AAKOLOSSA 2
2
1Pitikilii ndje, ndi mu hokololele uudhigu mboka ndi u na mokulonga kwandje omolweni nomolwaantu yomuLaodikea nosho wo mboka inaa tseya ndje moshipala. 2Otandi shi ningi, opo ohole yi ya kwatakanithe kumwe, noya mone omukumo okutseya iinima ayihe. Oyo otaa ka tseya ihe kutya Kristus oye oshiholekwa shaKalunga. 3Oye oshipatululo shoka tashi patulula omaliko agehe gaKalunga guunongo nogowino, ngoka ga holekwa.
4Shika otandi shi mu lombwele, mwaa pukithwe nando okomuntu gumwe noohapu dhomuheka. 5Oshoka ngame nando ndaa po pune palutu, onkee tuu ondi li pamwe nane pambepo. Nonda nyanyukwa okumona uukolele weitaalo lyeni mokwiitaala Kristus.
Eudhililo lyomwenyo muKristus
6Ano sho mwa taamba Jesus Kristus, a kale Omuwa gweni, kaleni ihe muukumwe naye. 7Dhameni muye ne mu itungile muye. Kaleni meitaalo shi vulithe shito, ngashika mwa longwa. Ihe kaleni mu udhilila omahambelelo.
8Kotokeni ano, mwaa yulwe nando okomuntu nomalongo guunongo wopantu nomafundjaleko gaa fele. Ogo ogi ikwatelela komithigululwakalo dhaantu noga za moombepo ndhoka tadhi pangele mewangandjo, ihe ne kaleni muKristus. 9Oshoka muKristus nokutya muuntu we, omu na egwanopo lyondjelo yuukalunga auhe. 10Onkee muukumwe naye one omwa pewa egwanopo alihe lyomwenyo. Kristus oku vule aapangeli ayehe yomombepo naanankondo ayehe.
11Muukumwe naKristus one omwa fukalekwa, hanefukaleko ndyoka hali ningwa niikaha kaantu, aawe, ihe onefukaleko lyaKristus mwene. Mefukaleko ndika one omwa mangululwa mo moonkondo dhomolutu nduka luulunde. 12Oshoka mokushashwa omwa fumvikwa pamwe naKristus. Meshasho tuu ndyoka omwa yumudhwa wo pamwe naKristus kuusi omolweitaalo lyeni okwiitaala oonkondo dhaKalunga, ngoka a yumudha Kristus. 13One omwa kala nale mwa sa pambepo omolwoondjo dheni nomolwaashoka omwa li aapagani mwaa na ompango yaKalunga. Ihe ngashingeyi Kalunga okwe mu tula omwenyo pamwe naKristus nokwa dhimi po oondjo dhetu adhihe. 14Oye okwa dhimi po enyolo hali tu tamaneke pamwe niipango yalyo nokwe li hanagula po thiluthilu, sho e li alele komushigakano. 15Komushigakano hoka Kristus okwa yugu aaleli yomombepo naapangeli oonkondo dhawo. Oye oku ulike uukatalume wawo montaneho yaayehe, sho e ya kwatele komeho mosheendo she shesindano, ngashika omuntu te ende noonkwatwa dhe.
16Ano inamu etha, mu pewe uusama kombinga yaashoka hamu li nohamu nu, nokombinga wo yomasiku omanene nenge yoshituthi shomwedhi omupe nenge kombinga yEsabati. 17Mbika ayihe oyo omuzizimba gwowala gwiinima yokomeho, ihe oshinima sho shene oKristus. 18Inamu zimina, mu pangulwe nando okomuntu ngoka ti iningi e vule yalwe omolwomamoniko gontumba noti isimanekele eifupipiko lyiifundja nesimaneko lyaayengeli. Omuntu a tya ngaaka okwa tuwalalekwa komadhiladhilo ge gopantu. 19Nokuli oye okwe etha okutala kuKristus, ngoka e li omutse. Oshoka meutho lyaKristus olutu aluhe otalu paluthwa notalu kwatelwa kumwe koongolo nokoothipa e talu koko, ngashika Kalunga a hala.
Okusa nokukala nomwenyo pamwe naKristus
20One omwa sa pamwe naKristus nomwa mangululwa mo moonkondo dhoombepo ndhoka tadhi pangele mewangandjo. Ongiini ano, sho mu li po natango mwa fa aantu yomuuyuni mbuka mokukala kweni? Omolwashike tamu vulika kiipango yiidhila ngashika mbika: 21“Ino shi kwata,” “Ino shi lola,” “Ino shi guma?” 22Mbika ayihe otayi longithwa e tayi hulu po. Iipango mbyoka ayihe nomalongo ngoka agehe oya ningwa kaantu. 23Eeno, pakutala oya fa yi na uunongo mesimaneko lyawo lyaayengeli kethiminiko, meifupipiko lyiifundja nomeihepeko lyawo edhigu okuhepeka omalutu gawo. Ihe kaayi na nando oshilonga shasha kombinga yokupangela uuhalu womolutu.
Currently Selected:
AAKOLOSSA 2: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.