JOB EFALOMO
EFALOMO
Embo lyaJob olyo ehokololo lyomulumentu omwaanawa ngoka a hepekwa kiiponga oyindji. Okwa kanitha oyana ayehe, e ta kanitha omaliko e ta ehamekwa komukithi gu nyanyalitha. Momihukilila dhopatatu dhoonkundathana dha nika oshitewo, omunyoli ota ulike nkene ookuume kaJob naJob ye mwene taa yamukula kiihuna mbika. Pehulilo, Kalunga ye mwene ngoka ha longo nuuntu, okwi iholola kuJob e ta ningi oshitopolwa sha simana shoonkundathana.
Ookuume kaJob oya kala taa fatulula omahepeko ge pauvoko lyopamuthigululwakalo gwopaitaalo. Oya kala taa ti, molwashoka Kalunga oha futile aluhe uuwanawa noha geele uuwinayi, omahepeko gaJob otaga ti ashike kutya okwa yona. Molwashoka shino, kuJob osha li omatompelo ganathangwa unene, ke wete i ilongela egeelo ewinayi ngaaka, oshoka okwa kala omulumentu omwaanawa sha pumba nomuyuuki. Job okwa li ta nyengwa oku shi uva ko Kalunga ta etha uuwinayi wu thike mpoka wu ningilwe omuntu ngaye, e ti itula omukumo a taalele Kalunga nomapulo. Job ina kanitha eitaalo lye, ihe okwa kala a yuulukwa a yukipalithwe koshipala shaKalunga noku galulilwe esimano lye ongomulumentu omwaanawa.
Kalunga ina yamukula komapulo gaJob, ihe okwa yamukula kombinga yeitaalo lye moku mu pupwikila kohi yethano lyoonkondo dhe dhopaukalunga nuunongo. Nena Job okwi ifupipike e ta hempulula kutya Kalunga oye omunongo nomunene nokwiitedhululula koohapu dhe ndhoka a longitha dhaa na oshili nodhuugeyi. Ehulitho lyoshinyolwa otali hokolola Job nkene a shunwa konkalo ye yoshito ndjoka nokuli ya yambekwa yi vule yotango. Kalunga okwa pukulula ookuume kaJob molwashoka ya nyengwa okuuva ko omahepeko gaJob shoka taga ti. Job awike a kala naanaa e na euvoko kutya, Kalunga ngaashi e mu ulika, oye omunene e vule nuuthigakalo wopaitaalo.
Elandulathano lyoshikalimo
Efalomo 1:1—2:13
Job nookuume ke 3:1—31:40
a. Enyenyeto lyaJob 3: 1-26
b. Oonkundathana dhotango 4:1—14:22
c. Oonkundathana oontiyali 15:1—21:34
d. Oonkundathana oontintatu 22:1—27:23
e. Esimaneko lyuunongo 28:1-28
f. Ehokololo lyahugunina lyaJob 29:1-31:40
Iipopiwa yaElihu 32:1—37:24
Omuwa ta yamukula Job 38:1—42:6
Ehulitho 42:7-17
Currently Selected:
JOB EFALOMO: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.