LYI 2
2
1 Yhensain tying toh vgus, yang tauh las mhanhdyvp cho yah Thomh Nes guih pheh loh las, Edom boms mau mas nyangh shoq whang yenh.#Gyu 21.4
2Hauh thang lhyi Yhensain ngos lyis taiq zis gas, 3Yang hauh boms mas jyon yenh zis nyangh goeus, mautsung pheh loh chah goeus. 4Nyang ngos lyis o mha dah taiq shet cho namoq lyis dyei aq, ge taiq. Namoq yah we goh goeus boekyis Esau dah vshih jens dah maunyeis, Edom boms mau suh lai loh bah ge. Nyamoq gas namoq lyis gyuk das las zaih nyeis geh.#Vpm 36.8 5Nyamoq lyis jes ma gis sont. Ngos namoq lyis nyamoq maunyeis mas zis khyei nang gus nyhoq eq ma dyei das. Edom gas ngos Esau dah vnyau vshih lyis dyei goeus. 6Namoq nyamoq jyank masyah zonoms yahge jeis gis wis.
7Namoq kuot cho dvnganh mas Yhensain namoq Mangso khasoeh shvmanh nyeis zis soh geh. Nyang gas namoq hei iq kuh dah mhanhdyvp mas suh whang yenh uhlyis gomh dyei. Hai nyeici zvn gonh namoq yah dvgeh nyeis las namoq mas chah zis dvnganh yoh, ge.
8Housoeh yang tsoq loh las Elat yahge Ezion Geber Wus, Coh Thomh pheh loh dah cho mhayah tauh las buisthuq mautsung shot Moab pheh loh. 9Yhensain ngos lyis taiq, Lot dah vshih Moab dius jens lyis vthauqkhyi goh. Nyamoq lyis tyi lha jes vsont goh: Ngos nyamoq lyis Ar wus dyei goeus las, ngos nyamoq dah mau namoq lyis ma dyei das, ge.#Vpm 19.37
10Hau Ar wus mas Emim ge, yomzains dam dius nyau nyeis ku. Nyamoq gas gohtoeu Anakim Dam dius nyau teh kuh nyhang. 11Nyamoq lyis, Anakim lyis teh Rephaim ge eq seq, nghuot laus eq Moab jens gas Emim dius ge dvlui. 12Edom mas Hor dius nyeis ku. Nghuot laus eq Esau dah vnyau vshih jens nyamoq lyis khat tyamp, nyamoq dah vnyau lyis mhont las houmha nyeis. Houka Israel jens gas Yhensain nyamoq lyis dyei dah mau mas dah jeswus lyis kuot teh nghuot.
13Hauh thang lhyi Yhensain yang lyis kuot aq ge vgus yang Zered lvng goeu. 14Heika yang Kadesh Barnea masyah thuq thang lhyi Zered lvng goeu jweh shoq somhci xet zvn nghuot goeus. Hauh caiq lyis dah jeszan bang gas, nyamoq shei das ge Yhensain taiq toh vgus dvnganh shei goeus.#Gyu 14.28-35 15Nyamoq dvnganh lyis dye mhont tyamp shoq Yhensain ka nyamoq lyis tyi toh.
16Nyamoq dvnganh dye shei thang lhyi, 17Yhensain yang lyis taiq zis gas, 18Khvnyhik namoq Ar cho yah Moab mau suh lai das. 19Hauh thang lhyi namoq gas Lot dah vnyau vshih Amon jens dah mau nvm mas jweh loh das. Nyamoq lyis vthungh nhont goh, jes vsont goh, Khasoeh ge lyis ngos nyamoq lyis dyei toh dah maunyeis mas zis namoq lyis cha ma dyei das.#Vpm 19.38
20Haih maunyeis lyis eq houmha nyeis khoq bang dah nyings yoeus las Rephaim mau ge seq. Amon jens gas nyamoq lyis Zamzumim ge lui. 21Nyamoq gas Anakim jens teh kuh nyhang lha nyo, nyamoq gas yomzains dius nyau nghuot laus eq Yhensain nyamoq lyis mhont tyamp. Housoeh nyamoq mau lyis Amon dius jens yah yoeus tyamp lha Amon jens houmha nyeis. 22Yhensain ka Edom boms mau mas nyeis Esau dah vnyau vshih jens lyis kuot dyei vgus kuot. Nyang gas Hor jens lyis mhont tyamp las, Edom dius jens gas nyamoq dah mau lyis ung lha houmha khvnyhik jweh shoq nyeis teh nghuot. 23Mediteranean thomh jyankyvm chank yah dah mau mas gas Kreti goeujo mas bang tsain nyeis. Nyamoq gas cangxeih nyeis dyos lyih dah Awim dius lyis mhont las nyamoq dah joqyos mautyi pheh Gaza wus mas jweh shoq nyeis.
