1 Reyes 22
22
Li j'alc'op Micaiase laj yal ti tsalbil chc'ot li Acabe
(2 Cr 18.1-34)
1Oxib jabil mu'yuc la spasic pleito li israeletic xchi'uc siriaetique. 2Pero c'alal ijelov li oxib jabile, li Josafat, ajvalil ta Judae, ibat sc'opan li ajvalil ta Israele. 3Li ajvalil ta Israele jech laj yalbe li xchi'iltac ta abtele:
—¿Me mu xana'ic ti ja' ono'ox comen ta cu'untic li lum Ramot te ta Galaade? ¿C'u yu'un muc ta jpojbetic ta sc'ob li ajvalil ta Siriae? —xut.
4Te lic sjac'be li ajvalil Josafate:
—¿Me xac'an xbat achi'inun ta stsalel li lum Ramot te ta Galaade? —xut.
Itac'ov li Josafate:
—Xu' chibat. Li' oy li jvinictaque; ja' avinictac. Li oy li ca'etic cu'uncutique; ja' aca'ic ec. 5Pero ba'yuc tsc'an chajac' c'usi tsc'an li Muc'ul Diose —xut.
6Li ajvalil ta Israele te lic stsob scotol li chanib ciento (400) j'alc'opetic yu'une, jech la sjac'be:
—¿Me xu' chbat jcontraincutic li lum Ramot te ta Galaade, o me mu xu'? —xut.
Itac'ovic:
—Xu' chabatic, yu'un ja' stuc Muc'ul Dios chayac'bot ta ac'ob —xiic.
7Li Josafate jech lic sjac' noxtoc:
—¿Me mu'yuc xa yan yaj'alc'op Muc'ul Dios ti xu' ta jac'betique? —xut.
8Itac'ov li ajvalil ta Israele:
—Oy to jun; xu' ta jac'betic c'usi tsc'an li Muc'ul Diose. Ja' Micaías, xnich'on Imla. Pero li vu'une stsoq'uet co'nton yu'un, yu'un mu'yuc ono'ox baq'uin xalbun c'usi lec chc'ot ta pasel. Puru chopolic c'usi chiyalbun —xi.
Itac'ov li Josafate:
—Ajvalil, mu xaval jech —xut.
9Ja' yu'un li ajvalil ta Israele jech laj yalbe jun xchi'il ta abtel:
—Bat ic'o tal ta ora li Micaías, xnich'on Imlae —xut.
10Li ajvalil ta Israel xchi'uc ta Judae te chotol ta xchotlebic ta stenlejaltic ta yochebal lum Samaria, slapoj lec sc'u'ic sventa ajvalilal. Scotol li j'alc'opetique te chalic ta stojol ajvaliletic li c'usi chc'ot ta pasele. 11Li Sedequías, xnich'on Quenaanae, spasoj jayibuc cachuetic ta tsatsal taq'uin. Jech laj yal: “Jech yaloj li Muc'ul Diose: ‘Ta sventa li cachuetic li'i ja' chapasic o pleito achi'uquic li siriaetique ja' to ti c'alal ch-ul o avu'unic ta j'ech'ele’, xi li Muc'ul Diose”, xi.
12Scotol li yantic j'alc'opetique ja' no'ox jech laj yalic ec. Jech laj yalbeic li ajvaliletique: “Bat tsaquic ta pleito li lum Ramot ta Galaade. Ta stsal avu'unic, yu'un ja' stuc Muc'ul Dios chayac'bot ta ac'obic”, xiic.
13Li boch'o ibat yic' tal Micaiase jech c'ot yalbe:
—Scotol li j'alc'opetique co'ol ya'yejic; ja' laj yalbeic ajvalil li c'usi lec chc'ot ta pasele. Ja' yu'un avocoluc, ac'o me co'olajuc ava'yejic achi'uc, ja' me xaval ec li c'usi leque —xut.
14Itac'ov li Micaiase:
—Jamal chacalbot ta stojol Muc'ul Dios ti ja' no'ox xu' chcal li c'usi chiyalbune —xi.
15Te ibat ta stojol li ajvalile, jech ijac'bat:
—¿Me xu' chbat jpas pleito jchi'uc li lum Ramote, o me mu xu'? —xut.
Itac'ov li Micaiase:
—Batan avil me xu' avu'une. Me laj atsale, yu'un ja' Muc'ul Dios laj yac'bot ta ac'ob —xut.
16Itac'ov li ajvalile:
—Ep xa ta velta calojbot ti ja' no'ox ac'o avalbun ta jamal ta stojol Muc'ul Dios li c'usi melele —xut.
17Li Micaiase jech laj yal:
“Laj quil ti scotol israeletic
spucoj sbaic batel ta vitsetique;
ja' jechic chac c'u cha'al chijetic ti mu'yuc xchabiele.#Nm 27.17; Mt 9.36; Mr 6.34.
