1 Macabeos 2
2
La spoj sbaic ta pasc'op xchi'uc xchi'iltac li Matatiase
1Ta sc'ac'alil le'e li Matatías xnich'on Juan smomnich'on Simeone, ja' li pale yu'un jchop smomnich'nab Joarib ta vo'onee, la scomtsan li Jerusalén ti bu ivoq'ue; te ibat nacluc ta Modín. 2Oy vo'ob xnich'on la sjeltaanbe sbi: Li june Juan sbi, Gadi yixtolbi. 3Li yane Simón sbi, Tasi yixtolbi. 4Li Judase laj yac'be yixtolbi Macabeo. 5Li Eleazare laj yac'be yixtolbi Avarán, xchi'uc li Jonatane laj yac'be yixtolbi Afús.
6C'alal laj yil Matatías li c'usitic toj chopol te ta Judá xchi'uc ta Jerusalene, 7tsots i'avan jech laj yal:
“¡Toj abul jba! ¿C'u yu'un livoc', yu'un li' chquil c'u x'elan chich' yavnaijesel li jteclumale, xchi'uc li ch'ul lume? ¿C'usi stu li' chotolun?, yu'un i'och xa ta sc'obic li cajcontracutique, xchi'uc laj xa yu'unin yanlumetic li ch'ulnae. 8Li ch'ulnae ja' xa jech icom c'u cha'al jun vinic ti mu'yuc lec sc'oplale. 9Li c'usitic toj lequic te oye laj xa yich'ic pojbel batel sventa stojol svocolic, li ololetique laj xa smilic comel ta xoraltic, li queremetique laj xa yich'ic milel ta espada yu'un li yajcontraique. 10Mu'yuc xa bu lumal ti mu'yuc ayem spoj li pasubmantaletic te ta lume, ti mu'yuc xu'uninbe li c'usitic oy yu'une. 11Scotol li st'ujumal Jerusalene laj xa yich' elc'anbel batel scotol, ac'o me colem to'ox, pero i'och xa ta mozoil. 12Q'uelavil, li ch'ulna cu'untique, li jlequilaltic cutsilaltique, ilaj sc'oplal scotol, la soquesbeic o sc'oplal#Sal 74.3-9; 79.1; 1 Mac 1.39; 4.38. li yanlumetique. 13¿C'usi xa stu ti li' to cuxulune?”, xi li Matatiase.
14Li Matatías xchi'uc xnich'nabe la sli' sc'u'ic, la slapic c'u'il ti ch'ixlajan ta lapele, lic sjapuic oq'uel ta scoj ti toj c'ux svocolique.
15Li yajtacbolal ajvalile, ja' li boch'o ja' yich'oj yabtelic ta sujic israeletic ti ac'o scomtsanic xch'unel li Diose yu'un ja' ac'o yac'beic milbil matanal li c'usitic cuybil ta diosetique, te ic'otic ta lum Modín. 16Ep israeletic la stsob sbaic batel ta stojolic, jech noxtoc li Matatías xchi'uc xnich'nabtaque laj yich'ic iq'uel ec ti bu la stsob sbaique. 17Ja' yu'un li yajtacbolaltac ajvalile jech laj yalbeic li Matatiase:
—Li vo'ote oy avabtel, lec ich'bilot ta muc' li' ta alumal, xchi'uc coltabilot lec yu'un li anich'nabe xchi'uc li avuts' avalaltaque. 18Ja' lec vo'ot ba'yuc xach'unbe smantal li ajvalile, jech chac c'u cha'al xch'unojic scotol li yantic banamile, xchi'uc li israeletic ta Judae, xchi'uc ti jayib to comenic ta Jerusalene. Ja' jech li vo'ote xchi'uc li anich'nabe lec muc' ac'oplalic chc'ot ta stojol li ajvalile. Jech chayac'bot amotonin c'anal taq'uin, xchi'uc saquil taq'uin, xchi'uc ep yantic matanaletic cha'ac'bat, xi li yajtacbolaltac ajvalile —xiic.
