Lamentaciones 2
2
Ja' ta sventa Dios chich' oc'tael li lum Sione
1¡C'uxi ti solel i'ic'um ta sc'ac'al yo'nton Cajvaltic Dios li Sión ti toj jun yutsile!
C'alal to ta vinajel la sjipbe yalel li st'ujumal Israele;
pech'el ic'ot yu'un c'alal to ta banamil.
Ta scoj ti liquem sc'ac'al yo'ntone me jutuc mu'yuc la sna' ti ja' stec'um yacan li ch'ulnae.
2Li Cajvaltique laj yules o ta jyalel;
mu'yuc xtal xc'uxul yo'nton ta stojol.
La sjines ta sc'ac'al yo'nton scotol li naetic yu'un smomnich'nabtac Jacobe;
la sjines yalel c'alal ta banamil li tsatsal coraltonetic yu'un Judae;
la sbic'tajes o ta j'ech'el li ajvaliletic, xchi'uc li banquilaletic yu'unique.
3Ta yipal sc'ac'al yo'nton la slajesbe stsatsal li Israele.
C'alal itsacat yu'un li yajcontraique, li Muc'ul Diose la sloq'ues batel li svu'el ta stojolique;
xco'laj xchi'uc laj yac' tal c'oc' te ta stojol li Jacobe, jech la xchic' scotol li c'usitic la stae.
4Li Muc'ul Diose la st'inan lec st'ilesubil sflecha jech chac c'u cha'al jun jmilvanej;
la xmich' lec sbats'ic'ob jech chac c'u cha'al jun jcontrainvanej.
Laj yules scotol li c'usi toj c'upil to'ox sba chile.
Li sc'ac'al yo'ntone la smal batel jech chac c'u cha'al c'oc' te ta snaic li jnaclumetic ta Sione.
5Li Cajvaltique xco'laj xchi'uc yajcontra Israel ic'ot,
yu'un laj yules o li Israele.
La svuq'ues scotol li muc'tic naetique xchi'uc la sjines scotol li tsatsal coraltonetique.
Laj yepajesbe at-o'nton xchi'uc oq'uel ta stojol li jnaclumetic ta Judae.
6Li xch'ulnae la slomes jech chac c'u cha'al chich' tuquiel yaxna;
la soques o comel li snail tsobobbaile.
Laj yac' ch'ayuc ta o'ntonal li q'uinetic
xchi'uc li sc'ac'alil cuxub o'ntonal ti chich' to'ox pasel te ta Sione.#Is 1.13.
Ta scoj ti itsan sc'ac'al yo'ntone jech la sjip ta yo'nton li ajvaliletic xchi'uc li paleetique.
7La sjip o ta yo'nton li scajleb smotone;
la sbaj comel li ch'ulna yu'une.#Ez 24.21.
Laj yac'be ta sc'ob jcontrainvanejetic li coralton yu'un lume.
Xvochetic no'ox te ta ch'ulna jech chac c'u cha'al ta yorail q'uin.
8Li Muc'ul Diose laj yac' ta jinesel o li coralton yu'un Sione.
La sloq'ues o mantal ti ac'o yich' jinesele; mu'yuc la sutes o sc'op.
Laj yac' o ta at-o'nton li coralton xchi'uc li pac'benal naetique,
yu'un jmoj laj yac' ta jinesel scotol.
9Li macnaetique pac'al ta banamil icom scotol;
laj yich' c'asbel scotol li sbajubiltac ti lec tsotsique.
Li ajvaliletic xchi'uc li jpasmantaletic yu'unique te xa oyic ta yantic banamil ti bu mu'yuc chanubtasel ta smantal Diose.
Li paleetic yu'une mu'yuc xa c'usi ch-ac'bat yilic yu'un Muc'ul Dios noxtoc.#Sal 74.3-9; Ez 7.26.
10Li banquilaletic ta Sione ch'an xi te chotajtic ta banamil;
chaq'uic ts'u'ilum ta sjolic, tslapic c'u'il sventa at-o'nton.
Li stsebetic te ta Jerusalene tsnijan sbaic yalel c'alal ta banamil.
11Solel chmac xa jsat yu'un li ya'lel jsate, i'alub xa li co'ntone.
Xlaj xtu'p co'nton yu'un c'alal chquil oy ep svocolic li jchi'iltaque,
xchi'uc c'alal chquil chchamic ta vi'nal ta xoraltic li ololetic ti chchu'unic toe.
