Tobit 14
14
Slajeb ya'yej slo'il Tobit#14 Li'i ja' chalbe sc'oplal ti toj jun yo'nton imalub o li Tobite xchi'uc chalbe jutuc sc'oplal c'u x'elan ic'ot ta pasel ta Israel xchi'uc ta Judá. Jech noxtoc la staq'ui comel xnich'on li Tobiase.
1Ja' jech ilaj sq'uejimol Tobit ti c'alal la stojbe ta vocol Diose.
2Li Tobite jech jun xa yo'nton icham ti c'alal yich'oj xa'ox lajchab svacvinic jabile (112). Lec laj yich'ic ta muc' c'alal bat yich' muquel ta Nínive. C'alal ja'o imac sate, yich'oj chib xchanvinic sjabilal (62). C'alal icha'jam li sate, laj to sta xcuxetel yo'nton, ep to la scolta li boch'o abul sbae. Te tstojilanbe o ta vocol Muc'ul Dios, xchi'uc chalilanbe sc'oplal ti toj ech'em smuc'ule.
3C'alal jutuc xa'ox sc'an xcham cha'ye, laj yic' li xnich'on Tobiase yu'un laj to staq'ui comel. Jech laj yalbe: 4“Querem, ic'o batel ta Media li anich'nabtaque yu'un jch'unoj c'usi laj yal li j'alc'op Nahume, ja' ti laj yal ti ta sta svocol li Ninivee.#Nah 1—3; Cf. Sof 2.13. Scotol li j'alc'opetic ta Israele tacbilic tal yu'un Muc'ul Dios, ja' laj yalic ti ta sta svocol li Nínive xchi'uc Asure. Scotol ta xc'ot ta pasel me sta sc'ac'alile, mu'yuc ta xch'ay jbeluc. Ja' lec batan ta Media yu'un te chacol. Oy yic'al ja' mu xacol me ja' te chabat ta Asiria xchi'uc ta Babiloniae, yu'un jna'oj lec ti ta persa chc'ot ta pasel c'usi yaloj li Muc'ul Diose, mu stselbuj ya'yejic li j'alc'opetique. Li jchi'iltactic ta Israelal ti li' nacajtique tspuc sbaic, ta xich'ic chuquel loq'uel li' ta lequil banamile. Li slumal Israele xocol ta xcom. Li Samaria xchi'uc Jerusalene xocol chcom noxtoc. Li xch'ulna Diose ta xc'ac', jech mu'yuc xa c'usi stu ta xcom o jayibuc c'ac'al. 5Li Muc'ul Diose ts'acal chlic c'uxubajuc ta yo'nton, jech cha'ic'atic sutel tal ta yosilal li Israele. Ta xcha'pasic li ch'ulnae, ac'o me mu jechuc jech chac c'u cha'al ta ba'yuque, ja' to me la sta li sc'ac'alile. Jech chlic suticuc tal li boch'otic loq'uemic batele, ja' xa ta spasic ta ven c'upil sba li lum Jerusalene. Ja' te ta spasic li xch'ulna Muc'ul Diose, yu'un jech ono'ox yalojic li j'alc'opetic yu'un Israele. 6Scotol li yantic lum ta sbejel banamile ta xtal yich'ic ta muc' ta scotol sjol yo'ntonic li Cuxul Diose.#Cf. Is 2.3; 60.1-3; Zac 8.20-23. Ja' xa ta scomtsanic li c'usitic cuybil ta diosetic ti ilo'laatic yu'une, ja' xa ta xich'ic ta muc' li Dios ta sbatel osile. 7Scotol li israeletic c'alal me la sta scolelic ta sc'ac'alile, chlic sna'ic ta scotol yo'ntonic li Muc'ul Diose. Ta stsob sbaic batel ta Jerusalén, ta xich'ic li yosil sbanamil Abrahame; te xa ta xnaquiic o ta sbatel osil. Toj xcuxet no'ox yo'ntonic yu'un laj yich'ic ta muc' li Diose. Yan stuc li jpasmuliletique xchi'uc li boch'otic tspasic c'usitic mu tuc'uque ta xich'ic ulesel ta banamil.
