HESEKIEL 2
2
Kalunga ti ithana Hesekiel a ninge omuhunganeki
1Sho nde shi mono, onda tsu oshipala mevi. Ongame nondu uvu ewi tali ti: “Muna gwomuntu, thikama. Onda hala ndi popye nangoye.” 2Ewi manga tali popi, yo ombepo yaKalunga oye ya mungame e tayi yambula ndje po, nonatango ondu uvu ewi tali ti: 3“Muna gwomuntu, otandi ku tumu kAaisraeli. Oya tsa ondumbo notaa kondjitha ndje sigo onena ndjika, naanaa ngaashi oohekulu ye shi ningi. 4Oyo aatangalali noihaa simaneke ndje nando, onkee tandi ku tumu kuyo, u ya tseyithile shoka ngame, Omuwa Omupangeliawike, tandi ya lombwele. 5Kashi na nee mbudhi, aatangalali mboka ngele otaye ku pulakene nenge itaye ku pulakene, otaa ka tseya kutya omuhunganeki okwa kala mokati kawo.
6“Ihe ngoye, muna gwomuntu, ino ya tila nenge u tile oohapu dhawo. Otaye ke ku nyema noku ku dhina. Oto ka kala wa fa u li mokati koondje. Ihe nando ongeyi, ino tila aanandumbo mboka nenge shaa shoka taa popi. 7Ya lombwela oohapu dhandje, ngele otaa pulakene nenge itaa pulakene. Dhimbulukwa kutya oyo aatangalali.
8“Muna gwomuntu, pulakena shoka tandi ku lombwele. Ino tsa ondumbo u ya fe. Makula okana koye u lye shoka tandi ke ku pa.” 9Onda mono oshikaha sha ganekwa shu ukithwa kungame, nosha li sha yelutha ondhinga yembo. 10Oshikaha osha dhingulula ondhinga yembo, nonda dhimbulula kutya oya li ya nyolwa meni nokombanda. Omwa li mwa nyolelwa oontakumandjimbo, omahekumuno nomayemato. Kalunga okwa ti:
Currently Selected:
HESEKIEL 2: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.