Bel 1
1
Li Daniele la scontrain paleetic yu'un Bel#1.0 Li c'usi chal batel li'i ja' chalbe sc'oplal ti toj q'uexlal sba ti chich'ic ta muc' li c'usitic cuybilic ta dios li yanlumetic ti sts'aquinojan sbaic xchi'uc israeletique. Ti jech chac' ta a'yel li Daniele ja' ta xchol ca'itic c'u x'elan la spasbe li dios Bel xchi'uc li muc'ta chone. Xchi'uc chac' ta a'yel ti ven bolic li yanlumetic ti chich'ic ta muc' le'e.
1C'alal icham li ajvalil Astiagese, te bat yich' muquel ta smuquinal li anima stot sme'e, ja' icom ta xq'uexol Ciro ja' ti liquem ta Persiae.#Dn 6.28. 2Li Daniele ja' te jmoj oyic xchi'uc li ajvalile. Ja' no'ox stuc lec c'anbil, mu'yuc boch'o jech yan lec c'anbil ta scotolic ti boch'otic lec xotquin sba xchi'uc ajvalile.
3Te ta Babilonia oy jun c'usi cuybil ta dios ja' sbi Bel,#Cf. Is 46.1; Jer 50.2; 51.44; Bar 6.40. ja' li boch'o chac'beic smoton jujun c'ac'ale, ta xac'beic ech'em ta vaquib ciento (600) kilo li lequil arinae, xchi'uc cha'vinic (40) ta cot chij xchi'uc ech'em ta chib ciento (200) litro pasem ya'lel ts'usub. 4Li ajvalile te nabal ta xich' ta muc' ec. C'alal chbat sc'opanic scotol c'ac'al li c'usi la scuyic ta diose, yanuc stuc li Daniele ja' no'ox ta xich' ta muc' li Muc'ul Diose. 5Li ajvalile jech la sjac'be li Daniele:
—¿C'u yu'un ti ma'uc chavich' ta muc' li Bele? —xut.
Jech la stac':
—Li vu'une ma'uc ta xquich' ta muc' li c'usi cuybil ta diose, ti pasbil no'ox ta sc'ob cristianoe. Ja' no'ox ta xquich' ta muc' li cuxul Diose, ti boch'o la spas banamil vinajele, yu'un ja' yajval scotol c'usitic li cuxule —xut.
6Jech la stac' li ajvalile:
—¿Me mu xach'un ti cuxul li dios Bele? ¿Me mu chavil ti scotol ta sve' xchi'uc ta xuch' jujun c'ac'ale? —x'utat.
7Li Daniele lic sjapo tse'imol, jech laj yalbe:
—Mu me xalaj ta lo'lael, ajvalil. Le'e pasbil no'ox ta lum li yute, ta spat xocone pixbil no'ox ta cobre taq'uin, ta melel mu'yuc bu ve'em mu'yuc bu uch'bajem —xut.
8Jech yu'un li ajvalile toj ilinel ic'ot, lic stac ta iq'uel li yajpaletaque jech laj yalbe:
—Ti me mu xavalbicun li boch'o ta sve' li matanale, ta xachamic, yu'un ti me chavaq'uic ta q'uelel ti chve' li Bele, ja' ta xcham li Daniele, yu'un ta xac' ta chopolc'optael li Bele —xut.
9Li Daniele jech laj yalbe li ajvalile:
—Ac'o c'otuc ta pasel li c'usi laj avale —xut.
Li paleetic yu'un Bele, ja' lajuneb xchanvinic (70) ta scotolic, ja' mu'yuc atbil li yajnilic xchi'uc xnich'nabique. 10Li ajvalile laj yic' batel Daniel ti bu pasbil sna Bele. 11Li paleetic yu'un Bele jech laj yalic:
—Q'uelavil li vu'uncutique ta xiloc'cutic batel li'i. Li vo'ote, ajvalil, paso mantal avil ti ac'o yich' ac'bel sve'el xchi'uc pasem ya'lel ts'usub yuch' li Bele, ja'o xlic amac lec comel li ti'nae ac'bo comel senyail ta yixtolal ac'ob, xvinaj ta sob oc'om c'alal chbat aq'uele. Te chavil me mu'yuc sve'oj scotol li Bele, jech xu' chichamcutic me naca no'ox chcalcutique. Me jech chcalcutique, ja' ac'o xcham li Daniele, yu'un xvinaj ti naca no'ox ta snop jmulcutique —xiic.