8“Lec oy, calab jnich'nab, ta xcalbot ava'ay, tunan me ta sjunul avo'nton ta stojol li Muc'ul Diose; ja' me paso li c'usi lec chile. Chanubtaso me li anich'nab ta spasel li c'usi tuq'ue xchi'uc ti ac'o scoltaic li boch'o abul sbaique. Chanubtaso ta yich'el ta muc' li Diose, xchi'uc ti ac'o yalbeic slequilal xch'ulbi ta scotol ora, ta scotoluc sjol yo'ntonique. 9Jnich'on, loc'an me batel li' ta Ninivee, mu me xacom li'i. 10C'alal me laj amuc te ta jts'el li ame'e, c'alal ta yorail jeche, mu xa me xacom jvoyuc li' ta lume. Yu'un laj xa quil ti toj chopol li c'usi tspasique, ep lo'lael, mu sna' xq'uexovic. Querem, na'o me c'usi la spas Nadab ta stojol Ajicar ti ja' sts'itesoje: cuxul la smuc ta banamil. Ja' Muc'ul Dios laj yac'be stoj smul ta scoj ti ch-uts'intavane. Li Ajicare ja' icoltaat loq'uel, ja' te itic'at yalel stuc li Nadabe, te i'ac'at o ta ic'al osil ta scoj ti c'an smil li Ajicare. Ta scoj ti lec tscolta li boch'o abul sbae ja' yu'un icoltaat loq'uel ti bu itic'van li Nadabe. Yanuc stuc li Nadabe ja' ibalch'uj yalel stuc, jech ich'ay o. 11Ja' yu'un querem, q'uelic me lec c'usi ta jtatic c'alal me chijcoltavane xchi'uc c'alal me ja' ta jpastic c'usi mu'yuc tuq'ue. Ja' me chiyac'utic ta lajel. Yu'un li vu'une ta xa xicham”, xi.
C'alal la xmochanic ta vaybale, jech icham. Lec la stuc'ulanic batel ti c'alal bat smuquique.
12C'alal icham noxtoc li sme' Tobiase, te bat smuc ta sts'el li stote. Jech yu'un li Tobiase iloq'uic batel ta Media xchi'uc yajnil xnich'nab, te ic'otic ta Ecbatana ti bu oy smoni'e. 13Li Tobiase la stuc'ulan li smoni' ti c'alal maluben xa'oxe, jech la smuc noxtoc ti c'alal icham ti te ta Ecbatana ta Mediae. Ja' laj yich'be comel c'usitic oy yu'un li smoni'e xchi'uc li stote.
14C'alal icham stuc li Tobiase, lec ich'bil ta muc', yich'oj xa vuclajuneb svacvinic (117) jabil. 15C'alal sc'an to'ox xchame, laj yil ta sat stuc ti laj yich' ulesel li Ninivee, xchi'uc laj yil noxtoc ti laj yich'ic chuquel li jnaclumetic yu'un ajvalil Ciaxares te ta Mediae.#14.15 Mediae - Li lum Ninivee laj yich' jinesel yu'un li Ciaxares, ja' li ajvalil ta Media banamil xchi'uc li Nabopolasare, ja' li muc'ta ajvalil ta Babilonia banamil ta yabilal 612 jabil sc'an xtal ta banamil li Cristoe. Te laj yalbe slequilal Muc'ul Dios ta sventa ti i'ac'bat stoj smulic li niniveetic xchi'uc Asiriae. C'alal sc'an to xchame, xcuxet no'ox yo'nton yu'un laj to yil ti la stoj smulic li niniveetique. Jech laj yalbe slequilal li Muc'ul Dios ti cuxul o ta sliqueb xchi'uc c'alal ta sbatel osile.
Currently Selected:
Tobit 14: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.