ZEPHANIA 3
3
Yerusalem Yaunos
1Vsainnyang dah dius jens lyis zaiq, wotwu dyoq las gomloeus toq dah Yerusalem wus gas mvtanhzoe nghuot. 2Nyang gas Yhensain dang lyis ma gyo, nyang jyauh zis ma kham, Yhensain lhyi ma loms, nyang pangh cho lhyi ma sang. 3Nyah zau jens gas nyings dah khangkhyi jens teh, nyah soetuon bang gas, nyo nyoqnoq las nvp yo jweh shoq shohyau ma kat khyoq yuot dah cauhpau jens teh nghuot. 4Lvpe jens gas yvwons ma yoeus tsain mhuih bang nghuot. Phudyei bang gas gyingshang yvlyis vwot v-oeu kuot las Mangso dah lyi lyis nyamoq nyang vkyuh xiklyis tsain lhoeu nhunk. 5Nghuot laus eq Yhensain ka hauh wugungs mas nyeis shih. Nyang gas jus zis kuot las khanhamp eq shuot zis ma kuot. Nyang khanhamp eq ma i, nvp yau nvp nyah dius jens jyank mas lyi jus cho chi los. Nghuot laus eq houmha ma dan bang gas shuot cho tsoq kuot nyeis las nyamoq ma xoq.
6 Yhensain taiq, Ngos dius nyau jens dvnganh lyis dom nhang goeus. Nyamoq dah wus jens lyis mhont las nyamoq dah ciank yahge tyoeuqzvm dyoq gyoh joq. Wus jens jyamhjyuklhyuk joq; talhoeu jens eq vkom joq, hank eq ma nyet lo. 7Hauh yoq lyis ngos nghamh zis gas, ngah dius jens gas ngos lyis gyukwoms zis yah ngos jyauh cho lhyi lhom yoeus lyis gas, ngos nyamoq nyeis dah joqyos lyis ma thyet tyamp das oen. Nghuot laus eq ma nyangh lyis nyamoq gas ma gis dah wotwu vgus dvkuot nyeis.
8 Yhensain taiq, dvlangh aq, Ngos dius nyau jens lyis toq kauq buisnyeis lyis langh aq. Ngah nhaiqyo cho lhyi kham nhang das xiklyis dius nyau jens yahge munghdan jens lyis tsainh das zis nghamh thyet goeus. Nyeisjvng gonh ngah nhaiqlom dyis nyi yah monh tyamp das.
9Hauh thang lhyi ngos dius nyau jens dah dius jens lyis thaiq tyamp das las nyamoq gas gohtoeu mangso jens lyis ma dung, ngos lyis kyingh dung das. Nyamoq dvnganh ngah domsyos gyo das. 10We dah Ethiopia mau masyah yangh dyos joq dah ngah dius jens gas ngah jyank mas jyungshuk chi los das. 11Hauh shishenh lyis namoq ngah dius jens gas, ngos lyis gomloeus toq gvng mas ma xoq nyeis chah lo. Ngos gas lhoq lhoq teh khwank soeu khanghmuh lyis shang tyamp das las namoq gas ngah gyingshang jing#3.11 Gyingshang jing, nghuot ya Zion boms nghuot. mas ngos lyis gomloeus khanhamp eq ma doms toq lo das. 12Ngos houmha ehnyet nyhen mha gyoh las noeuhnhamp bang, pangh das xiklyis ngah jyank mas los bang lyis nyhet toh das. 13Israel jens doeng nyeis bang hank lyis eq ma cu, hwah dang ma taiq, ma mhuih. Nyamoq gas nyeisgis yaplhoq das, jesluiq las hank lyis eq ma gyuk noh.#Nyoq 14.5
Gauslaus Lvkhyank
14Israel dius jens eh, lvkhyank kat las gauslaus zis yah kaiq geh!
Yerusalem eh, nah ehnyet gonh gauslaus aq!
15 Yhensain ka nvng lyis joeng cho thank loh nhang goeus.
Nyang nah jeswus dvnganh lyis shang tyamp goeus.
Yhensain, Israel hwankti ka nvng yah nghuot;
gvshih gyuk chank ma bos lo.
16Yerusalem lyis nyamoq heisoeh taiq das shishenh jweh los,
Zion wus eh, Vgyuk,
nah loq lyis vdyungh nhang!
17 Yhensain namoq dah Mangso ka namoq yah nyeis.
Nyah yomsoq gas nvng lyis ung cho dyei.
Yhensain ka nvng mas pyo cho bos das.
Nyah jyetdap yvmas nyang nvng lyis kang saiq dyei das.#3.17 Kang saiq dyei das ge zis Hebre mas, Nyang samlo nyeis das, ge.
Nyang nvng mas lvkhyank kat las gauslaus das.
18Pwe mha dius jens gauslaus teh gauslaus das.
Yhensain taiq,
Nvng kuk las jom das cho lhyi thank loh nhang lha
nah nyoqnho ngelang gyoh cho yoeus tyamp goeus.#3.18 Hebre mas ma bvng.
19Ngos nvng lyis zaiq bang lyis
joeng das shishenh jweh los.
Ngos khyei ma yangh bang dvnganh lyis
khyuot las jonsdoeus loh bang lyis yhen mha shwih los das.
Ngos nyamoq dah xoqphuh cho lhyi
nyoqnho ngelang pheh thaiq kat das las
mungkvn gonh nyamoq lyis chungh das.
20Ngos dyos sanh joq dah
nah dius jens lyis yhen mha shwih los das shishenh jweh los!
Ngos nvng lyis mungkvn dvkhauyah
nyings hoeuh nhang das las
namoq lyis dvlhain nyeisgis yap doms lhoq nhang das.
Yhensain taiq goeus, ge.
Currently Selected:
ZEPHANIA 3: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.