19Li Matatiase jech tsots la stac':
—Manchuc me laj xa xch'unbeic smantal ajvalil scotol li cristianoetic ti bu c'alal sventainoj li ajvalile, ac'o me laj xa scomtsanic xch'unel Dios ti yich'ojic ta muc' li stot sme'ique, ac'o me ja' xa la xch'unbeic smantal li ajvalile, 20li vu'un xchi'uc jnich'nab xchi'uc cuts' calale ja' ta jch'uncutic li c'usitic tuc' xchapanojic xchi'uc Dios li jmoltot jyame'cutique. 21¡Ja' no'ox Dios ac'o scoltauncutic ti mu jcomtsancutic li mantaletic li chanubtaseletic yu'une! 22Li vu'uncutique mu'yuc ta jch'unbecutic smantaltac li ajvalile. Mu jc'an jcomtsancutic xch'unel li Dios cu'uncutique, mu'yuc bu ta jtamcutic o batel yan be, me ta bats'ic'ob o me ta ts'etc'ob —xi.
23C'alal ja' to no'ox laj yal jech li Matatiase, oy jun israel vinic ta ora te inoch'aj batel ta scajleb smoton li cuybilal dios te ta Modine, yu'un ta xac'be milbil matanal li sdiosique, te ta stojol scotolic jech chac c'u cha'al yaloj mantal li ajvalile. 24C'alal laj yil li Matatiase, toj chopol laj ya'ay, inic yu'un sc'ac'al yo'nton. Ibat smil ta ora li jun israel vinic te ta scajleb matanale. 25Xchi'uc la smil noxtoc li yajtacbolal ajvalil ti boch'o tsuj ta yaq'uel matanal li israeletique, xchi'uc la sjines comel li scajleb matanale. 26Ja' toj tsots sc'oplal laj ya'ay li smantal Diose, ja' jech la spas jech chac c'u cha'al la spasbe Zambri li Finees xnich'on Salue.#Nm 25.6-15. 27Ja'o tsots lic avanuc te ta lum li Matatiase jech laj yal:
“¡Li boch'otic ja' tsots sc'oplal cha'yic li smantal#Nm 25.11-13. Diose xchi'uc ti tsc'an ja' chch'unic o li c'usi lec xchapanoj Diose, ac'o tal xchi'inun!”, xi.
28Li Matatías xchi'uc xnich'nabe ijatovic batel ta a'malaltic, te la scomtsanic ta lum scotol li c'usitic oy yu'unique.#2 Mac 5.27.
29Ta yorail le'e ep boch'otic oy ta yo'ntonic li lequilale xchi'uc li c'usitic tuq'ue xchi'uc li c'usitic leque, ja' yu'un te ibatic ta xocol banamil. 30Te ibat naquiicuc xchi'uc yajnil xnich'nabic, xchi'uc xvacaxic, yu'un toj tsots laj ya'yic li svocolic ta uts'intaele. 31Li svinictac ajvalile xchi'uc li yajsoldadotac te oyic ta Jerusalén ta lum yu'un Davide, c'ot yich'ic albel ti oy j'o'lol cristianoetic mu xch'unbeic smantal ajvalile, ti te ibat snac' sbaic ta xocol banamile. 32Ja' yu'un bat snutsic li epal soldadoetique, la staic. Te lic spas scarpanaic ti bu oyique te lic stsaquic ta c'op ta sc'ac'alil cuxub o'ntonal. 33Jech laj yalbeic:
—Me chac'an chaloq'uic batel li'i, xchi'uc me chach'unbeic smantal li ajvalile, cuxul chacomic —xutic.
Jech la staq'uic:
34—¡Mu'yuc chiloc'cutic, xchi'uc mu'yuc ta jch'unbecutic smantaltac li ajvalile; mu jc'an jsoquescutic li xcuxubil co'ntoncutique!#Ex 20.8-11. —xiic.
