Mahlu 2
2
Fochik in tikba hi̱ka ho̱ hatak hopoyuksa ʋhleha hʋt hʋshi akochaka imma mintit Chelusalem a̱ ʋla cha, 11; ʋlo̱si Chisʋs a̱ aiokpʋchi, 14 micha i̱ yakni a̱ falamʋt ilhkoli. 15 Chosef ʋt Echip ia chi̱ ka enchil osh im anoli. 16 Helot ʋt Chisʋs a̱ hot ʋbi bʋnna; ʋlla chipota moma Behlehem a̱ ai ʋbi. 23 Chosef ʋt Chutea yakni falamʋt ia chi̱ ka enchil osh im anoli no̱ Nasalet ak o̱ ont ai anta.
1Chisʋs ʋt Helot mi̱ko ai ahanta nitak o̱ Chutea yakni Behlehem tʋmaha ha̱ ai ʋtta ma hatak hopoyuksa ʋhleha hʋt hʋshi akochaka imma mintit Chelusalem a̱ ai ʋla mʋt,
2Chu okla i̱ mi̱ko ʋtta tuk mʋto katimak o̱ ituyula cho? i̱ fochik a̱ hʋshi akochaka imma ya̱ il a pihi̱sa tuk osh aiokpʋchit il itʋnowa hatuk oke, achi tok.
3Mi̱ko Helot ʋt ilʋppa puta ka haklo mʋt, Chelusalem okla moma aiena kʋt komunta tok.
4Micha na holitompa isht a̱sha pehlichi puta, micha okla nan i̱ holissochi ʋhleha moma ka itahobit taiyahli mʋt, kanima yo̱ Klaist ʋt ai ʋtta hinla hatuk a̱ im a ponaklo tok.
5-6Mihma Chutea yakni Behlehem ak oke; hopaii holissochi kʋt, Behlehem chia Chuta yakni ish talaia hokʋt Chutea i̱ mi̱ko ʋhleha aiasha ka moma chik a lauwo ho̱ keyushke; chishno ak o̱ mi̱ko ʋt chi atoba hosh ʋm okla Islael oka ish pehlicha he mak oke, achi tok oka, okla im achi tok.
7Yohmi ma Helot ʋt hatak hopoyuksa ʋhleha ha̱ lumʋt pit hoyo cha, kaniohmi fehna kash o̱ fochik ʋt haiaka tuk a̱ achukmalit im a ponaklo tok.
8Micha Behlehem a̱ pit tihleli mʋt, Oh ia cha, ʋlo̱si atukma achukmalit hʋsh hoyashke; atuk osh hʋsh ahayuchikmʋt, anonti ant hʋs sʋm anoli na ʋno mʋt iʋt ont ai okpʋchi li ak inlashke, achi tok.
9Mihma mi̱ko a̱ haklot in taha mʋt, okla ilhkoli tok: yohmi ma fochik hʋshi akochaka imma a pi̱hi̱sa tuk ash o̱ itikba takalit ma̱ha̱ya mʋt, ʋlo̱si ai itola ka paknaka ya̱ ont takali tok.
10Fochik a̱ okla pisa mʋt, nayukpa aia̱hli fehna mak osh okla na yukpa tok.
11Micha aboha okla ont abeha mʋt, ʋlo̱si, micha ishki Meli aiena ka pisa mʋt, aka hlipkʋchit, yʋmmak ash o̱ okla aiokpʋchi tok; micha im ʋlbihpo a̱ tiwichi mʋt, yʋmmak ash o̱ tʋli‐holisso‐lakna, micha fila̱kinsen, mikmʋt mʋh aiena ho̱ okla habenʋchi tok.
12Mihmʋt holhpokuna ho̱ falamʋt Helot a̱ okla ik im ono ka hi a̱, Chihowa hʋt i̱ miha hatuk o̱, hina inla ho̱ ʋlhtot i̱ yakni atuk akinli ho̱ okla ilhkoli tok.
13Mihma ai ilhkolit taha ma, Chosef ʋt holhpokuna ho̱, Chihowa im enchil ʋt ant i̱ haiaka mʋt, Tani cha, ʋlo̱si mikmʋt ishki aiena ka ishit malelit Echip a̱ ish ona cha, yʋmmak o̱ ish ahanta tuk o̱, anumpa ishit chim a̱ya lashke; Helot ʋt ʋlo̱si a̱ ʋbi bʋnnʋt hoya chi hoka, achi tok.
14Mihma tani mʋt, ʋlo̱si micha ishki aiena kash ninak o̱ pehlichi cha, Echip a̱ ia tok.
15Chihowa hʋt hopaii isht ai anumpulit, Echip ak o̱ sʋso ha̱ a hoyo li tuk, achi tok a̱ ont ai a̱hla chi̱ ka, yʋmmak o̱ aha̱shwa na Helot ʋt illi tok.
16Yohmi ma Helot ash osh, hatak hopoyuksa ʋhleha hʋt ik ahobalo ho̱ pisa mʋt, anukhobela fehna cha, pit on tihlelit, ʋlla chipunta Behlehem, micha auet a bili̱ka ma̱ya kʋt afʋmmi tuklo ai ʋhlit ola minti, hatak hopoyuksa ʋhleha ha̱ achukmalit im aponaklo tok ʋt pit ai it ʋlhpesa ka, mominchit ʋbit tahli tok.
17-18Yʋmohmi hoka Chelemaias hopaii ʋt anumpohonlit, Lama ya̱ a yaiya, micha nishkin okchi minti, mikmʋt nukha̱klo chinto, Lechel ʋt im ʋlla ʋhleha hʋt iiksho hatuk oka ishit yaha̱ya mʋt, hopohla hi a̱ ik ahno ka, takali na haiyaklo tok oke, achi tok a̱ ont ai a̱hli tok.
19-20Yohmi tok kia Helot ʋt illi haya, Chihowa im enchil ʋt, Chosef ʋt holhpokuna ho̱ Echip a̱ im a haiaka mʋt, Tani cha, ʋlo̱si micha ishki aiena ka pehlichi cha, Islael okla i̱ yakni a̱ ish iashke; ʋlo̱si im ilhfiopak a̱ hoyo tok ʋt illi hoka, achi tok.
21Yohmi ma tani mʋt, ʋlo̱si micha ishki aiena kash pehlichi cha, Islael okla i̱ yakni a̱ ʋla tok.
22Yohmi kia Akelaʋs ʋt i̱ki ʋlhtobʋt Chutea ya̱ i̱ mi̱ko na haklo mʋt, yʋmma ona nukshopa tok: yohmi nana kia holhpokuna ka Chihowa hʋt nana i̱ miha hatuk oka, fullotʋt Kalili i̱ kaniohmi ho̱ ona tok.
23Yohmi ka hopaii ʋhleha hʋt anumpulit, Yʋmmak okʋt Nasalet hatak ʋtta hohchifa hi oke, achi tok a̱ ont ai a̱hla chi̱ ka, tʋmaha Nasalet hohchifo ho̱ ona cha, ahanta tok.
Currently Selected:
Mahlu 2: CHH
Highlight
Share
Copy
Want to have your highlights saved across all your devices? Sign up or sign in
Published by the American Bible Society 1848-1886, reprinted 1913