EKSODUS 2
2
Okuvalwa kwaMoses
1Pethimbo ndika omulumentu gwomezimo lyaLevi okwa hokana omukiintu gwomezimo lye. 2Omukiintu okwe mu valele okamati. Sho e ka mono okawanawa, okwe ka kutha e te ka holeke oomwedhi ndatu. 3Ihe sho a nyengwa oku ka holeka, okwa kutha okatemba komanenge e te ka hoto neka. Okwa langeke mo okahanona e te ka tula momanenge komunkulo gwomulonga. 4Omumwayina omukadhona gwokahanona okwa thikama mpeyaka, a tale, nkene taka ningwa.
5Omuna gwomukwaniilwa omukadhona okwe ya komulonga i iyoge, manga aadhike ye taa kunkula nomulonga. Ohaluka okwa ndhindhilike okatemba ke li momanenge e ta tumu omupika gwe e ke ka tale mo. 6Omuna gwokombanda okwe ka siikulula e ta mono okamati taka lili. Okwa li e ka uvitile ohenda e ta ti: “Okanona haka okAahebeli.”
7Omumwayina gwako omukadhona okwa pula a ti: “Nandi ke ku talele omukulukadhi Omuhebeli, e ye e ke ku yamuthile okanona?”
8Omuna gwokombanda okwa yamukula a ti: “Eeno, inda.” Omukadhona okwa yi e ti ithana yina yokanona. 9Omuna gwokombanda okwa lombwele omukulukadhi a ti: “Taamba okahanona haka, u ke ka yamuthile ndje, e tandi ke ku futa.” 10Okanona sho ka koko, okwe ka fala komuna gwokombanda, ngoka e mu taamba ongomwana. Okwi ipopile a ti: “Ndishi onde ka kutha momeya, otandi ka luku Moses.”
Moses ta tembukile kuMidian
11Moses sho a koko, okwa yi a ka talele po Aahebeli aakwawo nokwa mono, nkene taa longithwa iilonga iidhigu. Okwa mono nokuli Omuegipiti ta dhenge Omuhebeli, gumwe gwomaakwawo. 12Moses okwa lengalenga koombinga noombinga. Sho a mono kutya kaku na omuntu, okwa dhipaga Omuegipiti e te mu fumvike mehekevi. 13Esiku lyanofu okwa yi ko ishewe e ta adha ko Aahebeli yaali taa kondjo. Okwa lombwele ngoka a li e na uusama a ti: “Omolwashike to dhenge mukweni?”
14Omudhengi okwa yamukula a ti: “Olye e ku ningi omuleli nomutokolihapu gwetu? Oto dhipaga ndje, ngaashi wa dhipagele Omuegipiti?” Nena Moses okwa tila nokwi ipopile ta ti: “Nani shoka nda ninga osha tseyika.” 15Omukwaniilwa sho u uvu shoka sha ningwa po, okwa kambadhala a dhipage Moses, ihe Moses okwa fadhuka po e ta yi kuMidian. Sho a thiki ko, okwa kuutumba pomuthima.
16Jetro, omuyambi gwaMidian, okwa li e na aakadhona yaheyali. Oye ya okuteka omeya, opo ya hugile oonzi niimuna yahe. 17Ihe aasita yalwe oye ya tidha po. Nena Moses okwe ya popile e ta hugile iimuna yawo. 18Sho ya shuna kuhe Reuel, okwe ya pula a ti: “Omolwashike nena mwa zi ko mbala?”
19Aakadhona oya yamukula ya ti: “Omulumentu Omuegipiti okwe tu kanyutulula miikaha yaanahambo e ta hugile iimuna yetu.”
20Reuel okwa pula oyana aakadhona ta ti: “Oku li peni? Omolwashike mwe mu thigile ko? Indeni mu ke mu ithane, a pewe iikulya.”
21Moses okwa kala hoka, naJetro okwe mu pe omwana omukadhona Sippora, e mu hokane po. 22Sippora e mu valele omumati. Moses okwi ipopile a ti: “Ngame ondjendi mevi ndika,” e te mu luku Gersom.
23Momukokomoko gwomimvo omukwaniilwa gwaEgipiti okwa si, ihe Aaisraeli oya li taa keme notaa kugu moluupika wawo. Onkugo yawo oya thiki kuKalunga, 24ngoka u uvu ekemo lyawo e ta dhimbulukwa ehangano lyawo naAbraham, Isak naJakob. 25Okwa mono okupikwa kwAaisrael e ta kala e ya ipyakidhilila.
Currently Selected:
EKSODUS 2: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.