Li Muc'ul Diose jech laj yal:
‘Le'e mu'yuc yajvalic.
Junuc yo'nton ac'o suticuc batel ta snaic ta jujuntal’, xi li Muc'ul Diose”, xut.
18Li ajvalil ta Israele jech laj yalbe li Josafate:
—Laj ono'ox calbot ti mu'yuc baq'uin c'usi lec chiyalbun li vinic li'i; puru chopolic ono'ox c'usi chiyalbun —xut.
19Li Micaiase jech to laj yal:
—A'yo ava'ay c'usi chal li Muc'ul Diose: Li Muc'ul Diose laj quil te chotol ta muc'ta chotlebal. Te xchi'uc scotol li soldadoetic yu'un te oy ta vinajele; te va'ajtic ta sbats'ic'ob xchi'uc ta sts'et. 20Li Muc'ul Diose jech la sjac': “¿Boch'o chbat stijbe yo'nton Acab ti ac'o bat spasic pleito xchi'uc li lum Ramot ta Galaad sventa te ac'o chamuc oe?”, xi. Pero yantic o c'usitic laj yalic jujunic. 21Te ital ta stojol Muc'ul Dios jun pucuj, jech laj yal: “Vu'un ta xbat jtijbe yo'nton”, xi. Li Muc'ul Diose jech laj yal: “¿C'u x'elan xu' chapas?”, xut. 22Itac'ov: “Chiloc' batel; vu'un chbat cac'be epalc'op ta yeic li j'alc'opetic yu'un ajvalil Acabe”, xi. Li Muc'ul Diose jech laj yal: “Lec oy, bat paso cha'e; lec xu' avu'un”, xut. 23Ja' yu'un na'o me, li Muc'ul Diose yac'ojbe xa jun j'epalc'op ta yeic scotol li j'alc'opetic avu'une, yu'un li Muc'ul Diose laj xa yal ti ac'o lajan oe —xut.
24Li Sedequías, xnich'on Quenaanae, inopaj batel ta stojol li Micaiase; la slec'be ta majel sat, jech laj yalbe:
—¿C'usi ora iloc' ta jtojol li Muc'ul Dios ti mu'yuc sbec'tal ti i'ay sc'opanot chavale? —xut.
25Itac'ov li Micaiase:
—Ja' to te chlic ana' ti c'alal me chasa'ilan xa'ox bu chanac' aba ta nanatique —xut.
26Li ajvalil ta Israele jech laj yal mantal:
—¡Tsaquic li Micaiase! Iq'uic batel ta stojol Amón, ja' li ajvalil te ta lume, xchi'uc ta stojol li jnich'on Joase. 27Xc'ot avalbeic ti vu'un ta jmantal ac'o stiq'uic ta chuquele. Jutuc no'ox xavac'beic sve'el xchi'uc vo' yuch', ja' to ti me lec tsotsun, me lec jun co'nton lisut tale —xi.
28Jech to laj yal li Micaiase:
“Me lec tsotsot, me lec jun avo'nton lasut tale,
yu'un mu ja'uc Muc'ul Dios la sc'opanun obi.
Jchi'iltac, laj me ava'yic acotolic li c'usi laj cale”, xut.
29Li ajvalil ta Israel xchi'uc li ajvalil ta Judae ibat spasic pleito xchi'uc li lum Ramot ta Galaade. 30Li ajvalil ta Israele jech laj yalbe li Josafate:
—Li vu'une ta jel jba ti c'alal chi'och batel ta paspleitoe. Li vo'ote ja' xalap batel li ac'u' ono'oxe —xut.
Jech lic sjel sba li ajvalil ta Israele; i'ochic batel ta paspleito. 31Li ajvalil ta Siriae yalojbe xa'ox mantal li lajchab xcha'vinic (32) banquilal sventa caretaetic ti mu me c'usi spasbeic junuc, me mu ja'uc li ajvalil ta Israele. 32C'alal laj yilic Josafat li banquilaletic sventa caretaetique, bat setuic ta ora, yu'un la snopic ti ja' li ajvalil ta Israele. Pero li Josafate i'avan ta sc'anel coltael. 33C'alal laj yilic ti mu ja'uc li ajvalil ta Israele, te la scomtsanic. 34Ja' no'ox oy jun soldado la svontol st'iles batel li flechae, pero be no'ox la snup batel li ajvalil ta Israele yu'un toj solel no'ox flecha ta snu'pbenal li smac slapoje. Jech laj yalbe li jtijcareta yu'une:
—Joybino li caretae; ic'un loq'uel li' ta pleito, yu'un toj ip libat chca'ay —xut.