35Ja' yu'un li soldadoetique ta ora lic stsaquic ta c'op. 36Li israeletique mu'yuc la spaquic, me jbejuc ton mu'yuc la sjipic, xchi'uc mu'yuc bu la suquic ti bu i'och snac' sbaique. 37Ja' no'ox jech laj yalic: “¡Xu' chichamcutic jcotolcutic ta scoj ti tuc' c'usi ta jpascutique! ¡Yiloj Dios xchi'uc cristianoetic ti jeche' no'ox chamiluncutic ti mu'yuc jmulcutique!”, xutic.
38Jech yu'un li soldadoetique lic stsaquic ta c'op ta sc'ac'alil ta xcux yo'ntonic, jech te ichamic o xchi'uc yajnilic, xchi'uc xnich'nabic, xchi'uc xvacaxic. Ta scotol ichamique ja' jmil ta scotolic.
Sc'oplal c'usi la spas Matatías xchi'uc xchi'iltac
39C'alal laj ya'yic Matatías xchi'uc xchi'iltac c'u x'elan laj yich' svocolic li yantique, toj ep i'oq'uic. 40Jech lic yalbe sbaic: “Me jech ta jpas jcotoltic jech chac c'u cha'al la spasic li jchi'iltactique, me mu'yuc ta jpastic c'op jchi'uctic li yan lumetique, me mu'yuc ta jpoj li jcuxlejaltique xchi'uc li mantaletic cu'untique, ta anil xu' chijyulesutic li' ta banamil”, xut sbaic. 41Ta jun no'ox sc'ac'alil te lic xchap ya'yejic: “Me oy boch'o chtal stsacutic ta c'op ta sc'ac'alil ta jcux co'ntontique, ja' lec ta jpastic c'op jchi'uctic, c'u cha'al mu xijcham jcotoltic jech chac c'u cha'al ichamic te ta snac'ubbailic li jchi'iltactique”, xiic. 42Jech te ital snaban sbaic li jtsob hasideetique, ja' li israeletic ti tsots yo'ntonique, yu'un jech yo'nton ta xch'unic li smantal Diose. 43Jech noxtoc li boch'otic tsc'an tsjatoviltaic li c'usitic chopole, lic stsob sbaic tal, lic scolta sbaic ec. 44Jech ic'otic ta jtsob soldado, la smil ta sc'ac'al yo'ntonic li jpasmulil cristianoetique xchi'uc li israeletic ti la scomtsanic xch'unel Diose. Ti jayib cuxul icomique, te bat snac' sbaic ta slumal yanlumetic yu'un jech xu' chcolic. 45Li Matatías xchi'uc xchi'iltaque la xanic sjunul li lume, la sjinesic comel li scajlebtac matanaletic yu'un cuybilal diosetique. 46Xchi'uc laj yalic tsots mantal ti ac'o yich'ic setbel sni' sc'unilic li ololetic ti jayib mu'yuc to setbil sni' sc'unilic ta scotol yosilal Israele. 47La snutsic loq'uel li boch'otic toj ven jtoybaetique. Li c'usi la spasique toj lec iloc' yu'unic. 48Ja' jech ipoj yu'unic li mantaletic ta sc'ob li yanlumetique xchi'uc li ajvaliletic yu'unique; muc stsalatic yu'un yipal li yanlumetic ti ven chopolique.
Laj yalbe lec comel mantal xnich'nab c'alal icham li Matatiase
49C'alal po'ot xa ta xcham li Matatiase, jech lic yalbe li xnich'nabe:
“Li' ta orae laj xa spas canal li toyobbaile xchi'uc li chopolc'optaele;
ja' xa yorail lajesel, ulesel, ja' xa yorail chich' ac'bel stojol li mulile.
50Li vo'oxuque, jnich'nab,
ac'o ta avo'ntonic li smantaltac Diose.
Ja' ac'o acuxlejalic ta spojel c'usi xchapanoj Dios
ta stojol li jmoltot jyame'tic ta vo'onee.
51Na'ic me ti tsotsic c'usitic la spasic ti c'alal cuxulic to'oxe,
jech lec ich'biloxuc ta muc' xchi'uc lec ac'oplalic ta xcom o.
