanao ny marina eo imasony,
dia hiverina aminareo koa Izy
ary tsy hanafin-tava aminareo intsony.
7Jereo àry ny nataony ho anareo,
ka isaory amin’ny vava tontolo Izy.
Ankalazao ny Tompo mpandala ny rariny
ary asandrato ilay Mpanjaka mandrakizay.
8Izaho kosa misaotra Azy tokoa
atỳ an-tany namaboana ahy atỳ#13.8a atỳ an-tany... atỳ: izany hoe ny faritr’i Ninive..
Ny hery amam-pahalehibiazany
no asehoko amina firene-mpanota#13.8b firene-mpanota: ny vahoaka Israely no ambara amin’izany..
Miverena amin’Andriamanitra, ry mpanota ô,
ary manaova ny rariny eo imasony.
Iza moa no mahalala?
Fa angamba hanambina anareo Izy
ary koa hamindrafo aminareo.
9Manandratra an’ilay Andriamanitro aho;
ny amin’ny mpanjakan’ny lanitra
no mampientan-kafaliana ny aiko.
10Aoka ny olona rehetra, ao Jerosalema,
hanambara ny halehibiazany sy hisaotra Azy!
Ry Jerosalema tanàna masina ô,
nosazîn’Andriamanitra ianao
noho ny toetran’ireo mponinao;
kanefa Izy mbola hamindrafo indray
amin’ireo zanaky ny olo-marina.
11Koa ataovy tsara ny fisaorana Azy,
ankalazao ilay Mpanjaka mandrakizay
dia haorina indray amin-kafaliana
ny Toeramasina eo anivonao.
12Aoka ianao no hampifalian’Andriamanitra
an’ireo voababo rehetra,
sy hanehoany fitiavana ny ory rehetra
eo amin’ny taranaka rehetra ho avy!
13Hazavana manjopiaka ao aminao
no hamiratra amin’ny lafin-tany rehetra.
Vahoaka marobe, avy any lavitra,
no ho tonga eo aminao;
ary ny mponin’ny vazan-tany rehetra
no hankeo amin’ilay Andriamanitrao masina
ka hitondra ny fanatitra eny an-tanana
ho an’ilay Mpanjakan’ny lanitra.
Ao aminao ny taranaka mifandimby
no haneho ny hafaliany, ry Jerosalema;
ka ny anarana hoe ‹Voafidy› no hiantsoana anao
eo amin’ny taranaka ho avy.
14Ho voaozona anie izay rehetra hiteny mandrahona anao!
Ho voaozona anie izay rehetra handrava anao
sy handrodana ny mandanao,
mbamin’izay rehetra hampianjera ny tilikambonao
sy handoro ireo tranonao, ry Jerosalema!
Fa hotahîna mandrakizay kosa
izay rehetra manaja anao.
15Amin’izay, ry Jerosalema, mirosoa mifaly
noho ny amin’ireo zanaky ny olo-marina
satria ho tafavory izy rehetra
mba hankalaza ilay Tompo mandrakizay.
Sambatra ireo mankamamy anao;
sambatra ireo mientan-kafaliana
amin’ny fiadanana manerana anao.
16Sambatra izay rehetra malahelo anao
noho ny amin’ny famaizana nanjo anao;
satria hientan-kafaliana ao aminao izy,
ary ny hafaliana feno anananao
no hiombonany mandrakizay.
Ny aiko dia mankalaza ny Tompo,
ilay Mpanjaka lehibe,
17satria ho voaorina indray i Jerosalema
ary hijoro mandrakizay ao amin’io tanàna io
ny tranon’ny Tompo.
Ry Jerosalema ô, ho faly tokoa aho
rehefa hatrizay ny sisa tavela amin’ny taranako
dia hahita ny famirapiratanao
ary hisaotra ilay Mpanjakan’ny lanitra.
Ny vavahadinao dia haorina
amin’ny safira sy emeralda;
ny tilikambonao dia harafitra amin’ny volamena
ary ny fanamafisana azy dia hatao volamena madio;
ny arabenao dia ho vita rary vatosoamena
sy vato voafantina avy any Ofira#13.17 Ofira: jereo 1 Mp 9.28 sy nta. Ny 13.17 manontolo dia ampit Is 54.11-12; Apôk 21.18-21..
18Ny vavahadinao no hipoiran’ny hiran-kafaliana
ary ny tranonao rehetra dia handredonana hoe:
Haleloià!
Hankalazaina anie ilay Andriamanitr’i Israely!
Ary ireo notahîny dia hankalaza ny anarany masina
hatrany hatrany ary mandrakizay.»
Currently Selected:
Tôbita 13: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.