MAKHO 16
16
Dwis Toq Cho
(Mat 28.1-8; Luk 24.1-12; Yoh 20.1-10)
1Yuda No Buisnyeis lai thang lhyi Magdala Mari, Yaku dah ungwes Mari yahge Salome moq gas hauh mvng lyis loh juot dyei das xiklyis xangh coeu tsain wis. 2Dvdaus dah cangxeih vnyeih nvpsangh buis canh los lyis, nyamoq hauh lop pheh e loh. 3Nyamoq dvyuk yah dvyuk taiq goh loh zis gas, Yang lyis hau lopkhonh mas dah lukzains hank toeu tyamp dyei das au, ge. 4Nyamoq yoeuh kat lyis hau lukzains toeu phanh toh yvlyis nyvng. Hauh lukzains gas svsoh kuh zis nghuot. 5Hauh lop khau mha wvng loh lyis, bang bang thyoeu dah shanhzoe wuot las, loqyos shot pheh tsung toh dah loyvm phoq lyis nyamoq nyvng las mauh.
6Nyang nyamoq lyis taiq zis gas, Namoq vmauh goh, tapzains mas taplhangh tyamp goeus, Nazaret mas dah Yesu lyis namoq xo nyeis. Nyang toq loh goeus, nyang heimha ma nyeis lo; nyang lyis toh dah joqyos mas yoeuh geh. 7Nghuot laus eq loh geh, nyah changlo jens yahge Petru moq lyis, Nyang gas Galile mau pheh namoq xik mas loh goeus. Nyang namoq lyis taiq toh vgus, houmha nyang lyis nyvng das, oen taiq kyoh geh, ge.#Mat 26.32; Mak 14.28
8Nyamoq gas nvn, mauh yvmvyah lvnyap thuqh loh las lop masyah cangh khoq. Nyamoq gyuk yvmvyah hank lyis eq cha ma taiq.
Magdala Mari nyvng
(Mat 28.9-10; Yoh 20.11-18)
9Gvshih hau dvdaus dah cangxeih vnyeih noq yah nyang dwis toq los thang lhyi, nyang yius nyhet doeu khat tyamp dyei dah Magdala Mari lyis Yesu cangxeih nyvng xoeuq. 10Hauh vmesbih loh las nyang yah dvgeh zomh ku bang, kukxi ngaus nyeis yvmas loh taiq kyoh. 11Yesu dwis nyeis, nyang nyvng khoq goeus ge yvlyis nyamoq xauhgyo laus eq ma jingh.
Changlo Aiq Yuk Nyvng
(Luk 24.13-35)
12Hauh thang lhyi nyamoq mas zis aiq yuk wukhau pheh loh nyeis lyis, nyah gungs gohja thaiq las nyvng xoeuq. 13Nyah aiq yuk tauh loh las nyeis khoq bang lyis taiq kyoh laus eq nyamoq ma jingh.
Dvci Dvyuk Nyvng
(Mat 28.16-20; Luk 24.36-49; Yoh 20.19-23; Lgy 1.6-8)
14Changlo jens dvci dvyuk moq womjus mas tsung toh uhlyis nyang nyvng xoeuq. Nyang shei masyah dwis toq los las, nyvng bang dah dang lyis ma tsain jing yvmvyah, nyamoq dah ma lomsjingh zis yahge nhaiqlom than zis lyis nyho. 15Nyang nyamoq lyis taiq zis gas, Namoq mungkvn goms shoq loh las, cangsoeu dius nyau khanghmuh lyis gausyis Dang taiq kyoh geh.#Lgy 1.8 16Lomsjingh las jeisnyhop kham soeu ka khyuot yoeus zis xauh das; ma lomsjingh soeu ka dang thang thyet zis xauh das. 17Lomsjingh bang yoh kuot dah vlho ka, haih zis nghuot. Ngah nyings masyah nyamoq yius lyis yoh khat tyamp das. Nyingh saiq yah eq yoh tsain taiq das. 18Lhangnyis lyis eq yoh nyhik lhangh toh das; nyonoq bos dah jeis shuk laus eq ma shei nhang das. Nos bang thoq mas nyamoq loq kih dyei las hauh bang doms huiq los das, ge.
Yesu lyis Toqh Yoeus
(Luk 24.50-53; Lgy 1.9-11)
19Hauh Yhensain nyamoq lyis dye taiq thang lhyi, maukhung mha toqh yoeus zis xauh las, Mangso dah loqyos shot pheh tsung toh.#Lgy 1.9-11 20Nyamoq eq thuq loh las, Yhensain pangh zis yah eq, nyamoq mas bweh dah vlho yah Dang lyis goeng toenk nhang zis yah eq, joqyos khyiq khanghmuh tsain taiq hoeuh. Amen.
Currently Selected:
MAKHO 16: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.