2 HWANKTI 2
2
Eliya lyis Toqh Yoeus Loh
1 Yhensain ka Eliya lyis lyeislhain yah maukhung mha toqh yoeus bah ge lyis, Eliya gas Elisha yah Giga masyah gyung suh loh. 2Eliya Elisha lyis taiq zis gas, Heimha nyeis langh aq, Yhensain ngos lyis Bethel pheh loh nhang, ge.
Elisha gas, Yhensain eq nvng eq kang dwis nyeis zis yah dvyhangteh, ngos nvng yah ma gang, ge. Housoeh nyah aiq yuk Bethel pheh gyoh e.
3Bethel mas nyeis dah lvpe dvjens Elisha lyis thuq zes las nyei zis gas, Yhensain ka khvnyhik nah yhensain lhyi nah jyank masyah shwih loh tyamp das zis nvng vseq lah, ge. Elisha toeuh zis gas, Ngos seq.
Nghuot laus eq, hauh cho ma taiq goh, ge.
4Eliya nyang lyis taiq zis gas, Elisha eh, Yhensain ngos lyis Yerikho mas nhang lha nvng heimha jenh nyeis aq, ge.
Nghuot laus eq Elisha taiq zis gas, Yhensain eq, nvng eq kang dwis nyeis zis yah dvyhangteh, ngos nvng yah ma gang, ge. Housoeh nyah aiq yuk Yerikho mas jweh loh.
5Yerikho mas lvpe dvjens gas Elisha lyis los tsain taiq zis gas, Khvnyhik Yhensain ka nah yhensain lhyi nah jyank masyah shwih loh tyamp das zis nvng vseq lah, ge.
Elisha toeuh zis gas, Ngos seq. Nghuot laus eq, hauh cho ma taiq goh, ge.
6Hauh thang lhyi Eliya gas Elisha lyis taiq zis gas, Yhensain ngos lyis Yodan lvng mas nhang lha nvng heimha jenh nyeis aq, ge.
Nghuot laus eq Elisha gas, Yhensain eq, nvng eq kang dwis nyeis zis yah dvyhangteh, ngos nvng yah ma gang, ge. Housoeh nyah aiq yuk tsoq loh. 7Lvpe jens oengci yuk moq gas Yodan lvng jweh shoq nyah aiq yuk thang mha chank loh las we masyah tsain yoeuh yap joq lyis nyah aiq yuk gas Yodan lvng yvm mas yap joq. 8Hauh uhlyis Eliya gas nyah dyixing yoeus lom las jeis lyis lyuk. Hauh jeis gas thyi pheh hei pheh yaus gang loh. Housoeh nyah aiq yuk gas nyeisjvng cho thyitvp pheh dap loh. 9Houmha Eliya gas Elisha lyis, Ngos lyis ma shwih loh shih lyis ngos nah xiklyis cha kuot dyei nhang mes zis taiq aq, ge.#Lyi 21.17
Elisha gas, Ngos lyis nah gungsthaiq kuot das zis nah Dyos yomsoq aiq huon#2.9 Lyi 21:17 mas yoeuh aq dyei aq, ge.
10Eliya gas, Nvng yau ja sang, nghuot laus eq nah jyank masyah ngos lyis toq yoeus loh uhlyis nvng ngos lyis nyvng lyis gas gis bweh das: ma nghuot lyis gas ma bweh, ge.
11Housoeh nyah aiq yuk tsoq jisgoh loh nyeis lyis, nyi nyang jens she dah nyilhyingh dvkoeuq nyetlos nyettant nyah aiq yuk jo mas thuq los las: Eliya lyis lyeislhain yah maukhung pheh yoeus toqh loh. 12Hauh zis Elisha nyvng las nyang kaiq zis gas, Ngah uwus eh! ngah uwus eh! Israel dah jeslhyingh jens yahge nyang jis bang! ge. Hauh thang lhyi Eliya lyis ma nyvng lo.#2Hw 13.14
Elisha gas nhaiqngis nyoqyaus las nyah dyi lyis aiq khyamh langchuiq tyamp. 13Nyang gas Eliya jyank masyah gyoh los dah dyixing kui chi lha tauh loh las Yodan lvng jyankyvm mas yap joq. 14Nyang gas hau Eliya jyank masyah gyoh los dah dyi yah jeis lyis lyuk zoh lyis yah taiq zis gas, Eliya dah Yhensain Mangso khalhye nyeis, ge. Housoeh nyang jeis lyis lyuk las hauh zis gas gang loh las Elisha goeu luiq los. 15Yerikho wus mas lvpe dvphung ka Elisha lyis nyvng las taiq zis gas, Eliya dah yomsoq gas Elisha thoq mas bos, ge. Nyamoq gas nyang lyis e zes las nyah xikkhonh mas dupaiq. 16Hauh thang lhyi nyamoq taiq zis gas, Ngamoq mas yombos bang oengci yuk nyeis. Nyamoq lyis nah yhensain lhyi loh xo nhang aq. Yhensain dah dyos gas nyang lyis shwih doq loh las, boms, nghuot ya langhkhau dvyos yos mas loh khyoq toh mvbeh, ge.
Elisha gas nyamoq lyis, Vloh xo goh, ge.
17Nghuot laus eq nyamoq gas nyang lyis magyo mathoq sang las nyang nyamoq lyis loh xo nhang. Nyamoq oengci yuk bang gas somh nyeih xo laus eq ma nyvng. 18Elisha Yerikho mas nyeis shih las nyamoq gas nyah jyank mas tauh los. Housoeh nyang nyamoq lyis taiq zis gas, Ngos namoq lyis, Vloh goh oen taiq goeus ma nghuot lhyeh, ge.
Elisha dah Yomsoq muh
19Yerikho wus mas bang Elisha lyis taiq zis gas, Ngah yhensain nyvng zis yah dvyhangteh haih wus kuot toh zis gas yungh. Nghuot laus eq jeis ma gis las lo shuot cho bos, ge.
20Nyang taiq zis gas, Khuq saiq dvkhyvp mas coh kat los geh, ge. Housoeh nyamoq hauh zis nyah jyank mas chi los. 21Nyang gas jeis thuq jang mas e lha, houmha coh kat las taiq zis gas, Yhensain heisoeh ge: Ngos haih jeis lyis gis los nhang goeus. Gvshih masyah shei zis, lo shuot cho ma bos lo das, ge. 22Housoeh las Elisha taiq zis yah dvyhangteh khvnyhik jweh shoq jeis gis joq.
23Elisha gas Bethel masyah toq las gyung suh loh nyeis lyis, hauh wus mas yukgis lo jens dvyhamh gas, Uhtyauh thuq loh aq, uhtyauh thuq loh aq, ge tsain kaiq.
24Housoeh nyang nyamoq lyis yoeuh las, Yhensain dah nyings yah nyamoq lyis nhoengh. Housoeh woms zains aiq doeu mhanhdyvp masyah thuq los las yukgis lo nyeici aiq yuk lyis ngat thyi sat.
25Hou mhayah Elisha Kamel boms pheh loh. Hauh thang ma nyangh lyis nyang Samari pheh tauh loh.
Currently Selected:
2 HWANKTI 2: NCB
Highlight
Share
Copy
Want to have your highlights saved across all your devices? Sign up or sign in
Ngochang Common Language Bible © Bible Society of Myanmar, 2010.