12Li stuquique jun no'ox yo'nton oyic, yu'un sna'ojic xa ti spasoj yochebic ti c'uxi xu' ta x'ochic ta mucul ta yolon mexae, sventa xu' ch-ochic ta sve'el yuch'el li matanaletique.
13Ti c'alal loq'uemic xa'ox li paleetic yu'un Bele, li ajvalile laj yac'be comel sve'el li Bele. 14Li Daniele la spas ta mantal li smozotac ti ac'o xbat yich'ic tal tan c'u cha'al svijic comel ta yut sna li Bele. Li Daniele mu'yuc xa yan boch'o laj yil ja' xa no'ox li ajvalile. C'alal ilaj yo'ntonique, iloq'uic. La smaquic lec comel li ti'nae, laj yac'beic comel senyail ta yixtolal sc'ob li muc'ta ajvalile, jech ibatic. 15Li paleetique italic ta xc'uxul ac'ubal yu'un jech nopenic. Italic xchi'uc yajniltaquic xchi'uc xnich'nabic, jech lic sjapoic ta ve'el xchi'uc ta yuch'el scotol li matanaletique. 16Li ajvalil xchi'uc Daniele ic' to iliquic. 17Li ajvalile jech lic sjac'be li Daniele:
—¿Me tijbil chavil li senyaile? —xut.
—Mu'yuc tijbil, ajvalil —xi li Daniele.
18Jech lic sjamic li ti'nae. Li ajvalile ta ora la sq'uel batel li bu cajal li matanale, jech tsots lic avanuc: “¡Ta melel toj ech'em amuc'ul Bel! Mu xalo'lavan atuc”, xut.
19Li Daniele te lic sjapo tse'imol, te lic spajes li ajvalile ti mu to x'och batel ta yutile, jech laj yalbe:
—Q'uelavil, q'uelavil li banamil li'i nopo ca'itic boch'o yav yacanic li' lavajtique —xut.
20Itac'ov li ajvalile:
—Ta xquil ti ja' yav yacan viniquetic, antsetic xchi'uc ololetique —xi li ajvalile.
21Ilic ep sc'ac'al yo'nton ta ora, lic stac ta iq'uel li paleetic xchi'uc yajniltaquic xchi'uc xnich'nabic. C'alal ivulique, laj yaq'uic ta ilel ti bu yochebic ta mucul ti ch-ochic ta sve'el li c'usitic oy te ta mexae. 22Li ajvalile laj yal mantal ti ac'o yich'ic milel scotolic li paleetique, xchi'uc noxtoc i'ac'bat ta sc'ob Daniel li Bele, ti ac'o sjines xchi'uc snae.
La smil muc'ta chon li Daniele
23Oy jun muc'ta chon,#1.23 Muc'ta chon - Oy ono'ox jayibuc lumetic ti chich'ic ta muc' li chonbolometique. Ja' jech la spas li egiptoetique xchi'uc jech van la spasic ec li babiloniaetique, ja' la spasbeic sloc'obal c'usiticuc no'ox chonbolomal, xchi'uc la spasbeic sloc'obal cristiano. Ja' jech ta svun Sab 11.15 xchi'uc ta 15.18-19. Chal ti ech'em q'uexlal sba ti jech tspasic te ta Egiptoe. ja' yich'ojic ta muc' li babiloniaetique. 24Li ajvalile jech laj yalbe noxtoc li Daniele:
—Mu me xaval ti pasbil ta taq'uin noxtoque. Cuxul ta melel, lec xve' xchi'uc lec x'uch'baj. Mu me xanop ti ma'uc cuxul diose, ja' lec ich'o ta muc' —x'utat.
25Li Daniele jech la stac':
—Li vu'une ja' no'ox ta xquich' ta muc' li Muc'ul Dios cu'une, yu'un ja' no'ox ti cuxul Diose, ech'em to jech chac c'u cha'al li vo'ote, ajvalil, ac'o ave, vu'un ta jmil li chon le'e, yu'un mu persauc ta te' ta machita —xut.
