Nomerỳ 2
2
Ny filahatr’ireo foko tao amin’ny toby
1Niteny tamin’i Mosesy sy i Aharôna ny TOMPO nanao hoe:
2–Ny Israelita dia samy hitoby eo akaikin’ny vondron-tafiny sy ny fanevan’ny fokony avy. Ny toby dia tsy maintsy manodidina ny Tranolay fihaonana kanefa lavidavitra azy.
3-8«Amin’ny lafiny atsinanana no hisy ireo tafika lohalaharana mivondrona ao anatin’ny tobin’i Joda, ka ahitana mifanila ny tafika jodeanina sy jisakarita ary zebolonita. Ny vatan-dehilahy voaisa ho afa-mitam-piadiana dia hotarihin’ny filoha anankiray avy amin’ny fokony araka izao:
ho an’ny fokon’i Joda dia i Nahasôna zanakalahin’i Haminadaba, miaraka amin’ny vatan-dehilahy 74 600#2.3 Ny hoe 74 600, sns... dia mety mivaky hoe andiany 74 misy vatan-dehilahy 600, sns...;
ho an’ny fokon’i Jisakara dia i Natanaela, zanakalahin’i Tsohara, miaraka amin’ny vatan-dehilahy 54 400;
ho an’ny fokon’i Zebolòna dia i Eliaba zanakalahin’i Helôna, miaraka amin’ny vatan-dehilahy 57 400.
9Ny vatan-dehilahy ao anatin’ny tobin’i Joda dia mitontaly 186 400. Ireo no mpialoha lalana ny vahoaka israelita.
10-15«Amin’ny lafiny atsimo no hisy ireo tafika mivondrona ao anatin’ny tobin’i Reobena, ka ahitana mifanila ny tafika reobenita sy simehônita ary gadita. Ny vatan-dehilahy voaisa ho afa-mitam-piadiana dia hotarihin’ny filoha anankiray avy amin’ny fokony araka izao:
ho an’ny fokon’i Reobena dia i Elitsora zanakalahin’i Sedeora miaraka amin’ny vatan-dehilahy 46 500;
ho an’ny fokon’i Simehôna dia i Selomiela zanakalahin’i Tsorisaday miaraka amin’ny vatan-dehilahy 59 300;
ho an’ny fokon’i Gada dia i Eliafasa zanakalahin’i Dehoela miaraka amin’ny vatan-dehilahy 45 650.
16Ny vatan-dehilahy ao anatin’ny tobin’i Reobena dia mitontaly 151 450. Ireo no mandeha faharoa.
17«Dia handroso ny Tranolay fihaonana sy ny andian’ny Levita eo anelanelan’ny vondron-tafika roa mialoha sy ny vondron-tafika roa manaraka. Handroso araka ny filaharany eo amin’izay itobiany ihany ny levita, ka hanaraka ny fanevan’ny tarika misy azy avy.
18-23«Amin’ny lafiny andrefana no hisy ireo tafika mivondrona ao amin’ny tobin’i Efraîma, ka ahitana ny tafika efraîmita sy manasita ary benjaminita. Ny vatan-dehilahy voaisa ho afa-mitam-piadiana dia hotarihin’ny filoha anankiray avy amin’ny fokony araka izao:
ho an’ny fokon’i Efraîma dia i Elisamà zanakalahin’i Hamihoda miaraka amin’ny vatan-dehilahy 40 500;
ho an’ny fokon’i Manase dia i Gamaliela zanakalahin’i Pedahatsoro miaraka amin’ny vatan-dehilahy 32 200;
ho an’ny fokon’i Benjamîna dia i Abidàna zanakalahin’i Gidehônỳ miaraka amin’ny vatan-dehilahy 35 400.
24Ny vatan-dehilahy ao anatin’ny tobin’i Efraîma dia mitontaly 108 100. Ireo no mandeha fahatelo.
25-30«Amin’ny lafiny avaratra kosa no hisy ireo tafika mivondrona ao anatin’ny tobin’i Dana, izay ahitana mifanila ny tafika danita sy aserita ary naftalita. Ny vatan-dehilahy voaisa ho afa-mitam-piadiana dia hotarihin’ny filoha anankiray avy amin’ny fokony araka izao:
ho an’ny fokon’i Dana dia i Ahihezera zanakalahin’i Hamisaday miaraka amin’ny vatan-dehilahy 62 700;
ho an’ny fokon’i Asera dia i Pagihiela zanakalahin’i Hôkràna miaraka amin’ny vatan-dehilahy 41 500;
ho an’ny fokon’i Naftalỳ dia i Ahira zanakalahin’i Henàna miaraka amin’ny vatan-dehilahy 53 400.
31«Ny vatan-dehilahy ao anatin’ny tobin’i Dana dia mitontaly 157 600. Ireo kosa no ho vodilaharana.
«Dia samy handeha miaraka amin’ny fanevany avy ireo vondron-tafika efatra ireo.»
32Ny vatan-dehilahy israelita voaisa araka ny foko sy araka ny toby nisy ireo tafika dia tafakatra 603 550 ny fitambarany. 33Ny Levita ihany no tsy natao fanisana niaraka tamin’ny Israelita hafa araka izay efa nandidian’ny TOMPO an’i Mosesy.
34Notanterahin’ny Israelita izany, araka ny nandidian’ny TOMPO an’i Mosesy; ka araka ny fanevany avy no nitobiany ary araka ny foko sy ny tarika nisy azy avy no niaingany.
Currently Selected:
Nomerỳ 2: DIEMDC
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.