24Yang Moab mau dye suh lai thang lhyi Yhensain yang lyis taiq, Gvshih namoq toq las Arnon lvng goeu geh. Heshbon mas Amori hwankti Sihon yahge nyah maunyeis lyis ung das yomsoq ngos namoq lyis dyei. Nyang lyis zan las nyah mau mas wvng nyeis geh. 25Khvnyhik masyah ngos dvkhauyah dah dius jens namoq lyis gyuk nhang das. Namoq dah nyings yoeus lyis yuk khanghmuh gyuk nvn das, ge.
Hwankti Sihon lyis Ung
(Gyu 21.21-30)
26Hauh thang lhyi Ngos Kedemot mhanhdyvp masyah Heshbon hwankti Sihon jyank mas loeuskyoh bang lyis yah o mha dah nyenstap dang taiq nhang kat. 27Nah maunyeis cho yah ngamoq lyis suh lai nhang aq. Cho chank dan dan loh das, choyvm pheh ma cheh das. 28Ngamoq zonoms eq dvwis zo das, jeis eq dvwis shuk das. Ngamoq kuot mes zis gas, nah mau cho ngamoq lyis khyei cho jenh suh lai nhang aq. 29Ngamoq Yodan lvng goeu las Yhensain, ngamoq dah Mangso ngamoq lyis dyei dah mau mas jweh shoq nghuot. Edom mas nyeis dah Esau vnyau vshih jens yahge Ar mha nyeis dah Moab jens gas ngamoq lyis nyamoq maunyeis cho suh lai nhang goeus.
30Nghuot laus eq Heshbon hwankti Sihon ka yang lyis nyah mau cho ma lai nhang. Yhensain namoq Mangso ka, yang nyang lyis ung lha khvnyhik yang nyeis dah nyah maunyeis yoeus das xiklyis nyang lyis ehnyet than nhang lha gomloeus toq nhang.
31Hauh thang lhyi Yhensain ngos lyis taiq zis gas, Yoeuh aq! Ngos hwankti Sihon yahge nyah mau lyis nah xikkhonh mas mvshoh mvjyen kuot goeus. Nyah maunyeis yoeus las houmha nyeis geh, ge. 32Sihon ka yang lyis zan das zis nyah dius jens dvnganh yah Yahaz wus nvm mas thuq los. 33Nghuot laus eq Yhensain, yah Mangso ka nyang lyis yah jyank mas kyauh goeus las, yang gas nyang eq, nyah lo jens eq, nyah dius dvnganh lyis sat goeus. 34Hauh uhlyis yang nyah wugungs dvnganh yoeus las, wus khanghmuh lyis mhont. Vbusbih, vmesbih, loshang jens dvnganh sat, hank lyis eq kang ma dwis nhang toh lo. 35Yang gaunyhauq yahge wus mas dah lvnyhvp tsain yoeus. 36Yhensain, yah Mangso ka yang lyis Arnon langhkhau vthang mha dah Aroer wus masyah langhkhau vgungs mas dah wus, Gilead jweh shoq dah wus jens tsain yoeus nhang. Ngamoq xiklyis kha wus eq sunk than zis ma bos. 37Nghuot laus eq yang Amon jens nyeis mau, Yabok lvng jyankyvm mas, boms mas tsain joq dah wus mas ma ni loh. Houka Yhensain, yah Mangso tying toh zis nghuot.
Currently Selected:
LYI 2: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.