26Itac'ov li ajvalile:
—Te jechuc —xi.
27Li Daniele la stsac xuch', xepu xchi'uc tsotsil jolal jmoj la span. C'alal ita'aje, lic spisanan jech bat stic'be ta ye li chone. C'alal la stic'be ta yee, jech ta ora ijat xch'ut, jech laj yal li Daniele:
—Q'uelavil li c'usi chavich'ic ta muq'ue —xi.
28C'alal laj ya'yic li babiloniaetique, tsots lic ilinicuc, lic scontrainic li ajvalile, jech laj yalic:
—Li ajvalile laj xa spas sba ta judío, yu'un laj xa svuq'ues li Bele, xchi'uc laj xa smilan li paleetique xchi'uc li muc'ta chone —xiic.
29Ic'otic ta stojol li ajvalile, jech laj yalbeic:
—Ac'bun ta jc'obcutic li Daniele, me mu xavaq'ue vo'ot ta jmilotcutic xchi'uc scotol avalab anich'nabtac —xutic.
30Jech yu'un c'alal laj yil li ajvalile, ti ven tsots c'usi tsc'an tspasique, jech ta tsatsal sujel laj yac' ta c'abal li Daniele.
Ja'o c'alal iyich' tiq'uel ta xch'en leonetic li Daniele
31Jech la stiq'uic ta xch'en li leonetique, te ijalij vaquib c'ac'al. 32Te ta ch'ene oy vucub leonetic te oy, te chaq'uilanbeic sve'el jujun c'ac'al; chib sbec'tal cristiano xchi'uc chib chij sve'elin. Ta jun c'ac'al mu'yuc bu laj yac'beic sve'el, yu'un ja' xa slajeb chbat yich' aq'uel ta ti'el li Daniele.
33C'alal jech ic'ot ta pasele, ja'o te oy ta Judea li j'alc'op Habacuque.#Hab 1.1. Naca to laj yo'nton ta smeltsanel ve'lil xchi'uc ta spasel pan sventa ta xich'be batel sve'el svinictac, yu'un ta sq'uiic trigo. 34Li yaj'almantal Muc'ul Diose jech laj yalbe li Habacuque:
—Li ve'lil laj ameltsan li'i ich'o batel ta Babilonia, chbat avac'be sve'el Daniel, yu'un te oy ta xch'en leonetic —x'utat.
35Itac'ov li Habacuque:
—Cajval, mu'yuc quiloj li Babiloniae xchi'uc mu jna' bu li xch'en leonetic chavale —xut.
36Jech yu'un li j'almantal yu'un Muc'ul Diose ta ora la stsacbe ta stsotsil sjol, la xchech batel li Habacuque te bat ac'atuc ta Babilonia ti bu oy sti' xch'en li leonetique. Ta stsatsal yic'al ye no'ox iyich' iq'uel batel ta anil. 37Li Habacuque tsots i'avan:
—Daniel, Daniel, la' ich'o ave'el yu'un la stac tal li Diose —xi.
38Jech laj yal li Daniele:
—Cajval, laj ataun ta na'el, mu'yuc chacomtsan li boch'o chayich'ot ta muq'ue —xi.
39Jech yu'un li Daniele, ilic sjapo ve'el. C'alal ilaj yo'nton ta ve'ele, li j'almantale laj yic' sutel li Habacuc ti bu iliquic tal ta ba'yuque. 40Ta svucubal c'ac'ale ital li ajvalile, tal yoq'uita li Daniele, inoch'aj ta sti' li ch'ene la sq'uel ochel, laj yil jun yo'nton te chotol li Daniele. 41Pat xi yo'nton jech tsots lic avanuc:
—Toj ech'em amuc'ul, Cajval, Dios yu'un Daniel, mu'yuc boch'o yan Dios jech chac c'u cha'al vo'ote —xi.
42Lic yal mantal ti ac'o yich' loq'uesel ta xch'enal león li Daniele, xchi'uc laj yal mantal noxtoc ti ja' ac'o x'ochic li boch'otic tsc'an chmilatic yu'une, te sq'uelojic ti c'alal ch'ambil ic'otic ta ye leonetique.#Dn 6.19,23-27.
Currently Selected:
Bel 1: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.