Nehemías 2
2
Laj yac' sutuc ta Jerusalén Nehemías li ajvalil Artajerjese
1Ta yual Nisán#2.1 Nisán - Q'uelo Yotol Israeletic. ta jtob (20) jabil yochel ta ajvalilal li Artajerjese, te ta xcac'be pasem ya'lel ts'usub yuch' li ajvalile. Laj yil ti ep ta xcat co'ntone, 2jech la sjac'bun:
—¿C'u yu'un toj ep chavat avo'nton?, pero mu'yuc ip chava'ay chquil. Yu'un van oy avocol —xiyutun.
C'alal jech laj yalbune, toj ep lixi'. 3Jech laj calbe:
—Ajvalil, vo'ot no'ox atuc ich'bilot ta muc'. ¿C'u cha'al muc ta xcat co'nton, yu'un jinesbil xa li jlumalcutic yo' bu mucajtic jmoltot jyame'cutique xchi'uc chic'bil xa ta c'oc' smac li coraltonetique?#2 R 25.8-10; 2 Cr 36.19; Jer 52.12-14. —xcut.
4Jech laj yalbun:
—¿C'usi chac'an un? —xiyutun.
Jech te lic jc'opan ta co'nton li Dios ta vinajele. 5Jech la jtac'be li ajvalile:
—Me chc'ot ta avo'nton li c'usi chcale, xchi'uc me lec chavilune, coltaun batel ta Judá te ta jlumal yo' bu mucajtic li jmoltot jyame'taque, yu'un ta xbat jcha'va'an —xcut.
6Li ajvalile te co'ol chotolic xchi'uc li yajnile, jech lic sjac'bun:
—¿Jayib c'ac'al chaxanov batel? ¿C'usi ora chasut tal? —xiyutun.
Laj calbe ti jayib c'ac'al chich'e, xchi'uc ti c'usi ora chisut tale, jech la scoltaun batel. 7Jech laj calbe noxtoc:
—Ac'anuque ja' lec chapasbun batel vun ta stojol li ajvaliletic ta smaleb c'ac'al#2.7 C'ac'al - Oy boch'o chalic jtotic. yu'un uc'um Eufratese. Yu'un jech chaq'uic jelovcun batel c'alal to chic'ot ta Judá. 8Xchi'uc pasbo batel vun noxtoc li Asaf, ja' li jchabi toyolal te'tic avu'une, yu'un jech xu' chiyac'bun jloq'ues te'etic sventa chtun ta smac sti' li cabildoe, xchi'uc li ti'coraltone, xchi'uc chtun ta sventa smac jna bu chinaqui —xcut.
Li ajvalile la spasbun scotol li c'usi laj calbee, yu'un la scoltaun li Muc'ul Diose.
9C'alal lic'ot ta stojol li ajvaliletic te ta smaleb c'ac'al#2.9 C'ac'al - Oy boch'o chalic jtotic. yu'un uc'um Eufratese, laj cac'be ta sc'obic li cartaetic yac'ojbun batel ajvalile. Li ajvalile laj yac'bun jchi'in batel banquilal soldadoetic, xchi'uc soldadoetic cajajtic ta ca'. 10C'alal laj ya'ay li Sanbalat banquilal te ta lum Horón, xchi'uc li Tobías banquilal te ta lum Amone, toj chopol laj ya'yic, yu'un la sna'ic ti oy boch'o tacbil tal ta sventa scoltael li israeletique.
La xchapan c'u x'elan chcha'pasic coralton li Nehemiase
11C'alal lic'ot ta Jerusalene, te no'ox oyun oxib c'ac'al. 12C'alal i'ech' oxib c'ac'ale, ta ac'ubaltic lilicutic xchi'uc jayibuc viniquetic. Pero mu'yuc boch'o laj calbe ya'ay li c'usi yalojbun Dios tsc'an ta jpas te ta Jerusalene. Mu'yuc boch'o yan cajal batel ta ca'. Jtuc no'ox cajalun batel. 13Te liloc' batel ta ti'coralton yo' bu Stenlejal sbie. Te libat ta stuq'uil li nio' Dragón sbie, xchi'uc ta ti'coralton ti Ch'ayub C'a'ep sbie. Te la jquil li coralton yu'un Jerusalén ti jinesbil xae, xchi'uc li smac coraltonetic ti chic'bil ta c'oq'ue. 14Te libat ta ti'coralton yo' bu Nio' sbie, xchi'uc ti bu Stanqueal Vo' Yu'un Ajvalil sbie. Pero li jca'e mu xjelov batel. 15Ac'ubaltic to ti c'alal limuy batel ta bevo' Cedrone, te la jquil c'u x'elan li coraltone. Ts'acal lisut batel ta ti'coralton ti Soplejaltic sbie.
16Li j'abteletique mu sna'ic me oy bu li'ay, xchi'uc c'usi la jpas. Mu'yuc laj calbe o ya'yic li judaetique, li paleetique, li banquilaletique, li j'abteletique, xchi'uc li boch'otic yan icoltavanic ta abtele. 17Ts'acal jech laj calbeic:
—Tana li'i chavilic ti toj abul jbatique, yu'un jinesbil li jlumaltique, xchi'uc chic'bil ta c'oc' li smac sti' coraltonetique. La' jtsob jbatic; jcha'pastic li coraltone, jech chlaj jc'oplaltic ta labanel —xcutic.
18C'alal laj calbe ya'yic c'u x'elan la scoltaun batel li Diose xchi'uc c'usi laj yalbun li ajvalile, jech laj yalic:
—Ja' lec liccutic xa ta abtel —xiic.
Jech te lic tsatsubuc yo'ntonic. 19Pero c'alal laj ya'yic li Sanbalat banquilal te ta lum Horón, xchi'uc li Tobías banquilal te ta lum Amón, xchi'uc li Gesem banquilal ta Arabee, chopol laj ya'yic; lic slabanuncutic, jech laj yalic:
—¿C'usi ti avochelic spasele? ¿Me yu'un chabajbeic smantal li ajvalile? —xiic.
20Jech la jtac'beic:
—Li Dios te oy ta vinajele ja' chac' c'otuc ta pasel cu'uncutic scotol. Vu'uncutic li yajtuneluncutique ta jcha'liquescutic spasel li lum Jerusalene. Yan li vo'oxuque mu xatic' abaic, mu aventaicuc yu'un ma'uc alumalic li Jerusalene —xcut.
Currently Selected:
Nehemías 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.