12Jech chalbeic li sme'ique:
“¿Bu ta jtatic li trigo xchi'uc li ya'lel ts'usube?”, xutic.
Xco'laj xchi'uc milbil chchamic, te lamalic ta xoraltic ta yut lum.
Te chloc'an xch'ulelic o ta sc'ob li sme'ique.
13Mu'yuc boch'o yan jech yiloj;
mu'yuc boch'o yan xco'laj xchi'uc svocol jech chac c'u cha'al li vo'ote Jerusalén.
Mu'yuc boch'o yan xu' ta jco'oltsanbe svocol jech chac c'u cha'al vo'ot ti xu' ta jpatbot o avo'nton vo'ot ti xaco'laj jech chac c'u cha'al tojol tsebe.
Yu'un toj muc', toj ep jech chac c'u cha'al muc'ta nab li avocole,
jech mu'yuc boch'o xu' chascoltaot.
14Li j'alc'opetic avu'une mu meleluc li xvayechique;
puru epalc'op li c'usi laj yalbicote.
Muc svinajesic li amule, ja' yu'un ti chucbil labate.
Ja' no'ox laj yaq'uic ach'un li c'usi mu meleluc, xchi'uc li c'usi sventa chach'ay o ta bee.#Jer 5.31; 23.25-27; Ez 13.10.
15Scotol li boch'otic ijelovic ta bee la spac' sc'obic ta atojol;
xpilajetic no'ox, la sjimulan sjolic ta atojol, jech laj yalic:
“¿Me ja' li lum li'i ti ja' no'ox stuc toj lec,
toj jun yutsil ta scotol banamil chalique?”, xiic.
16Scotol li avajcontrataque xjach'lajet no'ox yeic ta atojol;
la slabanicot, xc'uxet no'ox yeic jech chalic:
“Yich'ic xa o cu'untic pisine.
Ic'ot xa sc'ac'alil ti jech ono'ox jmala-malatic chc'ot ta pasele,
pero laj xa quil ta jsatic”, xiic.
17Yu'un li Muc'ul Diose la spas ono'ox li c'usi chapanbil yu'une.
Laj xa yac' c'otuc ta pasel li c'usi yaloj ono'ox tal ta poco' vo'onee.#1 R 9.6-9.
Laj yulesot o, mu'yuc abul aba laj yilot.
Laj xa yac' tse'inuc ta atojol li avajcontrae;
laj yac'be yich'ic lec stsatsal yo'ntonic li boch'o xti'et yo'ntonic ta atojole.
18Lum Sión, oc'an avanan ta sc'anel coltael ta stojol li Cajvaltique.
Loc'uc ya'lel asat ta c'ac'al ta ac'ubal jech chac c'u cha'al bevo'.
Mu me xalubtsaj, mu me xcux ta oq'uel li asate.
19Lican, avanan sjunul ac'ubal, mu me xaquechan.
Albo scotol c'usi oy ta avo'nton li Cajvaltique;
malo loq'uel scotol jech chac c'u cha'al vo'.
Toyo ac'ob ta stojol, c'anbo tsots vocol ta sventa ac'o cuxiuc li ololetic avu'une,
yu'un abul sbaic te mochajtic chchamic ta vi'nal ta xoraltic.
20Muc'ul Dios, q'uelavil, ¿me oy boch'o jech apasojbe?
¿Me yu'un xu' ti ja' li' chlic sti' yolic li antsetique?#Dt 28.53; 2 R 6.28-29; Jer 19.9.
¿Me xu' te chchamic ta ch'ulna avu'un li paleetic xchi'uc j'alc'opetique?
21C'alal ta mol me'el, ta muc' ta biq'uit, te lamalic ta xoraltic;
li jqueremetic, li tojol tsebetic cu'une ilajic ta milel ta espada.
Laj amil scotol ti c'alal ilic sc'ac'al avo'ntone;
mu'yuc abul sba laj avil.
22Ta buyuc xa no'ox laj avac' taluc li jvocole;#Sal 31.13; Jer 20.3,10; 46.5; 49.29.
ja' jech ital jech chac c'u cha'al li boch'otic chbatic ta q'uel q'uine.
Muc'ul Dios, c'alal chlic sc'ac'al avo'nton li vo'ote, me junuc mu'yuc boch'o cuxul chcom.
Li boch'otic la jts'ites, la jchanubtas leque, ilajic ta milel yu'un li cajcontrataque.
Currently Selected:
Lamentaciones 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.