AAROMA EFALOMO
EFALOMO
Ontumwafo yaPaulus kAaroma oya nyolwa okulongekidha etalelopo lye kegongalo muRoma. Elalakano lye okulonga maakriste yaahwiyaka pakathimbo, opo a mone eyambidhidho lyokuya kuSpania. Okwa nyola ontumwafo ndjika opo a fatulule kutya eitaalo nokukalamwenyo kwopakriste oshike. Embo ndika oli na etumwalaka lyaPaulus lya yela.
Tango sho a kundu egongalo muRoma nokwe ya lombwele kutya ohe ya galikanene, okwe ya tseyithile enenedhiladhilo lyontumwafo ndjika:
Evaangeli otali holola nkene Kalunga ta ningi aantu aayuuki koshipala she. Shika otashi ningwa keitaalo alike okuza ketameko sigo opehulilo (1:17).
Paulus okwa nenepeke enenedhiladhilo lye. Okwa ti, aantu ayehe, Aajuda naapagani oya pumbwa ya hanganithwe naKalunga, oshoka ayehe aayoni notaa ningwa aayuuki koshipala shaKalunga mokwiitaala Jesus Kristus. Nena Paulus okwa fatulula wo omwenyo omupe muKristus ngoka tagu etwa kekwatathano epe naKalunga. Omwiitaali ota mono ombili naKalunga nokwa mangululwa moonkondo dhuulunde nodheso kOmbepo yaKalunga.
Moontopolwa 5-8 Paulus ota fatulula elalakano lyompango yaKalunga noonkondo dhOmbepo yaKalunga monkalamwenyo yooitaali.
Opo ihe Paulus ota fatulula epulo edhigu kombinga yAajuda naapagani, kombinga yehala lyawo medhiladhilo lyaKalunga lyokuhupitha omuntu kehe.
Pehulilo ota ti kutya Aajuda sho ye ekelehi Jesus, osha ningi ondungedhiladhilo yaKalunga, aantu ayehe opo ya vule okuya mesilohenda lyaKalunga molwaJesus Kristus.
Paulus okwi itaala kutya Aajuda itaa ke ekelahi Jesus aluhe. Nena Paulus ota nyola nkene omukriste e na okukala, unene kombinga yohole mekwatathano naantu ayehe.
Paulus ota fatulula iinima mbika kutya oyo okulongela Kalunga yo iinakugwanithwa yaakriste nokepangelo wo, nomapulo ge na sha nokaana kokomwenyo. Okwa hulitha nomatumwalaka gopaumwene nehambelelo okusimaneka Kalunga.
Elandulathano lyoshikalimo
Efalomo menenedhiladhilo 1:1-17
Omuntu okwa pumbwa ehupitho 1:18—3:20
Ondjila yaKalunga yehupitho 3:21—4:25
Omwenyo omupe muKristus 5:1—8:39
Israel mondungedhiladhilo yaKalunga 9:1—11:36
Eihumbato lyopakriste 12:1—15:13
Ehulitho nomakundo gopaumwene 15:14—16:27
Currently Selected:
AAROMA EFALOMO: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.