Génesis 9
9
Li Diose oy c'usi la xchapan xchi'uc Noé
1Li Diose laj yac'be bendición li Noé xchi'uc xnich'nabe. Jech laj yalbe: “Bolanic, epajanic; nojesic li banamile.#Gn 1.28. 2Scotol li chonbolometic ta banamile chlic xi'icuc avu'unic. Scotol li c'usitic xviletique, xchi'uc li c'usitic oy ta banamile, xchi'uc li c'usitic oy ta nabe, cac'oj xa ta ac'obic scotol. 3Me chac'anique, xu' chati'ic scotol li chonbolometique, xchi'uc xu' chalo'ic li itajetique. Vu'un chacac'boxuc scotol. 4Pero oy jun ti c'usi mu xu' chati'ique: ja' li ti'bol ti oy xch'ich'ale yu'un ja' ta xch'ich'al ti cuxul oe.#Lv 7.26-27; 17.10-14; 19.26; Dt 12.16,23; 15.23. 5Vu'un ta xcac'be stoj jujun cristiano xchi'uc jujun chonbolom ti ta smal ach'ich'alique. Li boch'o chmilvane ta xquich'be sc'op ta sventa xcuxlejal li xchi'ile.
6“Me oy boch'o ta smil jun vinique,#Ex 20.13.
ta xmilat yu'un yan vinic ec,
yu'un li vinique ja' sloc'obal Dios.#Gn 1.26.
7Pero li vo'oxuque bolanic, epajanic.
Nojesic banamil achi'uquic li anich'nabique”,#Gn 1.28. x'utat yu'un Dios li Noee.
8Li Diose jech laj yalbe noxtoc li Noé xchi'uc xnich'nabtaque: 9“A'yo ava'yic, oy c'usi ta jchapan ta atojolic li vo'oxuque, xchi'uc li amomnich'nabique, 10xchi'uc scotol li chonbolometic laj achi'inic ta barcoe ti co'ol laloq'uic achi'uquique: ja' li mutetique, li chonbolometic ti stac' ts'unele, xchi'uc ti mu stac' ts'unele, xchi'uc ta scotol li c'usiuc no'ox chonbolometic oy ta banamile. 11Li c'usi ta jchapan ta atojolique mu xjel o. Mu'yuc xa ta jmil ta pulel ta vo' li cristianoetique xchi'uc li chonbolometique. Mu'yuc xa chcac' taluc pulel ta vo' ti tsoques yan velta li banamile. 12Li' laj cac'be senyail li c'usi la jchapan ti j'ech'el ta jpas o ta atojolique xchi'uc ta stojol scotol li chonbolometique: 13ja' li vacnabal laj cac' ta vinajele, ja' senyail li c'usi jchapanoj ta jpas ta sventa scotol li banamile. 14C'alal ta xcac' taluc li toque, te ta xvinaj li vacnabal cu'une. 15Jech te ta xvul o ta co'nton li c'usi jchapanoj ta atojolique xchi'uc ta scotol li chonbolometique. Jech mu'yuc xa ta xcac' taluc pulel ta vo' ti chayulesoxuc acotolique. 16C'alal ta xquil li vacnabal te oy ta toque, ta xt'ab o ta co'nton li c'usi chapanbil cu'un ti j'ech'el jech icom o ta stojol scotol li cristianoetique xchi'uc ta stojol scotol li chonbolometic oy ta banamile. 17Li'i ja' senyail li c'usi jchapanoj ta scotol li cristianoetique xchi'uc ta stojol scotol li chonbolometic li' ta banamile”, x'utat yu'un Dios li Noee.
Sc'oplal Noé xchi'uc xnich'nabtac
18Li xnich'nabtac Noé ti iloq'uic ta barcoe ja' Sem, Cam, ja' li stot Canaane, xchi'uc Jafet. 19Ja' li oxib xnich'nabtac Noee xchi'uc smomnich'nabic ti la sbolesbeic yajval yan velta li banamile.
20Li Noee lic abtejuc ta banamil; lic sts'un ts'usubtic yu'un. 21Oy jun c'ac'al li Noee ep laj yuch' li pasem ya'lel ts'usube, jech iyacub o. Ich'ay yo'nton. Jeche' te telel ta yut scarpana, solel iloc' sc'u' xvex. 22C'alal laj yil t'anal stot li Came, ja' li stot Canaane, te bat yalbe ya'ay li chib sbanquiltaque. 23Ja' yu'un li Sem xchi'uc Jafete laj yich'ic tal jlic c'u'il. La xlich'an tal ta snecubic yu'un bat smaquic o li stotique. Ti c'u cha'al mu xilic ti t'anale, ta nacalchac ixanovic ochel, jot o sq'uelojic batel.
24C'alal cux yo'nton ta yacubel li Noee, laj ya'ay c'usi ipasbat yu'un li its'inal xnich'one. 25Jech laj yal:
“Chopol chbat li Canaane.
J'ech'el chich' mozoinel o
yu'un li chib xchi'iltac ta voq'uele”, xi.
26Jech laj yal noxtoc:
“Ich'biluc ta muc' li Muc'ul Diose, ja' li Dios yu'un Seme;
li Canaane ja' smozo Sem ac'o c'otuc o.
27Li Jafete ac'o epajesbatuc smomnich'nabtac yu'un li Diose.
Ac'o naquiicuc xchi'uc li smomnich'nabtac Seme.
Ja' ac'o c'otuc ta smozoic li Canaane”, xi.
28C'alal i'ech' xa'ox li pulel ta vo'e, li Noee icuxi yan o'lol xchanibal ciento (350) jabil. 29C'alal yich'oj xa'ox baluneb ciento xchi'uc lajuneb yoxvinic (950) jabile, icham.
Currently Selected:
Génesis 9: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.