35Toj tsots ibat pleito yu'unic li jun c'ac'al le'e. Li ajvalile la sva'anic ta yut scareta ta stojol li siriaetique, pero ta sbatel no'ox c'ac'al icham, yu'un toj ep iloc' li xch'ich'ale; te la sts'an sba ta yut scareta. 36C'alal ich'ay c'ac'ale,#22.36 C'ac'ale - Oy boch'o chalic jtotique. lic spuquic mantal ta scotol li soldadoetic te oyic ta paspleitoe, jech laj yalic: “¡Sutanic xa batel ta alumalic, ta avosilalic li jujunoxuque, 37yu'un li ajvalile icham xa!”, xiic.
C'alal chamen xa'ox li ajvalile, laj yiq'uic batel ta Samaria; te la smuquic. 38Li caretae bat spoquic ta stanqueal vo' te ta Samaria ta yatinab jmulavil antsetic. Te ital ts'i'etic; la slec'beic xch'ich'al li Acabe. Ja' ic'ot o ti jech ono'ox yaloj li Muc'ul Diose.#1 R 21.19.
39Li yantic sc'oplal Acabe, xchi'uc scotol li c'usitic la spase, xchi'uc li na ti t'ujumtasbil ta sts'uts'up tsemen, xchi'uc li lumetic la spase te ts'ibabil ta svunal c'usitic ic'ot ta pasel yu'un li ajvaliletic ta Israele. 40C'alal icham li Acabe, ja' i'och ta xq'uexol jun xnich'on, Ocozías sbi.
Li Josafate i'och ta ajvalilal ta Judá
(2 Cr 20.31-37)
41C'alal xchanibal xa'ox jabil yochel ta ajvalilal ta Israel li Acabe, ja'o i'och ta ajvalilal ta Judá li Josafate. 42Li Josafate yich'oj vo'lajuneb xcha'vinic (35) jabil ti c'alal i'och ta ajvalile. Vo'ob xcha'vinic (25) jabil i'abtej ta Jerusalén. Li sme'e Azuba sbi; ja' stseb Silhi.
43Li Josafate ja' jech lec c'usi la spas jech chac c'u cha'al li stote, ja' li Asae. Lec tuc' c'usitic la spas ta stojol li Muc'ul Diose. Pero li toyol c'opojebaletic bu chchic'beic smoton sdiosic, xchi'uc bu chchiq'uic pome muc sloq'ues scotol.
44Li Josafate mu'yuc la scontrain sbaic xchi'uc li ajvalil ta Israele. 45Li yantic sc'oplal Josafat, xchi'uc li c'usitic lec la spase, xchi'uc li pleitoetic la spase te ts'ibabil ta svunal c'usitic ic'ot ta pasel yu'un li ajvaliletic ta Judae. 46La snuts loq'uel noxtoc li boch'otic tstsob sbaic ta spasel muliletic ti te to comenic yu'un li stote, ja' li Asae. 47Te ta Edome mu'yuc ajvalil yu'unic; ja' no'ox oy jun vinic te chventainvan.
48Li Josafate la spas barcoetic jech chac c'u cha'al tspasic ta Tarsis sventa chbat yich'ic tal c'anal taq'uinetic ta Ofir. Pero muc x'ay yich'ic tal, yu'un te ivoc' ta Ezión-Geber li sbarcoe. 49Ja' yu'un li Ocozías, xnich'on Acabe, jech laj yalbe li Josafate:
—Ac'o bat xchi'in sbaic ta barco j'abteletic avu'un xchi'uc li j'abteletic cu'une —xi.
Pero li Josafate mu sc'an spas jech.
50C'alal icham li Josafate, te bat yich' muquel ta Lum yu'un David, ja' li smuc'tamoltote. Ja' i'och ta xq'uexol jun xnich'on, Joram sbi.
Li Ocoziase i'och ta ajvalilal ta Israel
51Ta svuclajunebal jabil yochel ta ajvalilal ta Judá li Josafate, ja'o i'och ta ajvalilal ta Israel li Ocoziase. Chib jabil i'abtej ta Samaria te ta Israel. 52Pero toj chopolic c'usi la spas ta stojol li Muc'ul Diose. Ja' la xchan jech chac c'u cha'al la spas li stote, xchi'uc li sme'e, xchi'uc li Jeroboam, xnich'on Nabate; ja' ti laj yac'be sa' smulic li israeletique. 53Xchi'uc bat yich' ta muc' ec li Baale; te itun ta stojol jech chac c'u cha'al la spas li stote. Jech la sa'be sc'ac'al yo'nton li Muc'ul Dios yu'un Israele.
Currently Selected:
1 Reyes 22: TZE97
Highlight
Share
Copy
Want to have your highlights saved across all your devices? Sign up or sign in
Tzotzil Chenalhó DC Bible © Sociedad Bíblica de México, a. c., 2002.