Gálatas 1
1
Pablo iniajnat ti itijwile papo Sinia' jilis
1Asampey, japo i'lijwas. Ya'am Pablok'i'm, ti Sinia' jikawok'i'm, ip'isinik siu'nie ti atajiet'ase. Je napoka i'nio' ka siwojwa'n injlojwanikiek'i'm, jla'yi ka sijliu', 'yina paka pi Sijwajieti Jesús, siu'neje pi Sinia', paka ti iniujwa'n kisie'e ti itiajlajni pi a'no'.
2Ya'am, wikie'eyi siu'napo si'lijwas yi' ijiap, atejwila'ase, asa'am ti jleyejyi janak ajnat Galacia, ti Sinia' jilists'ase'm. 3'Esiji ka Sinia', jla'yi pi Saka'niona Jesús ti Sijwajieti, ka imp'elisinape, jla'yi ka inwe'nase'm ni askamankiye. 4Sijwajieti Jesús jlam ti iniwe'en ti ijioyi jana 'najlati sakeyis it'imina,#Mc 10.45; 1 Ti 2.6; Tit 2.14 kajeyepa ti iyo ka kas'maniti ki iyo ni ajnat ti wuj ti je 'es. Lapakawo ti jitienkiujnieye jla'am pi Sinia' ka kiak inwonts'e. 5¡'Esiji ka jlam kiajatajak'i'ni niwa jlomas ka kiak tiwonaja ti tena'a ni ijnonitieyi! Amén.
Lajk'ipa pi kiechaye inka'niye kanjwe'el ni Injwajieti, 'najata jla'am siu'nie
6Jlam sots'iniji ti ajieye'ase ti jiliyeyi pi Sinia', ti jlam ti ta'nase pakayi ti Sijwajieti imp'elisina'. Jlam'ne je itiotie'eje ti jiwoyeyi niwa jlamtis, siu'neje jikiniek'i siunie inamtik ti 'wenayi. 7Ijiatataja ti ijwienjli siu'nie inamtik Sinia' tajle, siunie ti awoki samtikie'asepi, siunie it'imina ti kiak jiwoyeyi. 'Nakayi jlam ti po' siunapo ti je inena'yi 'ate, ti tom'ni ask'ioye, ti iyo ka 'noti siuniwa iyone niwa jitienkiujnieyejes, siunie itiliak'i ka woyisi kajlejnate siunie inka'niye ti ijwil pa Sijwajieti. 8'Wanjliyi ka yama, ni'ne ka napokaye napo injlojwajnas ti tal poliyi, siuti kiak jayoki ja 'wenayeyi siupi inka'niye ti jajwila iyo kia ti ajwe'lase'm ti 'nelanjie'e, Sinia' je ijlie'en ti jawoyi jitisa' naka. 9Pajatak'ipe ti ajwe'lase'm, 'yina ja yikiajle'eje 'nakayi ti jayo'ate: siuti po' ni i'nio' ti jawoyi jlamtikie'ase siunie ti je ijliene ni iyo niwa Sinia' jlamtis iyo ti pajk'i ti yi'ase, ¡Sinia' je ijlie'en ti jawo jitisayi naka!
10Ji'we'en ti je nak ka iyojyi'n ka sonit papo i'nio' ti 'es ni isijmaye iyo, najata jla'am siunie awojyin'ni ka jlama jla'am pa Sinia' ka soniti ni isijmaye awone ka 'esie.#1 Ts 2.4 ¡Yot'iyi'ni ka kiak je iwo ti, siuti jayojyi'n naka, ka sonit napo i'nio'! ¿Jot'e ka 'nok'i'm ti yam ti Sijwajieti jikawok'i'm?
Je tajle ni i'nio' siupi iyoyi jlamtikie'
11I'lijwas, awotajank'iye ka 'najanayi siu'nie: siunie ti awoyipe yamtikie'ase, je ka intajle ni i'nio'. 12Je atajleje paka ne'yi paka i'nioye ka ts'eyasane, 'yina Sijwajieti Jesús jla'am ti tajle it'imina ti sitiant'ieje.
13'Yina asa'am 'najanayi pi jiwonak'i ti ya'am Judíok'i'm, jla'yi ti jijieyek'i siukia awoyi ti je aleyi ti akk'i siunie iyo pit napo Judíojos ni yamisi, ti wuj ti ani'net ti ata'yi ilia'm napo Sinia' jilis, ti awotaja ka nitiajnat siunie yamisi pet, paj ti awoyeta ka itij'we ka iliajne'n.#Hch 8.3; 22.4-5; 26.9-11 14'Yina ti je kaspini' siojopo ijniujliejwaspe ti ijiate ti akinieje siukia iyo pit napoka Judíojos, 'yina jwamjla'a ya'am ti 'an pijia'm ti ajyi japo ya'yispe, kajeyepa ti ya'm ijiate ya'am ti je sikiwaliyi'i kiwa jikeyis kiapo 'yaka kijilas mases.#Hch 22.3
15Jlamp'a'nepe Sinia' pajk'i pi iyonk'iji ti siwakajlanit ti je ajliyi'n kiu', lapakawo ti wuj ti sip'elisi'n it'imina ti tank'i. 'Yina ti jla'am ti tajle ka kiak iyoyi, 16sekyi'i naka'ne ti iyo ti sitiant'ieje jla'yi ti i'winkink'i'm pi jlas,#Hch 9.3-6 sekyi'i ka yoyi pet yamtikieyi siunapo je Judíojos ka ijwi'il pi jlas. Sek taj'leyi siunie awoyi ti je ajoyi paka i'nioye ka 'yaseje'n siupi jayoyi iyo ni awoyi. 17Ka jakayeyi ka ijio Jerusalenne ka ts'iuyi siojopo inia'an ti injlojwajnas, ya'am ti je awojli'ijyi injlojwanikie'. 'Wenajliyi siukia awoyi jla'm awonayi'ni 'ate ti ajo 'niji Arábiaja, sekyi'i ti apilie'eje 'niji Damáscojo.
18Najape kiwa najkapis ajwajyi jiwekie'eja ti ajo 'niji Jerusalenne, ti ajoyi ja Pedro. Inkijmayejes times kiwa atej'wisia'm ti sek si'wanjle'e.#Hch 9.26-30 19'Yina je a'we'en siojopo injlojwajnas ijia ka sek ne'yi, ijwienjli jla'am ja Santiago ti a'we'en, Saka'niona ji'niayi ijwienjliyi. 20Ijiate siu'nie iyo 'ni ip'isinik, jlam je awoyi jitieyi'i pa Sinia'.
21Sekyi'i ti ataye'eje 'niji siojowa ajnatis jle' iyo'ate Siria, siu'neje jlaja Cilicia. 22Siukiwa jlomas ajwel'ni japo i'nio' yiji jlaja Judea jakayi ti je itiant'iejejliyisk'i kiu'. 23'Najata jla'am ti t'ijieyisk'i ti sijwelis ti iyo'ate, “Siunie i'nio' ti tejepe selia'm kiwak siukiwa jlomas yam'niji, 'nakayi yamtiyeyi pit siu'nie 'es ti iyo'otiejepi ka inetiajnate'n, 'naka intankiujnieye ti 'es.”
24Sekyi'i wuj ti iyunitis pa Sinia' ti i'winayis siukia awoyi.
Currently Selected:
Gálatas 1: CRT97
Highlight
Share
Copy
Want to have your highlights saved across all your devices? Sign up or sign in
Nuevo Testamento en Chorote © Sociedades Biblicas Unidas, 1997.