52Li Abrahame lec jun yo'nton i'ilat ti c'alal iq'uelbat yo'nton yu'un Diose,
jech lec tuq'uil vinic#Gn 15.6; 22.15-18; Stg 2.21-23. i'ilat yu'un Dios.
53C'alal ja'o oy ta svocol li Josee,
lec yich'oj ta muc' li smantal Diose.
Ja' yu'un icom ta ajvalilal ta Egipto.#Gn 39—45.
54Li jmoltotic Fineese laj yac' ta q'uelel ti yo'ntoninoj li smantal Diose,
ja' yu'un i'albat ti j'ech'el mu xlaj sc'oplal o#Nm 25.6-15; 1 Mac 2.26. li yabtel ta paleale.
55Li Josuee ta scoj ti lec la xch'un li mantal yu'un Diose,
ja' yu'un icom ta jchapanvanej ta Israel.
56Li Calebe ta scoj ti lec c'usi laj yal ta stojol scotol li xchi'iltac ta vo'onee,
ja' yu'un i'ac'bat yu'unin li banamile.#Nm 13.1—14.12,24; 26.65; Jos 1.1-9.
57Li Davide ta scoj ti jun yo'nton yich'oj ta muc' li Diose,
ja' yu'un i'och ta ajvalilal ti mu xlaj sc'oplal oe.#2 S 7.
58Li Eliase ta sventa ti ja' yo'ntoninoj o li smantaltac Diose,
ja' yu'un iyich' iq'uel muyel ta vinajel.#1 R 19.10,14; 2 R 2.11.
59Li Ananías, Azarías xchi'uc Misaele, ta scoj ti oy lec xch'unojel yo'ntonique,
ja' yu'un muc xc'aq'uic ta c'oc'.#Dn 3.
60Li Daniele ta scoj ti tuc' c'usi la spase,
ja' yu'un iyich' coltael muc xlaj ta ti'el yu'un li leonetique.#Dn 6.1-24; Dn (dc) 14.30-42.
61Ja'uc me jech xachanic batel ti jayc'ol chajelovique,
yu'un li boch'otic chac' sbaic ta stojol Diose jech mu xlajic ta tsalel.
62Mu me xaxi'ic sibtasel yu'un li chopol cristianoetique;
yu'un li yich'elic ta muq'ue ta xch'ay batel ta tso'tic xchi'uc ta xlaj ta xuvit.
63Li' tanae lec to ich'bilic ta muc', oc'ome ta sacch'ayic o batel,
ta xc'atajic ta pucuc;
li c'usi xchapanojique mu'yuc stu chc'ot o.#Sal 37.1-2,10,35-36.
64Jnich'nab, tsotsanic me,
junuc me avo'nton ch'unic o li smantal Diose,
yu'un ja' te chata o alequilalic.
65Li' ta xcom li abanquilic Simone,
yu'un jna'oj ti ja' bije.
Ich'ic me ta muc' scotol c'ac'al,
yu'un ja' xq'uexol atotic ta xcom.
66Li' chcom achi'inic li Judas Macabeoe, le'e lec tsots yo'nton ono'ox ta sbic'tal.
Ja' banquilal soldado ta xcom avu'unic;
ja' ta spas mantal sventa chbat acontrainic li yantic lumetique.
67Jmoj xatsob aba achi'uquic
scotol li boch'otic tsc'an ta xch'unic li smantal Diose;
tsotsanic me ta spacbel sc'oplal li c'usitic chopol ipasbat li jlumaltique.
68Pacbeic sutel ya'ay c'usi chopol chaspasboxuc li yantic lumetique.
Ja' me ch'unic scotol c'ac'al c'usi chal li smantal Diose”, xi.
69C'alal laj yac'be comel bendición li xnich'nabe, bat xchi'in yo' bu oyic li smoltot syame' ta vo'onee. 70Ja' icham ta yabilal vaquib xvaxacvinic (146).#2.70 146 - Ja' co'ol xchi'uc 166 jabil sc'an xtal li Cristoe. Ja' te bat smuquic ta smuquinal stot sme'ic te ta Modín banamil. Scotol li israeletique ep la yoc'taic.
Currently Selected:
1 Macabeos 2: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.