AMOS 9
9
Omapangulo gOmuwa
1Onda mono Omuwa a thikama poshiyambelo. Okwa ti: “Ligagula po oondungu dhoongudhi dhotempeli nomungunda, opo oshipamba ashihe shi ndjingandjingwe. Dhi nyanyagulila kombanda yomitse dhaantu. Oshihupe shomuyo otandi ke shi dhipagela miita. Kape na ngoka ta ka hunuka po, kape na ngoka ta ka fadhuka po. 2Nokuli nando nayi ihupile omakwena okuya muuyuni wokuusi, otandi ke ya kwata. Nonando naa londe kegulu, otandi ya mbolokotitha ko. 3Ngele taa ka holama kondungu yondundu Karmel, otandi ke ya shilila e tandi ke ya kwata ko. Ngele otaa holama ndje kondaandelo yefuta, otandi ka lombwela evovo lyomefuta, li ya lye po. 4Ngele aatondi otaye ya fala muupika, otandi ke ya lombwela, ye ya dhipage. Onda tokola oku ya yonagula po, haku ya kwatha.”
5Omupangeliawike Omuwa Omunankondoawike ota gumu evi,
olyo notali kakama,
naayehe ya kala mo, otaa lilagana.
Uuyuni auhe otau itumbu notau thootele
wa fa omulonga Niili.
6Omuwa ota tungu egumbo lye mookathele,
nokombanda yevi ota yaleleke ko eyalelo.
Oti ithana omeya gefuta
e te ga wayulile kombanda yevi.
Edhina lye oye Omuwa.
7Omuwa ota ti: “Aaisraeli ne, momeho gandje omu thike pamwe nAasudani. Onda tembudha Aafilisti muKreta nAasiria muKir, naanaa ngaashi nde mu tembudha muEgipiti. 8Ngame Omuwa Omupangeliawike otandi tongolola oshilongo shaIsrael sha yonana notandi ke shi hanagula po kombanda yevi. Ihe itandi ka yona po oluvalo aluhe lwaJakob.
9“Otandi ka gandja elombwelo notii ka yela Aaisraeli ngaashi iilya metutu. Otandi ke ya yela mokati kiigwana, ndi yoolole mo mboka yaa na mwago. 10Aayoni yomaantu yandje otaa ka dhipagelwa miita — ayehe mboka haa ti: ‘Kalunga ita ka pitika, omupya gu tu adhe.’ ”
Ehepulutho lyaIsrael konakuyiwa
11Omuwa ota ti: “Esiku otali ya, uuna tandi ka pendula po uukwaniilwa waDavid, mboka wa fa egumbo lyo ongotela po. Otandi ka thitika omisa dhomakuma galyo nokutungulula shoka sha kumuka po. Otandi ke li tungulula, li kale ngaashi lya li shito. 12Nena Aaisraeli otaa ka pangela oshihupe shevi lyaEdom niigwana ayihe mbyoka ya li yandje.” Omuwa osho ta ti, ngoka te etitha mbika yi ningwe.
13Omuwa ota ti: “Omasiku otage ya,
uuna omuteyi ta hokele omukuni,
omukoli gwomandjembele ti ikokele komutsiki gwomiviinu.
Nena oondundu otadhi vivile omaviinu,
niikulundundu otayi ka hunga.
14Otandi ka kongolola aantu yandje,
ya shune kevi lyawo.
Otaa ka tungulula iilando yawo ya kumuka po
notaa kala mo;
otaa ka tsika iitsambe yomiviinu
e taa nu omaviinu;
otaa ningi iikunino e taa li iiyimati
mbyoka yi ima mo.
15Otandi ka tsika aantu yandje
mevi ndjoka nde li ya pe,
oyo noitaa ka nakulwa mo we.”
Omuwa Kalunga keni oye e dhi popi.
Currently Selected:
AMOS 9: ONDB
Highlight
Share
Copy
Want to have your highlights saved across all your devices? Sign up or sign in
Oshindonga Bible © Bible Society of Namibia, 2008.